Tiranë, 5 shtator 2011, NOA/ Arjola Ymeraj- Pak çaste më parë ka nisur sesioni i ri parlamentar ku krahas ligjvënësve, të pranishëm janë edhe ambasadorët e akredituar në Shqipëri, si ai i SHBA Alexander Arvizu, ambasadorja e Francës Maryse Daviet dhe disa ambasadorë të tjerë. Prania e tyre pritet të jetë një ogur i mirë përpara reformave themelore me të cilat pritet të përballet vendi dhe që fillimisht para se të marrin jetë kanë nevojë për votën e deputetëve. Ndërkaq e veçanta e këtij sesioni të ri parlamentar është rikthimi në kuvend pas disa muajsh bojkoti i opozitës, pas mbledhjes së grupit parlamentar socialist mesditën e sotme dhe pas deklaratës së kreut të tyre, Edi Rama i cili tha se socialistët do të jenë në çdo seancë parlamentare. Gjatë kësaj seance nuk pritet të jenë debatet e ndezura, por pritet fjala përshëndetëse e kryeparlamentares Jozefina Topalli si dhe miratimi i programit të punës. Ndërkaq kthimi i opozitës në parlament duket se korrespondon me faktin se në nëntor Shqipëria pret opinionin e KE-së për 12 rekomandimet për marrjen e statusit të kandidatit, që përkthehen në një sërë reformash të rëndësishme për integrimin e vendit. a.y/NOA
