Korçë, 8 shtator 2011, NOA – Një 17-vjeçar është arrestuar dhe dy adoleshentë po ndiqen penalisht në gjendje të lirë për disa vjedhje të kryera në qytetin e Korçës. Operacioni i policisë për ndalimin e tre grabitësve u finalizua në orën 02.00 pas mesnatës, me arrestimin e 17-vjeçarit me iniciale D.K banues në Korçë. Blutë e Korçës po ndjekin ndërkaq në gjendje të lirë për shkak të moshës së tyre dy adoleshentët e tjerë 14-vjeçarët me iniciale T.C dhe K.T, që të dy banues në Korçë. Të tre këta shtetas në bashkëpunim me njëri-tjetrin kanë kryer vjedhjet e mëposhtme: 1 - Vjedhjen e lokalit të shtetasit N. Zoto, në lagjen nr. 1 të qytetit të Korçës, e ndodhur në datën 07.07.2011. 2 – Vjedhjen e lokalit “Omega” në dt. 13.06.2011 në lagjen 12 të Korçës, vjedhje e padenoncuar në polici. 3 – Vjedhjen e dyqanit “Kozmetikë” në dt. 08.06.2011 në lagjen 11 të qytetit, vjedhje edhe kjo e padenoncuar. 4 – Vjedhjen e një varëse floliri nga qafa e shtetases J.P 7 vjeçe, ndodhur në dt. 23.04.2011 në lagjen 18 të qytetit. Të tre personat akuzohen për vjedhje në bashkëpunim. mit/NOA
