Përmet, 28 shtator 2011, NOA – Dy persona kanë rënë në prangat e policisë së Tepelenës teksa po vidhnin bateritë e makinave të firmës Albanera Sh.P.K në qytetin e Përmetit. 33-vjeçari Ylli Done, lindur dhe banues në fshatin Peshtan të rrethit Tepelenë dhe 22-vjeçari Elis Cani, lindur dhe banues në fshatin Mezhgoran të rrethit Tepelenë janë dy personat e kapur në flagrancë. Policia bën me dije se Done dhe Cani mbrëmë rreth orës 00.30 të natës kanë shkuar në vendin e quajtur Kodra e Çomes në fshatin Mbrezhdan të rrethit Përmet, në afërsi të Këlcyrës, ku ishin të parkuar mjetet e rënda të firmës Albanera SH.P.K, e cila nxjerr dhe përpunon pllaka e guri dhe po vidhnin në automjetet e saj. Dy personat në fjalë thyen dhe shqyen serbatorët e dy eskavatorëve ku grabitën dy bateri dhe rreth 200 litra naftë. Por, dy grabitësit dolën zbuluar në momentin e fundit nga policia që i kishte futur në grackë. Sipas policisë ata kishin vjedhur edhe bateritë dhe naftën e katër mjeteve të tjera të rënda. Policia sekuestroi në cilësinë e provës materiale 6 bateri makinash, një automjet dhe një sasi të konsiderueshme nafte. mit/NOA
