Tiranë, 3 tetor 2011, NOA - Aleanca Kuq e Zi i bën thirrje Kuvendit të Shqipërisë të mbledhë menjëherë Komisionin për Politikën e Jashtme që të hetojë në mënyrë trasnpsarente marrëveshjen e qeverisë me diplomacinë serbe për ndryshimin e abetares. Në një deklaratë zyrtare këtë të hënë, Aleanca Kuq e Zi shprehet se i bashkohet revoltës së qindra shqiptarëve dhe intelektualëve në Preshevë të cilët refuzojnë dhunimin e abetares shqiptare nëpërmjetë heqjes së simboleve kombëtare shqiptare. “Aleanca Kuq e Zi prej muajsh i ka bërë thirrje qeverisë shqiptare që të unifikojë abetaren kudo që jetojnë shqiptarë, e nderkohë qeveria shqiptare bën të kundertën, bën pazar me diplomacinë serbe për ndryshimin e teksteve shkollore duke plotësuar në këtë formë kërkesat e ministrisë së arsimit dhe shkencës së Serbisë. Aleanca Kuq e Zi proteston ashpër duke e konsideruar një incident dhe skandal diplomatik në dëm të integritetit, identiteti dhe simboleve tona kombëtare. Për këto arsye Aleanca Kuq e Zi i bën thirrje Kuvendit të Shqipërisë me përparësi të mbledhë Komisionin për Politikat e Jashtme dhe të shqyrtojë këtë skandal që cënon simbolet kombëtare të Shqipërisë dhe shqiptarëve”, thuhet në qëndrimin zyrtar të AK. a.q/NOA
