Shkup, 11 tetor 2011, NOA - Partitë e koalicionit qeveritar në Maqedoni arritën sot marrëveshje që të ndërpritet regjistrimi i popullsisë. Sipas agjencisë maqedonase të lajmeve, INA, në një takim të zhvilluar midis krerëve të VMRO-DPMNE dhe BDI është vendosur për ndërprerjen e regjistrimit, për shkak të problemeve organizative dhe interpretimeve kontradiktore të Ligjit për regjistrim. Qeveria pritet me urgjencë që t’i çojë Parlamentit propozimin për sjelljen e Ligjit për ndërprerjen e regjistrimit të popullsisë, ndërsa paralajmërohet caktimi i një date të re për të nisur ky proces nga fillimi. Jozyrtarisht siç mëson agjencia e lajmeve INA, partnerët e koalicionit kanë rënë dakord që të mos njihen rezultatet e deritanishme të grumbulluara gjatë këtij operacionit të regjistrimit të nisur nga 1 tetori i këtij viti. Mediat qeveritare maqedonase kanë spekuluar se ndërprerja ka ndodhur pasi që me këtë regjistrim do të vihej në pikëpyetje përqindja e shqiptarëve në Maqedoni, e cila sipas regjistrimit të fundit të vitit 2002, ka qenë 25, 7 për qind. Por, kjo është përjashtuar nga BDI, zyrtarët e së cilës kanë pohuar se ka pasur manipulime të ndryshme që kanë pasuar nga regjistruesit maqedonas. a.q/NOA
