Prishtinë, 13 tetor 2011, NOA- Kryeministri i Kosovës Hashim Thaçi gjatë mbledhjes së qeverisë u shpreh se hapja e dialogut për liberalizimin e vizave, është sukses i shtetit të ri të Kosovës, dhe meritë e institucioneve dhe e vizionit evropian për ndërtimin e Kosovës së re, demokratike dhe evropiane. Ai theksoi se, Qeveria është e vendosur të vazhdojë edhe më fuqimisht përmbushjen në një afat rekord të gjitha parakushteve në kuadër të procesit të liberalizimit të vizave. Lidhur me Raport Progresin e vitit 2011, Thaçi tha se ai shënon një moment të ri për intensifikimin e reformave strukturore drejt Bashkimit Europian. Ndërkaq ai u zotua që deri në fund të këtij viti, Qeveria do të miratojë planin e rishikuar të veprimit për Partneritet Evropian. Kryeministri Thaçi tha se, në bazë të nevojës për ndërtimin e konsensusit të gjerë politik e shoqëror, institucionet e Kosovës do të themelojnë Këshillin Kombëtar për Integrime Evropiane, me qëllim të hartimit të strategjisë afatgjatë për integrim të Republikës së Kosovës në Bashkimin Europian. Ndër të tjera, prioritet i Qeverisë, theksoi kryeministri Thaçi, do të mbetet sundimi i rendit dhe ligjit në tërë territorin e vendit tonë, në mënyrë që të ndërtohet Kosova europiane. a.y/NOA
Në foto: Kryeministri i Kosovës Hashim Thaçi
