Tiranë, 22 tetor 2011, NOA – Partia Socialiste ka përmbyllur në mbrëmje procesin e zgjedhjes së delegatëve që do të marrin pjesë në Kongresin e 5 nëntorit. Procesi i nisur në orën 08.00 të së shtunës në mbarë vendin duhej të përmbyllej në orën 16.00 sipas orarit të paralajmëruar, por pas kërkesës së disa njësive bashkiake për shkak të fluksit të lartë të pjesëmarrjes në votim, Komisioni Zgjedhor i Tiranës udhëzoi të gjitha njësitë bashkiake që të vazhdojnë procesin derisa të votojnë të gjithë anëtarët që paraqiten për të votuar. Kryetari i Partisë Socialiste, i cili hodhi votën e tij në vendvotimin e ngritur në njësinë nr.2 në kryeqytet vlerësoi pjesëmarrjen e anëtarëve të PS-së në votime duke bërë me dije se në procesin e përzgjedhjes së delegatëve të Kongresit morën pjesë edhe socialistë në emigracion. Sipas Ramës, PS gjatë procesit të zgjedhjeve po promovon edhe barazinë gjinore në forumet e larta të Partisë Socialiste. Nga zgjedhjet e sotme në PS do të zgjidhen rreth 880 delegatë të Kongresit, ndërsa pjesa tjetër nga 1500 delegatë gjithsej, përzgjidhen automatikisht. Ndër këta, hyjnë si delegatë të përzgjedhur automatikisht 64 deputetët socialistë, 384 kryetarët e organizatave socialiste, 225 kryebashkiakët e kryekomunarët socialistë. Sipas statutit të PS-së në të gjitha degët e PS-së brenda vendit do të zgjidhet 1 delegat për 100 anëtarë partie. mit/NOA
Në foton e parë: Kryetari i PS, Edi Rama gjatë votimit të delegatëve. Në foton e dytë: Kryesocialisti Edi Rama flet për gazetarët pas votimit. Në foton e tretë: Anastas Angjeli gjatë votimit të delegatëve të Kongresit
