Shkup, 26 tetor 2011, NOA- Eurokomisioneri për zgjerim, Stefan Fyle është duke përgatitur përgjigjet për të gjitha letrat e pranuar nga institucione dhe asociacione të ndryshme nga Maqedonia.
Një numër i madh i asociacioneve joqeveritare, kulturore, arsimore dhe sportive i kanë shkruar letra eurokomisionerit Fyle, ku është shprehur shqetësimi dhe reagimi i tyre lidhur me raportin e progresit të KE-së, i cili nuk ka përfshirë mbiemrin “maqedonas”. Reagimet ishin se me mospërdorimin e emërtimit “maqedonas”, KE ofendon dhe diskriminon identitetin dhe vlerat trashëgimore të popullit maqedonas. Nga zyra e eurokomisionerit Fyle theksojnë se do të sqarohet sërish pozicioni i KE-së lidhur me këtë çështje, që sipas tyre edhe më parë është e sqaruar. Kjo çështje është komentuar dhe ka nxitur debate të brendshme politike në Maqedoni, derisa në Bruksel nuk ka pasur komente. Ndërkohë, reagimeve sot i është bashkëngjitur edhe Kisha Ortodokse e Maqedonisë (KOM) e cila ka shprehur reagimin e saj kundër eurokomisionerit Fyle, lidhur me mospërdorimin e mbiemrit “maqedonas”. Komisioni Europian u rreshtua kundër fakteve, duke mohuar trashëgiminë shekullore të popullit maqedonas.
(INA)/NOA
Në foto: Stefan Fyle
