Tiranë, 2 nëntor 2011, NOA - Bashkia e Tiranës po përgatit një projekt për të garantuar një mbrojtje ligjore për Parkun e Liqenit Artificial, duke i dhënë kësaj zone një status të ri.
Nënkryetari I Bashkisë së Tiranës, Edmond Panariti mbajti sot një takim për këtë çështje me ekspertë të njohur të fushës dhe përfaqësues të pushtetit qendror.
“Bashkia e Tiranës organizon sot këtë takim të zgjeruar konsultativ me grupet e interesit, për të garantuar mbrojtjen ligjore të Parkut të Liqenit Artificial dhe kjo bëhet nëpërmjet një statusi ligjor. Jam shumë i lumtur që në këtë takim janë të gjithë përfaqësuesit e grupeve të interesit, duke filluar që nga përfaqësues të pushtetit qendror, organizatat ambientaliste dhe përfaqësues të nderuar nga bota universitare dhe akademike”, u shpreh Panariti.
Në takim u ra dakort që, Parkut të Liqenit t’i jepet statusi i Parkut Natyror Rajonal, dhe për këtë u vendos që të nisin procedurat ligjore dhe administrative.
Me dhënien e këtij statusi, përcaktohen më saktë sipërfaqja dhe masat që do të merren për investimin dhe mirëmbajtjen e parkut. Statusi i Parkut Rajonal, krijon bazat për ruajtjen e ekosistemit nga ndotjet dhe ndërhyrjet abuzive si dhe ndihmon në zhvillimin e mëtejshëm të biodiversitetit në gjithë hapësirën. Propozimi, pritet t’i kalojë për miratim Këshilli të Ministrave.
a.q/NOA
