Prishtinë, 2 nëntor 2011, NOA - Deputetja e Parlamentit Evropian, Doris Pack ka kritikuar vendet e BE-së duke theksuar se ato kanë dështuar në zgjidhjen e çështjes së Kosovës.
Eurodeputetja gjatë vizitës në Kosovë theksoi se “NATO e bëri punën e saj në Kosovë duke e çliruar vendin, por pastaj dështuan ndërkombëtarët, duke lënë pas dore çështjen e pavarësisë së Kosovës”.
Pack tha se serbët nuk binden ta pranojnë pavarësinë e Kosovës, dhe sipas saj, këtë e tregojnë shembujt e fundit në veri të Kosovës.
Zonja Pack kritikoi BE-në se nuk ka bërë sa duhet për të ndikuar në pesë vendet anëtare, që kanë mbetur pa e njohur Kosovën.
“Ne kemi bërë disa gabime. Kur them ne, nuk mendoj për veten, por disa prej nesh. Mund ta përmendim emrin e Baroneshës Ashton, e cila si Shefe e Politikës së Jashtme nuk ka bërë sa duhet, që të ndikojë tek vendet. Është e pakuptueshme, që pesë vendet anëtare nuk kanë lëvizur më herët drejt njohjes” u shpreh Pack.
Ajo ka ndarë mendimet e saj për raportet e Kosovës me BE-në në forumin e Shkollës Politike, pjesë e Institutit të Prishtinës për Studime Politike, PIPS.
Eurodeputetja, ka inkurajuar të rinjtë të punojnë në ndërtimin e një shteti funksional, në luftën kundër korrupsionit dhe krimit të organizuar.
Gjatë forumit, eurodeputetja ka lavdëruar performancën e Presidentes së Kosovës, Atifete Jahjaga në sytë e ndërkombëtare.
Rtk/NOA
