Tiranë, 5 nëntor 2011, NOA - Deputetët demokratë, anëtarë të Komisionit për Çështjet Ligjore, Administratën Publike dhe të Drejtat e Njeriut, i kërkojnë kreut të shtetit që në propozimet që bënë për krerët e institucioneve të respektojë Kushtetutën. Deklarata vjen pas rrëzimit dy dekreteve të Presidentit në seancën e ditës së enjte. Më poshtë deklarata e plotë e deputetëve demokratë.
“Deputetet demokratë të Komisionit Parlamentar të ligjeve i kërkojnë Presidentit, që çdo propozim që kërkon miratimin e Kuvendit, duhet ta bëjë në përputhje me Kushtetutën e vendit dhe vendimet e Gjykatës Kushtetuese.
Pardje, për herë të parë në historinë e Parlamentit shqiptar, që nga viti ’91, një dekret në Kuvendin e Shqipërisë mori vetëm një votë.
Ky ishte votimi për kandidatin për kryetar të Kontrollit të lartë të Shtetit, të dekretuar nga Presidenti i Republikës.
Ky ishte propozimi i Presidentit të Republikës, në kundërshtim të hapur me Kushtetutën dhe jurisprudencën e Gjykatës Kushtetuese.
Deputetët demokrat të Komisionit të ligjeve, duke respektuar Presidentin e Republikës, i kërkojnë atij që, çdo propozim që kërkon miratimin e Kuvendit, duhet ta bëjë në përputhje me Kushtetutën e vendit dhe vendimet e Gjykatës Kushtetuese, në mënyrë që të respektohet funksionimi i institucioneve kushtetuese të vendit”.
a.k/NOA
