Tiranë, 10 nëntor 2011, NOA – “Demokratizimi nuk është një proces i lehtë, veçanërisht për një vend si Shqipëria, që ka jetuar për disa breza në një regjim autokratik”, deklaroi sot ambasadori amerikan në Tiranë, Aleksandër Arvizu.
Gjatë konferencës me titull “Demokratizimi i mëtejshëm i rajonit si kriter për paqe dhe stabilitet në Ballkanin Perëndimor”, zoti Arvizu theksoi se e shkuara nuk duhet përdorur si justifikim për dështimet e sotme të politikës shqiptare.
“E shkuara mund të ndikojë në disa prej sfidave, që Shqipërisë i duhet të kapërcejë për të paraqitur një kulturë më demokratike, por e shkuara nuk mund të përdoret më, si një justifikim për dështimet e Shqipërisë në zbatimin e proceseve demokratike dhe në ecjen e saj përpara”, deklaroi ambasadori i SHBA-së.
Diplomati amerikan nënvizoi se integrimi në familjen evropiane është një përgjegjësi kolektive dhe do të jetë përfitim i përbashkët, andaj ai inkurajoi politikën shqiptare të bashkëpunojë dhe të dialogojë në mënyrë konstruktive për të vënë në jetë reformat për demokratizimin e mëtejshëm të vendit.
mit/NOA
