Gjakovë, 14 Nëntor 2011 NOA - Ambasadori i ambasadës së Francës në Republikën e Kosovës, Jean François Fitou do të qëndrojë të martën më 15 nëntor në Gjakovë ku për herë të parë do të përballet në një debat direkt me qytetarët, raporton agjencia e lajmeve NOAKosova.al.
Burime zyrtare nga Komuna e Gjakovës konfirmuan se ambasadori Fitou do të vijë nesër dhe do të pritet nga kryetari i komunës, Pal Lekaj.
Pas këtij takimi, në ora 16.00, në sallën e Kuvendit Komunal do të mbahet një debat me qytetarët për çështje të hapura.
Mësohet se temat e nxehta të debatit me pyetje-përgjigje për ambasadorin e një prej vendeve më kryesore të Unionit Evropian pritet të jenë ato që lidhen me riatdhesimin e shqiptarëve të Kosovës nga vendet e Unionit, liberalizimi i vizave dhe kërkesat e shumta për azil që shqiptarët e Kosovës dhe shqiptarët matanë kufirit, kanë bërë në vendet e Unionit për të fituar azil politik.
Investimet evropiane dhe konkretisht ato franceze por edhe çështja e Mitrovicës si dhe qëndrimi francez dhe në tërësi ai i Brukselit për të ardhmen e dialogut me Beogradin, do të jenë temat e tjera të hapura në debatin me qytetarë.
a.b/NOA
