Përfaqësuesit e Kuvendit Civil, i krijuar disa muaj më parë kanë zhvilluar sot mbledhjen e senatit duke deklaruar se janë partia më e re për Shqipërinë e së ardhmes.
Gjatë takimit me dyer të hapura, Kryetari i “Kuvendit Civil”, Dritan Broka tha se “Kuvendi Civil ” si forcë politike do të jetë barrierë për ligjet dhe vendimet anti-shqiptare që shkojnë ndesh me interesat e qytetarëve shqiptarë.
“Partia më e re do të jetë pranë çdo shqiptari, sepse këtë nisëm e ndërmarrim me dëshirë dhe vullnet të plotë duke qenë të ndërgjegjshëm për problemet e shumta, që ka sot ky vend, në këtë mënyrë e vetmja mundësi është krijimi i kësaj force politike e përbërë nga rinia dhe mentaliteti i ri, e cila mund ta çojë vendin përpara, sepse rinia është ajo që sjell ndryshime”, tha Broka.
Disa nga objektivat afatshkurtra të kësaj force politike janë qëndrimi pranë çdo shqiptari në nevojë, barriera ndaj importit të plehrave apo ligjeve anti-shqiptare, ndalimi i cënimit të kufijve detar dhe territorialë të vendit, ndikimi në mirëqeverisje etj.
Një tjetër objektiv i“Kuvendit Civil” është pjesëmarrja në zgjedhjet e vitit 2013.
mit/NOA
