Tiranë, 14 nëntor 2011, NOA – Pas afro dy vitesh mosmarrëveshje politike mes mazhorancës dhe opozitës, që mbajtën në ngërç politik dialogun konstruktiv për reformat integruese të vendit të dyja palët kanë rënë dakord për nisjen e reformave, raporton agjencia NOA.al.
Krerët e grupeve parlamentare të mazhorancës dhe opozitës të mbledhur në Konferencën e Kryetarëve pranë Kryesisë së Kuvendit ranë dakord për ngritjen e Komisionit parlamentar për reformën zgjedhore.
Në mbyllje të konferencës, kreu i grupit socialist Gramoz Ruçi deklaroi për mediat se “miratuam me konsensus ngritjen e komisionit për reformën zgjedhore, reformën parlamentare dhe një axhendë diskutimesh për një pjesë të projektligjeve që kërkojnë 3/5 e votave”.
Konsensusi në mesditë u arrit pas negociatave të disa ditëve më parë të përfaqësuesve të opozitës dhe mazhorancës për arritjen e një pakti për reformën zgjedhore.
Po ashtu palët kanë miratuar edhe draftin e opozitës duke vendosur edhe për ngritjen e një komisioni ad-hoc për shqyrtimin e ligjeve që kërkojnë 3/5 e votave.
Kryetarët e grupeve parlamentare pritet të deklarojnë njëri pas tjetrit atë çka arritën në mbledhjen e sotme me dyer të mbyllura.
mit/NOA
