Tiranë, 16 nëntor 2011, NOA- Presidenti i vendit Bamir Topi i pranishëm mbrëmjen e sotmen në takimin e “Ditës Ndërkombëtare të Tolerancës” ku merrnin pjesë diplomatë, drejtues të bashkësive fetare, përfaqësues të shoqërisë civile, intelektualë, akademikë e studentë, i bëri thirrje politikës për më shumë tolerancë.
“Dita e sotme është një apel për të gjithë ata, për ta lexuar nevojën për dialog politik dhe institucional jo si një dhuratë apo lëshim, por si detyrim kushtetues e civil, si mjeti i vetëm për t’u shërbyer si duhet qytetarëve dhe shoqërisë. Një vend me probleme që kërkojnë zgjidhje, nuk ka kohë për të humbur me konflikte boshe politike, nominale apo ideologjike. Politika ka përgjegjësinë të mos lejojë asnjëherë të shndërrohet në faktor dominues mbi qytetarët dhe interesat e tyre, por të bashkëjetojë dhe të bëhet zëdhënëse e këtyre interesave”, u shpreh Topi.
Ai tha se nën modelin e Nënë Terezës, shqiptares që u bë simbol i humanizmit për gjithë botën, shqiptarët ofrojnë një mentalitet të lirë hapjeje dhe respekti për tjetrin, përfshirë vendet e rajonit, disa prej të cilave vetëm një dekadë më parë ishin të përfshira në luftëra nacionaliste, madje edhe kundër shqiptarëve.
a.y/NOA
