Tiranë, 20 nëntor 2011, NOA – Një aksident i rëndë ka ndodhur para disa minutash në qendër të kryeqytetit, në rrugën e Elbasanit, raporton agjencia e lajmeve NOA.al.
Dy makina janë përplasur keqas me njëra-tjetrën për shkak të shpejtësisë, me të cilën po ecnin duke plagosur tre persona, që udhëtonin në to.
Sipas të dhënave paraprake nga aksidenti i rëndë janë plagosur një djalë dhe dy vajza, njëra prej të cilave është në gjendje të rëndë.
Burime nga policia e Tiranës thanë se makinat e përplasura janë një BMW dhe një makinë Mini Cuper, e cila duket se ka pësuar edhe përplasjen më të rëndë gjatë aksidentit.
Deri më tani nuk bëhet ende i ditur identiteti i të plagosurve, ndërkohë që fatmirësisht nuk ka patur viktima.
Policia dhe punonjësit e Urgjencës së QSUT-së kanë mbërritur menjëherë në vendngjarje, duke transportuar të plagosurit në spital.
Në pak minuta zona e aksidentit mund të ishte kthyer në një tmerr edhe për makinat e tjera, duke qenë se në këtë orë kjo zonë është tejet e populluar.
mit/NOA
