Berlin, 1 Dhjetor 2011 - Pas dhunës së demonstruesve serbë kundër ushtarëve të NATO-s në Kosovë, afrimi i Serbisë me Bashkimin Evropian po bëhet gjithnjë e më i pasigurt.
Ministri i Jashtëm gjerman Guido Westerwelle sheh në sulmet e demonstruesve serbë në veri të Kosovës, një rrezik për dëshirën e Serbisë për t'u bërë kandidat anëtarësimi në BE.
"Incidentet që kemi parë në veri të Kosovës, me siguri do të jenë pjesë e konsultimeve dhe nuk e bëjnë aspak më të lehtë perspektivën evropiane të Serbisë, të cilën unë e mbështes.
Sulmet ndaj Kfor-it janë "një situatë shumë serioze (...)", deklaroi më tej ministri i Jashtëm gjerman Guido Westerwelle i cituar sot nga radio DW.
Edhe ministri i Jashtëm i Austrisë Michael Spindelegger kërkoi të enjten në Bruksel dënimin e autorëve të akteve të dhunës: "Ky është kusht për çdo hap tjetër përpara", tha Spindelegger.
Lidhur me datën e planifikuar për dhënien e statusit të kandidatit, ministri i Jashtëm austriak thotë: "Do të shohin, ne kemi rezerva tani pas këtyre ngjarjeve."
