Tiranë, 7 dhjetor 2011, NOA- Një 31 vjeçar me origjinë nga Semani i Fierit është ekstraduar nga Gjermaia drejt vendit tonë pasi mbi të rëndonte akuza e “Shfrytëzimit të prostitucionit në rrethana rënduese”.
Burime zyrtare nga policia thanë për agjencinë e lajmeve NOA.al se, i ekstraduari është Aleksandër Tiko dhe se ky i fundit ishte shpallur në kërkim ndërkombëtar pasi Gjykata e Fierit, 1 vit më parë kishte dhënë masën e arrestit me burg, për shfrytëzim prostitutash.
Mësohet se i ekstraduari Tiko akuzohet se ka shfrytëzuar për prostitucion, në vende të ndryshme të Europës, për 4 vjet nga viti 2005 në vitin 2009 shtetasen moldave N.P., 29 vjeç.
Si rezultat i bashkëpunimit të Interpol Tirana me Interpol Wiesbaden, u bë i mundur arrestimi i tij në fund të muajit tetor në Gjermani, me qëllim ekstradimi drejt vendit tonë.
a.y/NOA
