Ravena, 8 dhjetor 2011, NOA/ Arjola Ymeraj- Detyronin dy vajza nga Uruguai të moshës 25 dhe 26 vjeçare të prostituonin në rrugët e Bolonjas nën kërcënime dhe grushte të vazhdueshme e për këtë fakt tre djem shqiptarë përfunduan në prangat e policisë italiane.
Tre djemtë Orgest Shkurti 20 vjeç, Ervin Pengu 21 vjeç dhe Alfred Dema 20 vjeç u arrestuan në Ravena ku ishin transferuar së fundmi.
Siç informon agjencia e lajmeve NOA.al, tre të rinjtë ishin me precedent penalë, ndërsa tani u duhet të përballen me akuzat për shfrytëzim prostitutash, mbajtje pa leje e armëve, sekuestrim personi, dhe trafikim i lëndëve narkotike.
Shkak për kapjen e tyre u bë denoncimi disa muaj më parë i njërës prej viktimave, e cila kishte thënë se tutorët e saj i kërcënonin dhe rrihnin në mënyrë të vazhdueshme dhe nëse ato kundërshtonin të dilnin në rrugë, dhuna përsëritej sërish.
Dy prej vajzave kishin arritur të arratiseshin nga Arezzo përmes ndihmës së disa të njohurve të tyre, ndërsa tani janë në pritje të marrjes së lejes së qëndrimit.
Mësohet se pranverën e shkuar, gjatë një tentative për tu larguar njëra nga vajzat, u arrestua një tjetër shqiptar që ndiqte këtë të fundit.
Pas arrestimit të tre të rinjve, policia gjeti në banesën e tyre në Ravena rreth 13 mijë euro, disa telefona celularë dhe një aparat përgjues.
a.y/NOA
