Prishtinë, 9 dhjetor 2011, NOA- Lëvizja Vetëvendosje nëpërmjet një komunikate zyrtare e ka cilësuar të drejtë vendimin e Gjykatës Kushtetuese për shqyrtimin e neneve në ligjin "Për të drejtat dhe përgjegjësitë e deputetit", të pezulluara nga kjo gjykatë.
Siç informon agjencia e lajmeve NOA.al, disa nga nenet që kanë të bëjnë me privilegjet e deputetëve nuk përkojnë me gjendjen ekonomike e sociale në vend madje edhe janë antikushtetuese.
Sipas Vetëvendosjes thuhet se nenet që kanë të bëjnë me pensionin suplementar janë:
Deputeti me 1 mandat merr 50 % të pagës së deputetit
Deputeti me 2 mandate merr 60% të pagës së deputetit
Deputeti me tri mandate merr 70% të pagës së deputetit
Sipas kësaj lëvizje shqetësim mbetet edhe mosha e pensionit të deputetit pasi në asnjë shtet të Bashkimit Europian dhe shumicën e vendeve të rajonit deputetët nuk gëzojnë pension suplementar para moshës 55 vjeçare.
Vetëvendosje thekson se, vendimi i 8 dhjetorit i Gjykatës Kushtetuese që i shfuqizoi pikërisht pikat e këtyre “dispozitave speciale” është për t’u përshëndetur së pari për pamundësimin e teprive të radhës në shpërdorim të fondeve publike, së dyti si hap drejt vendosjes së drejtësisë sociale ndërmjet grupeve shoqërore, kontributi i të cilëve është po aq i vlefshëm sa i deputetëve, së treti për vendosjen e precedentit që lidhet me përputhshmërinë e ligjeve në vend.
a.y/NOA
