Sarandë, 11 dhjetor 2011, NOA/ Irma Toptani - Pas Tepelenës, Kryetari i Partisë Socialiste, Edi Rama ishte në qytetin e Sarandës ku promovoi librin e tij “Kurbani”, raporton agjencia e lajmeve NOA.al.
Duke marrë shkas nga situata e ndërtimeve në qytetin bregdetar, lideri i opozitës akuzoi qeverinë se po favorizon ndërtuesit për të shkatërruar Sarandën.
Rama u ndal tek ndërtimet pa kriter, që sipas tij kanë shpërfytyruar qytetin bregdetar.
Sipas tij, përgjegjëse për këtë masakër urbane është qeveria e drejtuar nga kryeministri Sali Berisha dhe interesat e pushtetit të lidhura me të.
Nga salla konferencave të hotel “Butrintit” Rama deklaroi se Shqipëria po vuan vizionin e mbrapshtë të zhvillimit kaotik, që lidhet me qeverisjen pa strategji të koalicionit Berisha-Meta.
Kryetari i Partisë Socialiste komentoi dhe deklaratat më të fundit të kreut të LSI-së, Ilir Meta lidhur me librin “Kurban”.
Duke iu referuar qëndrimit të Metës se ai nuk mund të lexojë kujtimet e paqëndrueshme të Edi Ramës, lideri socialist tha se Meta nuk lexon libra.
Ndërsa foli edhe për komentet e kryeministrit Berisha mbi librin, duke theksuar se pavarësisht deklaratave të tij se nuk e ka lexuar librin “Kurban”, Rama tha se Berisha e ka lexuar atë.
mit/NOA
