Prishtinë, 12 Dhjetor 2011 - Aleanca për Ardhmërinë e Kosovës thotë se ajo është në pritje të vendimit të prokurorisë së Tribunalit të Hagës, rreth lirimit të përkohshëm të liderit të partisë, Ramush Haradinaj.
Zëdhënësi i AAK-së, Ernest Luma, i tha sot radios Evropa e Lirë se, deri më tani, nuk ka asgjë të re lidhur me kërkesën e mbrojtjes së Haradinajt.
“Deri në këto momente nuk kemi marrë asnjë informatë zyrtare me të cilën do të konfirmohej lirimi i përkohshëm i zotit Haradinaj, por jemi në pritje edhe ne si parti, por edhe pala mbrojtëse”, tha Luma.
Rigjykimi i pjesshëm i ish-komandantëve të Ushtrisë Çlirimtare të Kosovës, Ramush Haradinajt, Lah Brahimajt dhe Idriz Balajt nisi në muajin gusht të këtij viti.
Tre të akuzuarit ishin liruar më 3 prill të vitit 2008 nga Tribunali, nga akuzat për krime kundër njerëzimit, ndërsa rigjykimi i pjesshëm thuhet se nisi për shkak të paraqitjes së dëshmive shtesë në procesin kundër tyre.
