Kosovë, 15 dhjetor 2011, NOA - Komisioni Evropian ka arritur një marrëveshje me qeverinë e Rusisë për të siguruar depërtimin e konvojit me ndihma humanitare nga Rusia, ndihma këto të cilat u dedikohen serbëve të Kosovës.
Lajmin e ka konfirmuar për agjencinë serbe të lajmeve Beta, Maja Kocijaçiç, e cila nuk ka dhënë ndonjë hollësi se për çfarë marrëveshjeje bëhet fjalë saktësisht.
Sipas saj, KE është në kontakt me të gjitha palët e përfshira, me qëllimin që marrëveshja e arritur të zbatohet. Konvoji i përbërë nga 27 kamionë, për të tretën ditë me radhë është duke qëndruar në vendkalimin kufitar në Jarinë dhe është shndërruar në çështje debatesh politike.
Misioni i BE-së për sundimin e ligjit në Kosovë, EULEX, ka ofruar dy opsione para autoriteteve ruse; opsioni i parë ka të bëjë me përcjelljen e policisë kur bëhet fjalë për një konvoj kaq të madh ndihmash dhe opsioni i dytë është shfrytëzimi i vendkalimit kufitar në Merdare.
Të dyja mundësitë, janë hedhur poshtë nga ambasadori rus në Beograd, Aleksandër Konuzin, i cili ka akuzuar EULEX-in për njëanshmëri.
NOA/RFE
