Tiranë, 16 dhjetor 2011, NOA/ Arjola Ymeraj- Në një dalje për mediat pak çaste më parë pas përfundimit të mbledhjes së Kryesisë së re, kryesocialisti Edi Rama u shpreh mjaft i kënaqur prej saj.
Siç informon agjencia e lajmeve NOA.al, Rama theksoi, ishte një mbledhje konsultative e Kryesisë së re, prej së cilës u shpreh jashtëzakonisht i kënaqur, pasi kjo mbledhje tha ai krijoi bindjen për zgjedhjen e drejtë nga Asambleja Kombëtare dhe se konfirmoi garancinë e tyre për të punuar në fitoren e radhës.
Më tej shefi i opozitës iu përgjigj deklaratave të Kryeministrit Berisha pas takimit me studentët nga Kosova duke thënë se, “E kam sfiduar dhe e risfidoj sërish Saliun, që të provoj me një dokument të vetëm që unë apo cilido nga eksponentë e PS-së të jetë shprehur kundër Rrugës së Kombit si projekt. Ndërkohë i them turp, turp, turp, që me Rrugën e Kombit ka grabitur të ardhurat e taksapaguesve shqiptar”.
Sakaq Rama tha se është informuar edhe me prononcimet e partive të vogla për Reformën Zgjedhore dhe në këtë linjë përsëriti vullnetin e Partisë Socialiste për tu dëgjuar dhe dakordësuar me të gjitha partitë e vogla për ndryshimin e sistemit zgjedhor.
a.y/NOA
