Tiranë, 22 dhjetor 2011, NOA – Miratimin me konsensus nga Kuvendi të kandidaturës së Igli Totozanit në postin e Avokatit të Popullit e përshëndeti edhe Kryetari i Prezencës së OSBE-së në Shqipëri, Ambasadori Eugen Wollfarth, raporton agjencia e lajmeve NOA.al.
“Ky është një hap madhor përpara në mbrojtjen e të drejtave dhe lirive të qytetarëve shqiptarë, të cilët do të keni tashmë mbështetje më të fortë në përballjen me veprimet e parregullta të administratës zgjedhore”, tha Wollfarth, në një deklaratë për shtyp.
Ambasadori i OSBE-së ka bërë thirrje për plotësimin e vendit bosh të Avokatit të Popullit, që prej fillimit të punës së tij në Shqipëri, në vitin 2010, andaj ai u shpreh pas zgjedhjes së Avokatit të Popullit se “Është për t’u përgëzuar që shumica qeverisëse dhe opozita arritën një kompromis për këtë emërim të rëndësishëm”, shtoi ai.
“Votimi konsensual i sotëm tregon se si dialogu mes dy blloqeve kryesore politike mund të japë rezultate në dobi të popullit të Shqipërisë”, theksoi Wollfarth duke garantuar se Prezenca e OSBE-së mbetet e gatshme për të vijuar mbështetjen për Zyrën e Avokatit të Popullit.
Kandidatura e Igli Totozanit u votua me votim të fshehtë në Parlament duke marrë 127 vota pro dhe 2 vota kundër.
Igli Totozani zë vendin bosh të lënë nga Avokati i mëparshëm i Popullit, Ermir Dobjani, mandati i të cilit përfundoi mëse një vit më parë.
mit/NOA
