Tiranë, 23 dhjetor 2011, NOA- Presidenti i vendit Bamir Topi priti sot në takim Avokatin e ri të Popullit i dalë nga radhët e socialistëve, Igli Totozanin.
Siç informon agjencia e lajmeve NOA.al, Presidenti e përgëzoi Totozanin për detyrën e re dhe i uroi suksese në detyrën e tij për mbrojtjen e interesave të qytetarëve.
Presidenti Topi u shpreh edhe pse Avokati i Popullit është një institucion relativisht i ri në vendin tonë, ai ka krijuar tashmë fizionominë e vet të konsoliduar duke përfituar dhe shkëmbyer përvojë të vyer e pozitive edhe me institucione homologe perëndimore.
Nga ana e tij, Avokati i Popullit e siguroi Kreun e Shtetit se do të punojë me përkushtim, ndjenjë të lartë përgjegjësie dhe transparencë për të mbrojtur të drejtat e njeriut duke u fokusuar në pavarësinë e institucionit që do të drejtojë dhe bashkëpunimin me institucionet e tjera.
Avokati i ri i Popullit, Igli Totozani u zgjodh ditën e djeshme nga Parlamenti me një shumicë votash të mazhorancës dhe opozitës.
a.y/NOA
