Tiranë, 24 Dhjetor 2011 NOA/ Rid Bulku – Ndryshimet kushtetuese Berisha-Rama që u bënë një vit pasi Bamir Topi u zgjodh President i Republikës, ishin ato që sollën përplasjen dhe ftohjen e pakthyeshme mes Topit dhe Berishës.
Pohimi është bërë nga kryetari i shtetit në një intervistë me gazetaren Ilva Tare në Tv Ora News. Në bisedën me drejtuesen e emisionit “Tonight”, z.Topi tha se këto ndryshime kushtetuese e nxorën jashtë loje atë si President. Kurse thotë se nuk e harron kollaj sherrin që ka me kryeministrin duke paralajmëruar se mes tyre nuk ka për të ndodhur pajtimi si rasti i Berishës me Nanon.
Ja pjesa e intervistës që flet për këtë argument:
Pas sulmeve direkt ndaj jush si pjesëtar celulash, horr bulevardi, etj., a mund të pajtoheni më me Berishën? Le të themi që ai është pajtuar me Nanon, për të cilin çfarë nuk ka thënë...
Nuk jam njeri që kam një mbiemër tjetër apo se kam më shumë se një mbiemër. Unë po përdor artin e perifrazimit të gjërave. E përdora si mënyrë të shprehuri për të treguar se kam individualitetin tim. Unë kam memorien e fortë dhe nuk harrohet kollaj. Edhe në një bisedë tek e tek, jashtë publikut, jashtë kamerave, njeriu duhet të bëjë kujdes. Gjuha kocka s’ka e kocka thyen. Ka 77 lloje muskujsh që përbëjnë gjuhën. Struktura përcakton funksionin. Gjuha komandohet nga truri dhe në rast se arsyeja nuk është arsyeja dhe del me përcaktime shumë agresive, sigurisht që nuk harrohen. Këtu nuk bëhet fjalë për refleksion. Është refleksion institucional dhe të tjerët të gjykojnë mbi bazën e kësaj që po them.
Nuk shihni pajtim?
Është çështje refleksioni personal dhe institucional. Nuk mund të hyjmë në detajet e një komunikimi që më takojnë vetëm mua.
Më poshtë vijon intervista e plotë e zbardhur:
Zoti Topi, përse nuk hytë në qeveri në vitin 2005, por preferuat postin e kryetarit të grupit parlamentar të PD-së?
Me sa duket në distancë kohore, qëllimi në politikë nuk është marrja e një karrige. Kam pasur oferta. Por kam preferuar të drejtoj grupin parlamentar të PD-së, atëherë në opozitë dhe kur vjen në pushtet shoqërohet me një post.
E kishit në kokë atëherë Presidentin?
Jo. Ma kanë propozuar. Fillimisht njeriu duhet të konsultohet me vetveten, pastaj me rrethin e ngushtë, familja dhe më pas kur e pranon ofertën, duhet të jesh në kohezion me atë që të është kërkuar. Ka qenë vetëm një ofertë dhe më është bërë vetë nga kryetari i PD-së, Sali Berisha. Një vendimmarrje e tillë kërkonte sigurisht një kohë pas të cilës unë vendosa se do ta pranoja.
Berisha e quajti të Premten e bardhë zgjedhjen tuaj në krye të shtetit. Vazhdon të jetë një e premte e bardhë?
Gjithmonë i kam quajtur të premtet të bardha pavarësisht se mund të ketë dhe të premte të zeza. Unë i kam të gjitha ditët e bardha.
Ku ishte pika e thyerjes me PD-në, me Topallin dhe Berishën?
Kam pasur një komunikim institucional vazhdimisht dhe asnjëherë nuk kam mundur të gjej se ku është pika e thyerjes. Por mesa duket momenti i ndryshimeve kushtetuese në 2008, ishte momenti kur filloi një ftohje, kur mazhoranca dhe opozita iu futën një ndryshimi në Kushtetutë pa u konsultuar me Presidentin. Ishte e drejta e tyre, por besoj se nuk ishte reagimi personal, por si interpret i Kushtetutës, pa u bërë publik, pa pasur
mundësinë për të ushtruar një debat që erdhi dhe u realizua brenda një nate. Kjo solli sfumim të kompetencave të Presidentit dhe kundërfirmosjes së dekreteve të Presidentit. Kjo sigurisht sjell një lloj reagimi, ftohje.
Ju vjen keq që PD-ja që ju keni kontribuar ju ka sulmuar?
Sigurisht që ka keqardhje por secili shfaqet para publik dhe në debate të tilla kaq të rëndësishme që nuk do t’i konsideroja personale, aktorët politikë duhet të kenë mësuar se vendi ka nevojë që të rregulloje etikën e komunikimit. Kjo nuk do të thotë që ky vend nuk mund të bëhet me qytetari.
Pas një ngërçi të gjatë, PD-ja dhe PS-ja kanë arritur konsensusin. Cili është sugjerimi juaj për sistemi zgjedhor?
Natyrisht kam një mori sugjerimesh për sisteme zgjedhore. Kur isha në politikë e kisha këtë akses. Në këtë pozicion nuk më lejohet që të jap modele pasi nuk dua të jem pikë reference për palët. U takon atyre që të vendosin. E rëndësishme është që është ngritur komisioni, por duhet ndërtimi në kohë i infrastrukturës. Çështja është se Shqipëria nuk ka pasur asnjë herë ligj të keq zgjedhor. Problemi është si është implementuar. Por besoj se palët do të jenë serioze në proces.
Pse ka munguar bashkëpunimi mes tre institucioneve, Presidencës, Kryeministrisë dhe Parlamentit?
Sigurisht duhet t’u kthehemi të gjithë klimës dhe deklaratave dhe nuk është përgjigje që mund të jepet në mënyrë të shpejtë dhe të thatë. Ju keni qenë pjesë e këtyre debateve dhe të gjitha ato ngjarje që kanë ardhur si pjesë e komunikimit, shpeshherë të ashpër, sigurisht që krijon mungesë të komunikimit. Gjithmonë kam qenë në atë pozicion që institucionet duhet të funksionojnë sepse duhet kuptuar qartë se kur vjen nga një parti politike, ndryshon jo vetëm filozofia, por edhe ushtrimi i detyrës pavarësisht se politika mund të shohë si trupë politike.
Ju jeni i pagabueshëm?
Pse ju mendoni se po të kisha diçka gabim nuk do ta thosha. Unë ju thashë momentin më të rëndësishme. Nëse emocionet politike dominojnë arsyen, nëse dikush nga grupi parlamentar që keni drejtuar vjen dhe hedh ide për të ndryshuar kompetencat e presidentit, i inspiruar nga vendimmarrje politike jo të hapura, por nëpër zyra; kur dëshiron ta bësh presidentin inferior ndaj vendimeve politike, atëherë ky është momenti. Diku ka një mungesë besimi, diku rrëzohen kandidatura që plotësojnë të gjitha kriteret ligjore, por rrëzohen për arsye politike.
I dini emrat e deputetëve të PD?
Vendimmarrjet politike pas ndryshimeve kushtetuese kanë ardhur duke u koncentruar në vendimmarrje individuale. Ndryshimet kushtetuese ndryshuan mënyrën e sjelljes. Ju keni parë që ligji mazhoritar kërkonte të ishe i kujdesshëm me një individ përfaqësues me reputacion pasi duhet të merrje vota drejtpërdrejt. Ligji proporcional i jep më shumë kompetenca kryetarit të partisë. Keni parë lista me preferenca të kryetarit të partisë. Secili dëshiron të ketë sukses, por kjo ka rritur frymën e autoritarizmit në parti dhe ka rritur inferioritetin ndaj elementëve të thjeshtë. Deputetët nuk janë më me zërin e fortë që kanë pasur dikur. Ju e shikoni që nëse një deputet del nga fryma e grupit, ai rrezikon të përjashtohet.
Po flisni për zotin Islami?
Po flas në parim, rastet mund t’i gjeni vetë. Por flas në bazë të atyre që kanë ndodhur.
Njerëz në Tiranë pretendojnë se kanë negociuar mes jush dhe Berishës para 21 janarit që të vendoseshit në listë për deputet ose të merrnit një post si ministër, por kjo u ndërpre pas 21 janarit?
Nuk është e vërtetë. Nuk kam marrë post ministri kur e kisha mundësinë ta merrja, mendoni tani... Cilido që hedh insinuata të tilla është totalisht i pabesueshëm. Unë i kam gjërat e hapura, nuk ka pasur negociata. Nuk kam frekuentuar kafenetë ku thuren biseda të tilla. Është fatkeqësia e tyre që i besojnë.
Në nëntor kur ishit bashkë me Berishën tek festa e Pavarësisë, u bënë negociata për një mandat tjetër?
Nuk është e vërtetë.
Nuk keni negociuar me Berishën?
Për asgjë!
Ku ndodheshit më 21 janar?
Ju duhet të sillni në konsideratë, unë edhe një natë përpara në takim me trupin diplomatik, duke parë klimën e acaruar politike, deklaratat mjaft ekstreme, kam bërë një thirrje publike për aktorët e politikës që të qetësojnë gjakrat. Ishte deklarata ime e parë që ka ardhur edhe në momentin e shpërthimit të protestës dhe sulmit që iu bë institucioneve. Presidenti ishte në pozicionin e tij kushtetues. Nëse palët politike nuk ishin në gjendje të
kontrollonin pozicionin e tyre, ata të japin përgjigje. Drejtësia po merret me këtë gjë sepse atë ditë kishte dhunë ndaj institucioneve dhe forcave të rendit, por kishte edhe të vrarë. Drejtësia po punon së bashku me partnerët ndërkombëtarë.
Ka një valë për të penguar hetimin e 21 janarit?
Këto gjëra janë thënë nga përfaqësuesi i prokurorisë. Nuk janë thënë kot, por edhe duhen plotësuar.
Pse nuk mblodhët Këshillin e Sigurisë Kombëtare në atë kohë, por edhe më pas?
Mendoj që Këshilli i Sigurisë mblidhet atëherë kur ka vullnet të anëtarëve për të ardhur dhe diskutuar. Ato ishin momente shumë të vështira dhe çdo aktor para se të vijë në tryezë duhet të ketë predispozitë qetësie dhe të gjithë vullnetitn për të biseduar, komunikuar. Kjo është bërë përmes ambasadorëve që gjërat të normalizoheshin. Në atë
kohë erdhën ndërmjetës të profilit të lartë nga Brukseli dhe Uashingtoni. Besoj se e mbani mend.
Kush janë ata që nuk donin të vinin?
Janë aktorët politikë. Në këshill ka aktorë politikë institucionalë. Ju e dini shumë mirë se kush janë.
Të përmendim emra, kryeministri Berisha për shembull?
Secili e kupton se kush është në Këshillin e Sigurisë, ka aktorë nga mazhoranca, ka aktorë nga opozita. Para se të ulesh në tryezë institucionale, duhet të kesh vullnet për të biseduar.
Pas sulmeve direkt ndaj jush si pjesëtar celulash, horr bulevardi, etj., a mund të pajtoheni më me Berishën? Le të themi që ai është pajtuar me Nanon, për të cilin çfarë nuk ka thënë...
Nuk jam njeri që kam një mbiemër tjetër apo se kam më shumë se një mbiemër. Unë po përdor artin e perifrazimit të gjërave. E përdora si mënyrë të shprehuri për të treguar se kam individualitetin tim. Unë kam memorien e fortë dhe nuk harrohet kollaj. Edhe në një bisedë tek e tek, jashtë publikut, jashtë kamerave, njeriu duhet të bëjë kujdes. Gjuha kocka s’ka e kocka thyen. Ka 77 lloje muskujsh që përbëjnë gjuhën. Struktura përcakton funksionin. Gjuha komandohet nga truri dhe në rast se arsyeja nuk është arsyeja dhe del me përcaktime shumë agresive, sigurisht që nuk harrohen. Këtu nuk bëhet fjalë për refleksion. Është refleksion institucional dhe të tjerët të gjykojnë mbi bazën e kësaj që po them.
Nuk shihni pajtim?
Është çështje refleksioni personal dhe institucional. Nuk mund të hyjmë në detajet e një komunikimi që më takojnë vetëm mua.
U akuzuat se reaguat shumë butë pas sulmeve?
E keni gabim. Mënyra se si është administruar ajo krizë mjaft e rëndë duhet vlerësuar në momentin e ruajtjes së qetësisë, ekuilibrit dhe dhënies së përgjigjeve në dozën e duhur. Nëse politika ka vepruar me doza të forta, nuk është licencë edhe për institucionet e tjera. Një institucion që është mbi palët nuk i ka forcat tek agresiviteti i shprehjes.
Keni thënë që në jetë dhe në politikë jeni mesfushor. Pse zgjodhët këtë pozicion, a nuk ka nevojë Shqipëria për një president me më shumë iniciativë?
Nuk bëhet fjalë për agresivitet. Më vjen keq që edhe njerëzit në media kërkojnë agresivitet. Kemi 20 vjet në demokraci dhe më vjen keq që në momente të caktuara preferohen debatet e ashpra dhe agresive, institucionet nuk e marrin forcën tek agresiviteti dhe ashpërsia.
Nuk menduat për një moment dorëheqjen pas sulmeve?
Ai do kishte qenë momenti më tragjik nëse Presidenti shkonte drejt dorëheqjes. Do ishte braktisje e institucionit,. Karriera politike mund të mbyllet në çdo çast, ndërsa Presidenti është institucioni që duhet të qëndrojë fort në ushtrim të detyrave kushtetuese. Ju i patë edhe në takimet që u zhvilluan mes mazhorancës dhe opozitës në Presidencë, të cilat dolën pa rezultat. Mund të ulesh në tavolinë, të kalosh orë të tëra, mund të bësh ndërmjetësin, por gjithçka varet nga ata që po diskutojnë dhe vullneti i tyre.
Si e shikoni korrupsionin në sistemin e drejtësisë?
Sot e kësaj dite është një proces i pambyllur. Mjaft çështje shkojnë në gjykatë ku palët gjithmonë mbeten të pakënaqura, por edhe momente korruptimi sipas fjalëve që dalin në proces. Unë i qëndroj atij parimi që sistemi i drejtësisë ka nevojë për reforma të thella që të arrihet te ajo që ju me të drejtë e thatë që të mos kemi elementë pandëshkueshmërie. Unë jam kryetar i KLD. Dua ta ndaj me ju se kryetari i KLD është i pari mes të barabartëve. Pra, unë operoj mbi bazën e KLD dhe KLD vepron mbi bazën e ligjit. Ministri bën prezantimin e të gjitha rasteve që ai mendon se janë shkelje të detyrës së gjyqtarit. Unë ju them se në të gjitha rastet që janë shqyrtuar, kanë marrë verdikt pozitiv për propozimet që kanë ardhur nga ministri. Është tjetër gjë, që nga hallkat
e gjyqësorit edhe pse KLD ka penalizuar, Gjykata e Lartë ka mbajtur qëndrim tjetër. Patjetër duke vlerësuar pavarësinë, ne kemi respektuar vendimin. Por e rëndësishme është që politika duhet të dijë të vazhdojë reformën në KLD.
Po gjyqtarët e Gjykatës së Lartë...
Ata futen në filtër në transparencë të plotë. Të gjithë ata që kanë kritere futen në filtër. Është kompetencë e dyfishtë që ndahet midis presidentit dhe parlamentit.
Flitet për pagesa për poste gjyqësore?
Janë akuza politike të pabaza. Presidenti vetëm propozon Të drejtën e vendimit final e ka parlamenti. Procesi është shumë transparent. Presidenti nuk emëron, por vetëm propozon.
E në rastin e Shkallës së parë....
Është mirë që e bëre. Presidenti siç është kryetar i KLD ka vetëm një votë. Çdo votë e KLD-së vjen ose nga parlamenti ose nga Konferenca Gjyqësore. Fiton ai që merr më shumë vota.
Po ju keni marrë lekë?
Ajo që si ka munguar presidentit është morali dhe serioziteti.
Ka akuza të rënda për amnistinë...
Unë gjykoj se fakti që ka gati një vit që Ministria e Drejtësisë nuk sjell në presidencë absolutisht asnjë propozim, ka të bëjë me detyrimin ligjor për t’i propozuar lirimin e të burgosurve. Gjithçka bëhet mbi bazën e një procesi shumë serioz. Mbi bazën e një filtri shumë serioz. Presidenti bën vetëm aktin e fundit, atë të shprehjes së vullnetit.
A do bëni amnisti këtë vit....
Kërkojani atyre që e kanë detyrim. Sipas ligjit ju them fare hapur se Presidenti nuk ka çfarë të bëjë se s’ka asnjë material në tavolinë. Ata që duhet ta sjellin janë përfaqësuesit e Ministrisë së Drejtësisë që kanë kaluar çdo lloj afati për të respektuar dhe për ta sjellë në tavolinë.
Çfarë ka ndodhur ndaj krimit. Kujtojmë vrasjen e gjyqtarit dhe institucionet e shtetit nuk kanë ende asnjë pistë?
Kjo është çështje që ka të bëjë me institucionet e specializuara.
Kjo ka emra konkretë?
Vjen me Policinë, me Prokurorinë. Janë këto institucione që duhet të thonë fjalën e tyre.
Thatë prokuroren. Ju e keni emëruar?
Unë e kam propozuar dhe është miratuar nga mazhoranca.
Po nota?
Unë ndonëse kam eksperiencë akademike, nuk jap nota në publik Çdo lloj institucioni duhet të rrisë nivelin. Ka nota pozitive, por edhe negative.
Gjyqi për Gërdecin, 21 Janari. Në publik është krijuar perceptimi se nuk dënohen peshqit e mëdhenj?
Ky është perceptim publik. Fakt është që çështja e Gërdecit vazhdon pafundësisht dhe kjo çështje vazhdon të zvarritet për arsye të ndryshme. Kohët e fundit rikonfirmohet mungesa e vullnetit të avokatëve. Është një moment negativ se proceset bëhen kronike. Njerëzit kërkojnë të marrin drejtësi në kohën e duhur. Se dhënia e drejtësisë në kohën e duhur, shmang situatat e përsëritjes.
Pas një muaji, kemi njëvjetorin e 21 janarit. A ishte grusht shteti?
Absurditet. Është një absurditet. Dhe fatmirësisht Shqipëria nuk është një vend i kufizuar ku mund të konsumohet një thënie që për mua është e papranueshme. Shqipëria është vend me partnerë dhe qëndrimi realit ndaj kësaj ngjarjeve e kanë dhënë partnerët tanë që nuk e cilësuan si të tillë. Vetëm një muaj më parë pata takimin me përfaqësues të PE, dëshiroj citoj, modestisht se falënderuan Presidentin, nuk ishte një zë, por ishin disa duke filluar nga Kukan për qëndrimin e presidentit për qëndrimin korrekt të mbajtur.
Ju si i patë ngjarjet?
Po futeni në disa ngjarje që i ka drejtësia. Edhe politikanit më të lartë, i takon të heshtë, të mos influencojë dhe besoj se drejtësia do e thotë fjalën e saj.
Ju shpesh keni thënë se duhet pasur besim te institucionet, te ligjet, por shpesh besimi s’ka qenë i justifikuar siç është ligji për ujërat me Greqinë. Negociata kanë filluar përsëri?
Unë s’kam asnjë informacion zyrtar që kanë filluar. Së dyti më lejoni t’ju them që nëse do të kishte kaluar ajo marrëveshje për të ardhur te Presidenti, ai ligj do të kthehej mbrapsht.
Nëse kanë filluar pa pyetur fuqinë e Presidentit, nëse do të vijë në Presidencë ai ligj do të kthehet mbrapsht?
Unë s’kam të drejtë ta paragjykoj se informacionet që dalin, jo gjithmonë janë të sakta.
Kanë dalë nga ministri?
Nëse do të negociohet për ujërat, kjo kërkon plotfuqishmëri nga Presidenti. Unë s’di të ketë filluar.
Ishte një aleancë me opozitën rrëzimi i ligjit për plehrat?
Çdo deklaratë është emocionale politike. Unë kam të drejtën time kushtetuese për ta kthyer në ligj nëse e gjej arsyen. Në kthimin e ligjit ka gjithmonë arsye kushtetuese. Unë konsultohem nga juristë shumë të mirë.
Pse ka disa vende ambasadorësh vakante?
Sepse është e drejta e presidentit për të ruajtur disa ekuilibra, që ka një ekuilibër midis njerëzve që janë të trupës diplomatike dhe të atyre që katapultohen politikisht.
Pra ju kanë ardhur propozime politike?
Unë s’kam propozime. Kam pasur propozim për ambasada të tjera, por për arsye të forta gjithmonë.
A mbani ditar?
Unë kam mënyrën time të memorizimit.
Do të kemi një libër?
Njeriu i bën kur vërtet tërhiqet përfundimisht.
Ju s’jeni tërhequr?
Ç’është kjo pyetje, hahhah.
Do ktheheni në politikë?
Njeriu nuk ka lindur për karrige dhe pozicione, nuk duhet të humbasë lidhjet me njerëzit.
Thuhet që do krijohet një partie e re e djathtë dhe kur ju të mbaroni mandatin presidencial do shkoni në një parti që do mbledhë votat e të pakënaqurve të djathtë PD dhe LSI. A do jeni ju pas saj?
Dua t’i kthehem momentit të djeshëm, isha i qartë në komunikim me gazetarët. E kam bërë atë deklaratë sepse jam i bindur që pas një viti do jetë dikush tjetër në atë pozicion. Kam qenë inkurajues i rotacioneve, në një vend si Shqipëria ku ende jemi në tranzicion, ka nevojë për një qarkullim të elitave. Ne kemi një shembull të jashtëzakonshëm, atë të demokracisë botërore. Në SHBA mund të kesh qenë presidenti më i suksesshëm, por ke
vetëm dy mandate, 8 vjet. Duke inkurajuar këtë rotacion, pavarësisht se në perspektivë mund të kishte opsione të ndryshme politike, unë deklarova se do të vijë dikush tjetër në atë pozicion. Vetëm në një moment mund të veproja ndryshe: Nëse votimi i presidentit do ishte në vullnetin e popullit. Nëse do të kishte një mundësi të tillë, atëherë do ta merrja shumë në konsideratë të hyja në një garë të tillë. Për sa kohë është një çështje e partive, le
ta bëjnë sipas asaj formule që do e zgjedhë presidentin në një mazhorancë të thjeshtë. Unë këtë nuk e kam parë si një zgjidhje adekuate. E kam thënë edhe para zgjedhjeve të presidentit në 2007, opsioni që unë i referohem është opsioni i zgjedhjes së presidentit nga populli. Vetë institucioni i presidentit është mbi palët dhe populli ka nevojë të ketë një institucion përfaqësues që del nga vullneti i tij.
Po për partinë e re?
Nuk dëshiroj që gjatë periudhës që unë jam president të denatyroj rolin e presidentit. Sa kohë që jam president, do jem në ushtrim të detyrës dhe kompetencave të presidentit. Unë për këtë jam betuar dhe deri ditën e fundit do të jem president i shqiptarëve.
Po kur të mbaroni mandatin?
Këtu është një çështje tjetër. E kam thënë që opsioni më i mundshëm është që unë do ti kthehem jetës politike.
Jeni në dijeni të një organizimi nga disa të pakënaqur të PD?
Unë di që ka një frymë. Nuk mund të bëj rolin e njeriut që nuk ka veshë të dëgjojë e sy të shikojë. Kjo është një frymë që vjen tek unë përmes një dëshire. Unë deri në korrik 2012, nëse zoti na jep jetë e shëndet, me do jem në zbatim të detyrimeve kushtetuese. Pas asaj dite kam opsionet e një njeriu të lirë në një vend të lirë.
Mund të jetë Fryma e Re Demokratike emri i një partie të re?
Është për t’u mbajtur shënim.
Një grup që legjislaturën e kaluar u përmendën si miqtë e Bamir Topit, u ndëshkuan dhe nuk janë sot në Kuvend e PD. Çfarë po bëjnë ata?
Në respekt të miqësisë besoj se të njëjtin pozicion kanë edhe miqtë e mi. Asgjë nuk ndërtohet në bazë interesi. Nëse interesi kalon mbi miqësinë, ajo nuk është miqësi. Unë e di që kam miq të mirë brenda dhe jashtë jetës politike. Janë njerëz që unë i kam vlerësuar si miq dhe kam miqësi të pandashme. Rregulli i politikës është i tillë, ndonjë herë kur raportet dominonte shkojnë sipas rregullit miku i armikut tim është armiku im, vjen që disa e pësojnë.
Kemi një kandidat që do të jetë president, Nano. Do i jepje votën Nanos?
Nuk mund të bëj komente. Nëse do të isha në parlament do argumentoja nga ai pozicion. Në parlament kam qenë i hapur, madje shumë i hapur sa kam kundërshtuar opsionet politike të grupit që kundërshtoj. Nuk nisem nga mungesa e dëshirës, por pozicioni nuk më lejon.
Cilësitë e presidentit?
Të jetë tolerant, të shkëputet nga interesat e partive dhe të jetë në mbrojtje të institucioneve të pavarura.
A do jeni njeriu që arriti të rrëzojë Berishën në zgjedhjet e ardhshme?
Nuk është plotësisht e saktë. Unë vlerësoj absolutisht të gjithë bashkëpunimin që kemi pasur në PD. Nuk jam nga ata që e deformoj historinë. Ishim pjesë e të njëjtës filozofi politike, ishim pjesë e përpjekjeve për të kthyer PD në pushtet. Historia nuk fillon në 2007. Kam qenë njeriu më i votuar ne 2005. Një ndërtesë ndërtohet gradualisht. Kam hedhur themele të forta. Nëse sot ka një mazhorancë, ajo nuk mund të ketë memorien e shkurtër. Ka njerëz të listave që po bëhen protagonist, ata janë njerëz të listave, por nuk kanë memorie.
Kush janë këta, Basha, Topalli?
Unë nuk përmend emra. Mënyra e sjelljes është pjesë e filozofisë së subjektit politik. Në çdo parti ka gjithmonë
një memorie historike. Nuk mund të vijnë disa rishtaz e të thonë që nuk e njoh dikë. Gjithsecili duhet të kthejë kokën pas e të thotë si e ka bërë karrierën e tij. Nuk mund të besoj se një parti vjen në pushtet me kontribut kryetarësh. Janë ekipe dhe çdo njeri duhet të vlerësohet.
Nisur nga djegia e fletëve të votimit, video Meta-Prifti, gjatë këtyre viteve që keni qenë në krye të shtetit, a keni kuptuar burimin e konfliktit?
Së pari do të thosha që politika në Shqipëri nuk ka qenë një politikë profesionale. Njerëzit kanë hyrë në politikë nga pozicione te tyre. Është çështje formimit të politikaneve. Ka nga ta që janë formuar në rrethana të ndryshme, por pavarësisht edukatës dhe profesionit, ajo që nuk duhet t’i mungojë është mënyra e komunikimit.
Vendimmarrja është gjë tjetër.
FUND
