Prishtinë, 25 dhjetor 2011, NOA- Kryenegociatorja e Kosovës për dialogun me Serbinë, Edita Tahiri shprehet se Serbia po luan me standarde të dyfishta.
Sipas saj, nga njëra anë është duke u munduar që BE-së t’i japë përshtypjen se është një vend me orientim europian, ndërsa nga ana tjetër serbëve të veriut iu jep mesazh që të mos i respektojnë marrëveshjet. Siç raporton agjencia e lajmeve NOA.al, Tahiri shprehet se e mirëkupton vendimin e samitit të BE-së për të mos iu dhënë statusi i vendit kandidat pasi, Serbia nuk i ka hequr strukturat paralele nga Kosova.
Deklarata e Tahirit u dha gjatë një interviste për gazetën turke, Zaman, ku zëvendëskryeministrja kosovare theksoi gjithashtu se pala kosovare është e përkushtuar për të vijuar përmes dialogut, sepse sipas saj e ardhmja e rajonit është përmes dialogut dhe bashkëpunimit.
Ndër të tjera, negociatorja kosovare u shpreh se, “Ajo që duam të shohim është se BE-ja, si një garantues, të bëjë përparim duke përdorur diplomacinë dhe shtyrjen e kandidaturës”. a.y/NOA
