Tiranë, 27 dhjetor 2011, NOA- Naim Hyska, polici i qarkullimit rrugor i plagosur tre ditë më parë është nisur me urgjencë drejt Janinës.
Siç informon agjencia e lajmeve NOA.al, polici u dërgua drejt vendit fqinj si rrjedhojë e rëndimit të gjendjes së tij shëndetësore.
Efektivi i policisë u plagos në prani të djalit të tij 12 vjeçar më 24 dhjetor te zona e 21 Dhjetorit, pasi u qëllua me armë zjarri në kokë teksa po lëvizte me makinën e tij personale.
Që nga momenti i plagosjes ai qëndroi në Spitalin Ushtarak, por si rrjedhojë e rëndimit të gjendjes shëndetësore u bë edhe transportimi i tij.
Pak pas mesditës së sotme ai u nis me avion drejt Greqisë, pasi siç shpjegojnë bluzat e bardha polici ka goditje në tru gjë që vështirësoi edhe kushtet e tij shëndetësore. Gjithsesi ndonëse për plagosjen e tij janë shoqëruar rreth 20 persona në polici, ende nuk flitet për një emër autori kjo për shkak të pistave ende të paqarta të ngjarjes.
a.y/NOA
