Savona, 28 dhjetor 2011, NOA/ Arjola Ymeraj- U ishin nënshtruar edhe më parë kërkimeve dhe verifikimeve të policisë, si rrjedhojë e dyshimeve për vjedhje të tjera, por duke folur në telefon tradhtuan veten duke i lejuar policisë që të mbledhë provat e mjaftueshme për ti akuzuar për vrasje.
Dy djem të rinj shqiptarë dyshohet të kenë vrarë mes natës së 14 dhe 15 dhjetorit 88 vjeçaren Rosa Bellino, në apartamentin e saj në Albisola teksa po e vidhnin atë.
Siç informon agjencia e lajmeve NOA.al, autorët e mundshëm të ngjarjes u prangosën nga policia dhe u identifikuan si Viktor Markja 22 vjeç dhe Eugen Dervishi 25 vjeç, që të dy shqiptarë.
Mësohet se viktima ishte zgjuar në mes të natës dhe i kishte gjetur dy hajdutët në shtëpi dhe pasi i kishte pikasur të rinjtë teksa rrëmonin mes sendeve të saj ata e kishin goditur me një objekt të fortë duke i shkaktuar edhe vdekjen.
Trupi i gruas u gjet i pajetë mëngjesin pasardhës nga një fqinj i së ndjerës i cili kishte lajmëruar menjëherë policinë, pasi kishte gjetur shtëpinë e shkatërruar e të bastisur ndërsa të moshuarën të vdekur në krevat, raporton NOA.al.
Në vijim të hetimeve fillimisht policia siguroi dyshimet mbi dy djemtë, e më pas zbuloi edhe zonën ku ata qëndronin dhe në sajë të përgjimeve telefonike bëri edhe arrestimin e tyre.
a.y/NOA
