Tiranë, 30 dhjetor 2011, NOA- Sipas MeteoAlb, edhe sot, vendi ynë është dominuar nga moti i paqëndrueshëm. Zonat e ulëta dhe ato bregdetare kanë patur vranësira dhe kthjellime të herë pas hershme ndërsa zonat malore përgjatë kufirit lindor të pranishme kanë patur vranësira dhe reshje të pakta dëbore.
Pjesa e dytë e ditës ka sjellë largim të vranësirave dhe reshjeve të shiut dhe dëborës nga zonat malore duke rikthyer kthjellimet ndërsa bregdeti dhe zona e ulët kanë vijuar të jenë me mot kryesisht të kthjellët por të ftohtë. Parashikohet që edhe gjatë natës kthjellimet dhe temperaturat e ulëta të mbizotërojë në të gjithë vendin tonë.
Temperaturat e ajrit kanë pësuar një rënie të lehtë në të dy vlerat ekstremale.
Era ka fryrë mesatare në tokë dhe në det me shpejtësi 37 km/h dhe drejtim veriperëndimor, më problematike era është paraqitur në jug duke gjeneruar në brigjet e Jonit dallgëzim 3 ballë.
Europa
Masat ajrore të ftohta dhe të lagështa oqeanike kanë kushtëzuar mot të paqëndrueshëm me reshje shiu dhe dëborë, në Europën Veriperëndimore duke u shtrirë deri në qendër të kontinentit. Konkretisht në ishujt britanike dhe Irlandë do të ketë vranësira dhe reshje shiu e dëborë. Problematike situata do të jetë edhe në Francë e Gjermani ku reshjet do të bien me intensitet të lartë. Gjatë pjesës së dytë të ditës vranësirat kanë përfshirë zonën e Alpeve dhe Vendet e Balltikut duke gjeneruar reshje shiu dhe dëborë me intensitet të lartë kryesisht në Poloni, Italinë veriore, Austri, veri të Gjermanisë dhe Franceë. E njëjta situatë meteorologjike ka dominuar në një pjesë të Rajonit të Mesdheut, mot i ftohtë me vranësira dhe reshje të pakta shiu e dëborë. Për sa i përket Europës Jugperëndimore, si edhe një pjesë e Europës Lindore do të dominojë mot i kthjellët dhe i ftohtë.
Ngjarje ekstreme në Europë:
- Ishujt Britanike alarmojnë shira intensive dhe stuhi me rrufe
- Europa qendrore do të rrezikohet nga dëbora e dendur
a.y/NOA
