Bujar Nishani ka marrë urimin edhe nga Konferenca Ipeshkvore e Shqipërisë e cila e ka uruar për zgjedhjen në postin e presidentit të ri të shtetit. Në urimin e saj, Konferenca Ipeshkvore thekson se posti në të cilin Zoti Nishani është zgjedhur ka një rëndësi të veçantë në drejtim të ecurisë demokratike dhe të integrimit europian të vendit tonë.
“Konferenca Ipeshkvore e Shqipërisë dëshiron t`i përcjellë Zotit Bujar Nishani urimet më të sinqerta dhe të ngrohta, në emër të Ipeshkvinjëve te Kishes Katolike të Shqipërisë, për zgjedhjen në postin e Kreut të Shtetit. Garantojmë lutjen tonë dhe të të gjithë besimtarëve katolikë të Shqipërisë para Hyjit për punën e Presidentit të zgjedhur në kryerjen e detyrave kushtetuese dhe respektimin e rendit demokratik për të mirën e përbashkët të Shqipërisë dhe shqiptarëve” thuhet në urimin e Konferencës Ipeshkvore.
