Ina Rama Kryeprokurorja e Shqipërisë ka deklaruar sot në komisionin e ligjeve gjatë raportimit për gjendjen e kriminalitetit në Shqipëri për vitin 2011, se imuniteti ka qënë një pengesë e madhe për hetimin e zyrtarëve të lartë.
Gjithashtu kryeprokurorja ka komentuar edhe mbi raportin e Ministrisë së Drejtësisë lidhur me inspektimet në organin e akuzës, duke deklaruar se kontrollet janë kryer jashtë kompetencave të Ministrisë së Drejtësisë. Sipas saj qëndrimet janë shpesh hipotetike dhe imagjinare.
“Raporti i Ministrisë së Drejtësisë për Prokurorinë është jashtë kompetencave të saj ndërsa të dhënat e raportit të Ministrisë së Drejtësisë ishin të pasakta.Ministria e Drejtësisë në raport na ka veshur problematikën e të gjithë sistemit dhe ajo ka marrë përsipër të vlerësojë etikën profesionale të prokurorëve dhe kjo është jashtë tagrit të saj”.
Dhe ajo është shprehur se shifrat e kriminalitetit janë në rritje, duke sjellë një numër të madh çështjesh për t'u trajtuar.
