Presidentja e Republikës së Kosovës, Atifete Jahjaga vizitoi Bashkësinë Islame të Kosovës (BIK), ku u prit nga myftiu Naim Tërnava dhe udhëheqja e BIK-ut.
Presidentja Jahjaga e uroi myftiun Tërnava, të pranishmit dhe të gjithë besimtarët myslimanë për festën e Bajramit të Madh.
Midis të tjerash Presidentja Jahjaga theksoi:
"Kam ardhur sot këtu që t’ju uroj për këtë ditë të madhe, për këtë festë të besimit islam, ditën e Bajramit.
Ju dëshiroj juve, familjeve tuaja dhe mbarë popullit të Republikës së Kosovës që këtë ditë të lume ta kalojmë me shëndet, gëzime dhe begati, në ndihmë të njëri-tjetrit, në forcimin e besimit tek Zoti, që të jetojmë në lumturi, në paqe, në harmoni, në përparim të përgjithshëm. Por, edhe me urimin që të realizohen të gjitha të mirat që ne i dëshirojmë.
Shteti ynë, Republika e Kosovës, është shtet sovran, shtet i pavarur, ka integritetin dhe sovranitetin e vet të plotë, që është realizuar me angazhimin, me përkushtimin e gjithanshëm të mbarë popullit tonë, në dekada të vazhdueshme.
Në këtë rrugë, gjithsesi se ne kemi pasur përkrahjen dhe mbështetjen e fuqishme të bashkësisë ndërkombëtare dhe Bashkësia Islame gjithmonë, në gjithë këto periudha, ka luajtur një rol të rëndësishëm, një rol të veçantë, sepse ju gjithmonë keni qenë me popullin.
Në këto ditë gëzimi, në këto ditë feste, ne gjithsesi duhet t’i kujtojmë të gjithë të dashurit tonë, duhet t’i kujtojmë ata që më nuk janë me ne, duhet t’i kujtojmë ata që kanë sakrifikuar dhe, gjithsesi, duhet t’i kujtojmë edhe veprimtarët dhe ushtarët e Ushtrisë Çlirimtare të Kosovës, që flijuan jetën e tyre për pavarësinë e shtetit tonë. Duhet t’i nderojmë familjet e tyre, duhet t’i nderojmë veteranët dhe invalidët e luftës, por duhet t’i nderojmë dhe t’i respektojmë të gjithë ata veprimtarë që sakrifikuan për lirinë, pavarësinë dhe demokracinë e shtetit tonë, një shtet që sot që ka një të ardhme të qartë dhe ka një të ardhme që ka plotësuar të gjitha kushtet drejt integrimit në Bashkimin Evropian dhe në NATO. Por, gjithsesi edhe në një miqësi të përjetshme me Shtetet e Bashkuara të Amerikës.
Qëllimisht e them, sot në ditën e festës, në ditën e gëzimit, sepse rruga që kemi kaluar nuk ka qenë e lehtë. Ka qenë një rrugë jashtëzakonisht e vështirë dhe duhet të shërbejë si një udhërrëfyes për të gjithë neve, si një inkurajim dhe një shtytje që të punojmë më shumë, të punojmë ndershëm, të punojmë për prosperitetin e popullit dhe të vendit tonë.
