Konferenca e plotë dhënë për shtypin e kryeministrit Sali Berisha
Pas përpjekjeve të ndershme, serioze e të shumëllojtë, që qeveritarët e këtij vendi, deputetët, gjykatësit, të zhvishen nga këmisha e imunitetit, nga mburoja e pamerituar e tij, të përshtaten me parimin universal të sistemit demokratik: barazisë së qytetarëve para ligjit, mazhoranca vendosi t’u drejtohet qytetarëve shqiptarë, për referendum popullor.
Ky vendim u diktua nga vendosmëria jonë, për të rrëzuar murin e imunitetit, një pengesë kjo, e padiskutueshme, për institucionin e akuzës dhe hetimin, ndaj zyrtarëve dhe qeveritarëve imunitarë, të cilët kanë në vendimmarrjet e tyre jo vetëm të tërë buxhetin e shtetit, por edhe ligjet e vendit dhe të gjithë problematikën civile dhe penale të një shoqërie e të një kombi.
Pikërisht, në bindjen e rëndësisë jetike të zhveshjes nga parzmorja e imunitetit, në vitin 2003, Partia Demokratike dorëzoi në parlament, amendamentet për kufizimin e imunitetit. Këto amendamente u hodhën poshtë nga mazhoranca socialiste e atëhershme, me pretekstin se ky problem kërkon ndërhyrje në Kushtetutë dhe Kushtetuta është një njomëz që nuk duhet të preket. Në alternativë të kësaj, ne i ofruam Partisë Socialiste aplikimin e praktikës së parlamentit gjerman, i cili me një deklaratë të të gjithë deputetëve të parlamentit, vendos në fillim të çdo sesioni, kufizimin e imunitetit dhe autorizon institucionin e akuzës dhe hetimit të procedojë për parlamentarët njëlloj si për qytetarët e tjerë, kur bëhet fjalë për vepra penale të krimit të zakonshëm e korrupsionit. Dokumenti i dorëzuar nga grupi parlamentar i Parisë Demokratike nuk u përkrah në asnjë mënyrë nga grupi parlamentar i Partisë Socialiste. Shumë muaj më vonë, ata bënë një deklaratë farsë, sikur kolektivisht hiqnin imunitetin, ndërkohë që rregulli kërkon një procedurë strikte, të sanksionuar, përveç të tjerash, edhe në rregulloren e parlamentit.
Me rikthimin në pushtet në vitin 2005, përsëri në bindjen tonë më të thellë se është e padrejtë dhe e pandershme që qeveritarët, ministrat, deputetët, gjykatësit e këtij vendi të kenë imunitet e mbrojtje ndaj hetimeve që mund të ndërmerren ndaj tyre, kur abuzojnë me pushtetin dhe e përdorin atë për pasurim të paligjshëm, ne dorëzuam ligjet në parlament. Por, sërish, Partia Socialiste i kundërshtoi ato dhe kërkoi ndërhyje në Kushtetutë. Mazhoranca i dërgoi këto ligje në Komisionin e Venecias, i cili i gjeti shumë të drejtë, por kërkoi që ato të miratohen me 3/5 e votave në parlament, sepse kanë të bëjnë me një vendim ndaj institucioneve kushtetuese. Partia Socialiste refuzoi të paranojë sugjerimin e Komisionit të Venecias.
Në vitin 2005, ne u angazhuam me Partinë Socialiste, në procesin më të thellë të reformave kushtetuese dhe institucionale që vendi ka njohur ndonjëherë. Në mënyrë të përsëritur, përfaqësuesit e Partisë Demokratike dhe të mazhorancës në këto negociata kërkuan heqjen e imunitetit, kërkuan ndryshimin e Kushtetutës për nenet që kishin të bënin me imunitetin. Të gjitha përpjekjet tona gjetën një “Jo!” kategorike direkt të kryetarit të Partisë Socialiste, pasi duhet të jemi realistë se komunikimi ishte direkt midis meje e zotit Rama. Zoti Rama bëri të qartë se në këtë paketë nuk do të përfshinte problemin e imunitetit.
Ju e njihni këtë histori, por unë u ndala në të, pasi edhe ajo ka vlerën e saj, për të kuptuar pse mazhoranca detyrohet t’i drejtohet sovranit.
Një vit më parë, ekspertë të Këshillit të Europës, të EURALIUS-it, draftuan amendamentet për heqjen e imunitetit të imunitarëve në Shqipëri dhe të gjitha ndërhyrjet ligjore që duhet të bëheshin për këtë qëllim, për ta bërë Shqipërinë si një vend të civilizuar.
Ekspertët kërkuan që ky ndryshim të bëhet nëpërmjet ndërhyrjes në Kushtetutë. Atëherë, mazhoranca, e cila kishte mbrojtur pikëpamjen, e sugjeruar edhe nga Komisioni i Venecias për ligj me 3/5 e votave, ndryshoi qëndrimin e saj. Ne ramë dakord me sugjerimin e ekspertëve të Këshillit të Europës, por edhe me kërkesën e opozitës e të zotit Rama, të cilët, në seminarin e organizuar për këtë çështje, e përshëndetën këtë kërkesë të ekspertëve të Këshillit të Europës. U përcaktua që të bëheshin edhe dy seminare të tjerë për këtë çështje dhe u caktuan datat, fillimisht në mesin e muajit prill, më pas fundi i muajit prill, në maj. Por Partia Socialiste dërgonte mesazhe kategorike se nuk do të merrte pjesë në këto seminare. Kjo detyroi ekspertët ndërkombëtarë që të sintezonin të gjithë diskutimin e bërë në seminar dhe të paraqisnin qëndrimin e tyre ndaj heqjes së imunitetit. Grupi parlamentar i Partisë Socialiste, në mënyrë të përsëritur, edhe në planin e veprimit të miratuar bashkërisht ishte përcaktuar heqja e imunitetit si një përparësi madhore të marrjes së statusit të vendit kandidat, ishte përcaktuar që kjo detyrë duhej të realizohej brenda muajit korrik. Kjo, në të gjitha dokumentet e miratuara bashkërisht.
Pas seancës dëgjimore, që u zhvillua në parlamentin shqiptar me ekspertë të huaj dhe vendas, ku u shprehën pikëpamje se mbase heqja tërësore e imunitetit mund të ngjallte shqetësime, ndaj drafti mund të kalohej me kufizimin e imunitetit, përfaqësuesit e mazhorancës u ulën në tryezë me përfaqësuesit e Partisë Socialiste dhe pranuan çdo sugjerim e amendim të tyre, pra, një draft të PS-së, le ta quajmë konsensual, por që, faktikisht, ishte një kompromis total, pasi zoti Rama me kompromis e konsensus nënkupton diktat, ka një koncept shumë rudimentar. Ne e pranuam diktatin dhe e bëmë këtë, për interesin e madh shoqëror, madje do të thosha edhe kombëtar. Ne e pranuam draftin, ashtu siç e donin. Zoti Paloka mori porosi të pranonte çdo lloj sugjerimi që përfaqësuesit e PS-së do të bënin, në mënyrë që të shkonim bashkërisht në parlament, në datën 6 gusht, e miratuar edhe kjo datë, pa asnjë kundërshti nga Partia Socialiste, në parlament. Më tej nuk ka nevojë për komente. Në mënyrën më qesharake, socialistët u thanë shqiptarëve: ne jemi për heqjen e imunitetit, por nuk e votojmë, është varianti ynë, por nuk e votojmë. Nuk besoj të ketë në histori një rast analog, që një forcë politike të mos votojë draftin që harton vetë, me të gjitha kërkesat e saj.
Po ndalem në një moment, për qytetarët shqiptarë. Socialistët rëndom spekulojnë duke thënë se nuk është imuniteti pengesë për korrupsionin, se edhe po të hiqet imuniteti, do të ketë korrupsion. Sigurisht, edhe vendet që nuk kanë imunitet kanë korrupsion, por e kanë atë në një shkallë shumë të vogël, se sa e ka Shqipëria. Po mbrojte korrupsionin, mbron përdorimin e pushtetit për t’u pasuruar në mënyrë të paligjshme! Nuk ka hipokrizi më të madhe se të derdhësh lot për të papunët, kur njëherësh u thua atyre se pasuritë e mia të paligjshme nuk mund të preken, paçka se ato cenojnë konkurrencën e ndershme, paçka se ato, nëpërmjet fshehjes së taksave, falimentojnë ndërmarrjet e tjera që nuk i fshehin ato, pasi presidentët a menaxherët e tyre nuk kanë imunitet që ta përdorin si mburojë dhe në këtë mënyrë shkatërron me qindra e mijëra vende pune, paçka se, kur imuniteti përdoret për të ngritur traun e doganave, jo vetëm që përvetëson automatikisht sasinë e madhe që duhej të paguaje në doganë, por, edhe më keq, vret me qindra vende pune, pasi sipërmarrësi tjetër paguan taksën në doganë. Për të mos thënë më tej se, kur t’i përdor targën imunitare për bosët e drogës dhe larje parash, bëhesh epiqendër dhe strumbullar i krimit të organizuar dhe formave më të rrezikshme të tij. A janë këto shpikje të Sali Berishës!? Ju garantoj: Asnjëra prej tyre! Ka ndodhur në Shqipëri, ndodhin në Shqipëri, ndodhin rëndom në vendet me imunitet. Jo më kot, parlamenti sllovak doli para një muaji, me votimin solemn për heqjen e imunitetit. Një aferë e madhe korruptive e disa viteve më parë i çoi ata në mençurinë se mjaft është mjaft!, t’i hapim rrugën hetuesve, prokurorëve, gjykatësve, organeve të zbatimit të ligjit. Dhe nuk ka gjë më të drejtë! Të flasësh për pavarësinë e drejtësisë dhe t’i vendosësh asaj murin e korrupsionit përpara, kjo është një sarkazëm e hidhur. Nëse do që drejtësia të jetë e pavarur, atëherë hiq parzmoren dhe kushdo të shkelë ligjin, edhe ai që është me pushtet të kapet. Të bëhemi si qytetarët e tjerë.
Partia Demokratike ka mbrojtur këtë parim, dhjetë vite më parë dhe nuk ishte problemi as për statusin, as për Marrëveshjen e Stabilizim Asociimit, por ishte në bindjen më të thellë se ky ishte interesi jetik i qytetarëve shqiptarë; në bindjen se ata, të cilët administrojnë paratë e tyre nuk duhet të kenë parzmore para ligjit dhe, nëse i keqpërdorin paratë e tyre, duhet të përgjigjen pa asnjë vështirësi para ligjit; në bindjen se ata që japin vendime për të drejtat e tyre, nuk duhet të kenë parzmore para ligjit. Nëse do të më pyesni se cilët janë dy dhunuesit kryesorë universalë të lirive e të drejtave të njeriut në shoqëritë e lira, do t’i thosha: muri patriarkisë dhe korrupsioni. Qytetari shkon në gjykatë dhe në vend që të fitojë të drejtën, ryshfeti ia përmbys atë.
Por vitet e fundit, kjo kërkesë u shtua nga Bashkimi Europian, për statusin dhe unë e quaj kërkesën, absolutisht, më të drejtë që i është bërë këtij vendi. Kjo është dhjetë herë më e drejtë se reforma elektorale. Ndërsa reforma elektorale ishte një ligj i miratuar germë për germë në konsensus të plotë - dhe keni për ta parë se pas zgjedhjeve të vitit 2013, sërish zotëria do të kërkojë ndryshim të ligjit dhe unë sërish do t’ia pranoj, sepse ai do të humbasë dhe do të thotë ligji e ka fajin - imuniteti është themelor, është diçka me veten tënde, për t’u thënë qytetarëve që unë jam i gatshëm të jem si ju. Ndaj u shtua si standard. U kërkua një formë dhe për mua, natyrisht, heqja e imunitetit ishte më e drejta, pasi, përse qeveritarët shqiptarë të jenë me “këmishë” dhe qeveritarët holandezë, të një prej vendeve më të zhvilluara në botë apo ata norvegjeze duhet të kenë zero imuniteti. Të marrim shembujt pozitivë.
Unë jam i ndërgjegjshëm se heqja e imunitetit sot, nuk do të thotë zhdukje e korrupsionit. Aspak, pasi korrupsioni nuk zhduket ndonjëherë, por do të thotë luftë më eficente ndaj tij dhe për këtë, ne jemi të përcaktuar.
Në këto rrethana, në këtë qëndrim total obstruksionist, pas dhjetë vitesh përpjekjesh të ndershme dhe serioze dhe, fatmirësisht, përpjekjesh të bëra kur kemi qenë në opozitë dhe gjatë periudhës së qeverisjes, ne gjykojmë se në asnjë mënyrë nuk kemi autoritetin të heqim dorë nga zhveshja e imunitarëve shqiptarë nga imuniteti. Në asnjë mënyrë nuk mund të dekurajohemi nga pengesat që nxjerr zoti Rama. U faktua tashmë se ai nuk pranon të votojë, në asnjë lloj varianti, kur ai nuk votoi në parlament më 6 gusht, draftin që firmosi vetë, me përfaqësuesit e tij.
Në këto rrethana, jam i bindur se qytetarët shqiptarë, pavarësisht nga bindjet e tyre politike, në tërësi duan që qeveritarët, zyrtarët, deputetët e gjykatësit e tyre të jenë pa imunitet dhe do të ishte një përgjegjësi shumë e rëndë t’i privoje ata nga shprehja e verdiktit të tyre.
Ndaj jam sot, këtu, për të njoftuar se deputetët e mazhorancës do të jenë ata që do të dorëzojnë kërkesën për referendum popullor për heqjen e imunitetit, brenda dy javëve të para të muajit shtator.
Neni 150 i Kushtetutës së vendit njeh tre mundësi. Ky nen autorizon Këshillin e Ministrave, si institucion me të drejtën për të kërkuar mbajtjen e referendumit; autorizon 50 mijë qytetarë, autorizon 1/5 e parlamentit. Midis tyre, këshillime të shumta nga deputetë e juristë sugjeruan që të jenë deputetët ta ndërmarrin nismën, pasi për dhjetë vite me radhë, ishin ata promotorë të këtij procesi dhe, meqenëse hasën në një mur absurd, të kenë vendosmërinë t’i drejtohen popullit. Uroj dhe shpresoj që kjo kërkesë të jetë jo vetëm e deputetëve të mazhorancës, por të firmosin edhe ata deputetë të Partisë Socialiste, të cilët në ndërgjegjen e tyre të thellë e konsiderojnë heqjen e imunitetit, si një kërkesë legjitime të zgjedhësve të tyre, si interes jetik i qytetarëve shqiptarë, për marrjen e statusit të vendit kandidat dhe luftën kundër korrupsionit.
Ky ishte njoftimi që unë desha të bëja në këtë konferencë shtypi. Natyrisht, meqenëse javët e fundit, për shkaqe të kuptueshme, nuk jemi takuar shumë, jam i hapur për çdo pyetje.
Pyetje: Zoti Kryeministër a ka bazë reale ligjore për të arritur këtë objektiv, duke pasur parasysh se shtypi ka botuar së fundi një vendim të Gjykatës Kushtetuese të vitit 2009, që thotë se referendumi për ndryshimet kushtetuese kërkon një votim me 2/3 në parlament, pra, edhe votat e opozitës? A do të bëhet referendumi?
Kryeministri Berisha: Është njëlloj si të besosh “Kurani apo Ungjilli sipas Ruçit”. Ata bëjnë interpretimin e tyre që duan, pasi ata, me çdo kusht, janë për të bllokuar. Kjo është edhe donkishotizëm! Referendumi është forma më sublime e demokracisë. Përpjekja për të ndrydhur zërin e qytetarit shënon fundin e çdo politikani në një shoqëri të lirë. Referendumi është forma direkte e demokracisë. Të lexojnë nenin 150 të Kushtetutës. Në të gjithë hierarkinë, ai është kryeneni: 50 mijë qytetarë, 1/5 e parlamentit dhe Këshilli i Ministrave kanë të drejtë t’i drejtohen sovranit për verdikt. Këtu ndal, nuk shkohet më tutje. Specifikohen disa problematika. Natyrisht, nuk mund ta bëjnë këtë, kur bëhet fjalë për territor, me të cilën na kërcënoi zoti Rama, se do të organizonte referendum për çështje territoriale. Nuk ka Kushtetutë që autorizon një gjë të tillë. Është në gjenezën e Kushtetutës, ndalimi i një akti të tillë.
Pyetje: Në kërkesën që do të drejtoni në parlament, a ka një formulim konkret të pyetjes, pasi ngjan si pyetje retorike, sepse nëse do të pyetej populli: të hiqet imuniteti, natyrisht që shumica do të thoshte “po”, sipas indikacioneve. Nga pikëpamja juridike dhe praktike, sa shpejt mund të reagojnë institucionet shqiptare për ta realizuar referendumin deri në Krishtlindje, sepse viti ardhshëm është vit zgjedhjesh të parlamentit?
Kryeministri Berisha: Formulari dhe pyetjet janë e do të mbeten atribut i parlamentarëve që do të paraqesin kërkesën. Nëse do të zgjedhin heqjen totale të imunitetit, apo variantin që socialistët imponuan në parlament, apo do t’i paraqesin të dyja me pyetje respektive, sigurisht, kjo do të jetë atribut i grupit të deputetëve që do të paraqesë kërkesën për referendum. Nuk mund të avancoj dhe të paragjykoj nëse ata do të kërkojnë variantin e paraqitur nga ekspertët ndërkombëtarë, që ishte edhe më i avancuari, apo variantin e kufizuar që mbrojtën dhe draftuan socialistët. Kjo është çështje e deputetëve. Natyrisht, gjithçka do të jetë në respekt të plotë të Kushtetutës së vendit dhe vendimeve të Gjykatës Kushtetuese, e cila, në asnjë rast e në asnjë rrethanë, nuk ka ndaluar e bllokuar të drejtën e sovranit për verdiktin e tij, për çështje kaq madhore. Një gjë është e sigurt se mazhoranca do të respektojë çdo gjë, në germë e në frymë. Ky do të jetë një proces shumë serioz.
Lidhur me kohën, unë shpresoj që po. Koha është e mjaftueshme, por nuk mund të them sa kohë do të kërkojnë institucionet përgjegjëse, pasi Këshilli i Ministrave ka vetëm një të drejtë: të kërkojë mbajtjen e tij. Të gjitha të drejtat e tjera i kanë institucionet e pavarura kushtetuese: Komisioni Qendror i Zgjedhjeve, Gjykata Kushtetuese dhe Presidenti i Republikës.
Pyetje: Lidhur me detyrat e BE-së, sa optimist jeni se 12 rekomandimet e detyrat që Europa i ka dhënë Shqipërisë do të marrin një raport progres pozitiv në Raportin e radhës?
Kryeministri Berisha: Në tërësi pikat kanë ecur drejt realizimit. Ka mbetur në parlament dhe nuk është votuar ligji për Gjykatën e Lartë, amendamente të kërkuara nga vetë Partia Socialiste, kur u votua ligji për Gjykatën Administrative. Në variantin e dërguar nga qeveria, ligji për Gjykatën Administrative nuk kishte një kolegj në Gjykatën e Lartë. Socialistët kërkuan me çdo kusht që kjo të vendoset dhe ne e pranuam. Tani, ligji është në parlament dhe pret votën e tyre. Në do ta votojnë apo do ta përdorin edhe atë për bllokim, në mënyrë që të garantohen se statusi nuk do t’u jepet shqiptarëve, kjo është çështje e tyre. Janë edhe dy ligje të tjera, ligji për Shërbimin Civil dhe një ligj tjetër, të cilët do të jenë në parlament brenda një shtatorit. Problematika e 12 pikave është shumë e gjerë, me të cilën duhet punuar në mënyrë të vazhdueshme, pasi, në qoftë se themi p.sh lufta kundër korrupsionit, ajo është një luftë e vazhdueshme dhe e pandërprerë dhe nuk do të kishte kontribut më madhor në këtë luftë se heqja e imunitetit. Pra, është një proces që vazhdon.
Pyetje: Zoti Kryeministër, përse nuk e patë të arsyeshme të mos konsultoheshit me Shtetet e Bashkuara të Amerikës, në lidhje me emërimin e ri të kreut të Shërbimit Informativ Shtetëror, pasi, për hir të së vërtetës, gjatë viteve të shkuara, ne kemi parë një interesim konstant nga SHBA për këtë institucion?
Kryeministri Berisha: Bashkëpunimi i Shqipërisë me Shtetet e Bashkuara të Amerikës, në fushën e sigurisë është një bashkëpunim i shkëlqyer, për aq sa Shqipëria mund të kontribuojë. Duhet të kemi të qartë se rolin kryesor për paqen e sigurinë në botë, sot, e kanë Shtetet e Bashkuara të Amerikës, si udhëheqëse e Aleancës së Atlantikut të Veriut. Shqipëria është e privilegjuar që ka një bashkëpunim të shkëlqyer me këtë vend të madh mik dhe agjencitë e zbatimit të ligjit. Jam shumë i bindur se në vitet që vijnë ky bashkëpunim do të njohë nivele të tjera shumë të rëndësishëm. Pra, është një bashkëpunim shumë i mirë, i shkëlqyer dhe do të jetë edhe më i mirë, edhe më i shkëlqyer.
Së dyti, konsultat për probleme të sigurisë me aleatin kryesor janë të pandërprera dhe çdo problem sigurie që kemi, ne e trajtojmë haptas me aleatët tanë.
Pyetje: Cili është qëndrimi i Kryeministrit të Shqipërisë në lidhje me ndalimin e shtetasve shqiptarë, për të hyrë në kufijtë grekë dhe shpalljes së tyre “non grata”. I referohem këtu edhe rastit më të fundit të kolegut të Top Channel Marin Mema.
Kryeministri Berisha: Është e vërteta, ka disa ndalime, për të cilat Ministria e Jashtme po i trajton me autoritetet greke. Natyrisht, në çdo vend mund të ketë persona që për një arsye apo tjetër nuk pranohen, por personat që janë refuzuar gjykoj se nuk kanë pasur asnjë lidhje me kategoritë e delikuentëve apo rrezikshmëri të kësaj natyre. Ndaj, ne e trajtojmë me seriozitet këtë problem, me autoritet greke.
Pyetje: A do ta rrisë qeverisë deficitin buxhetor për këtë vit, për të mbuluar planin e investimeve?
Kryeministri Berisha: Pyetje me shumë interes. Qeveria do të bëjë gjithçka për të mbajtur nën kontroll borxhin publik në nivelet rreth 60-s. Duhet t’u bëj një qartësim dhe jo për ata, të cilët përdorin mediat për të ngjallur panik, për të krijuar tmerr e terror dhe e vërteta është se para së gjithash e mbi të gjitha, dëmtojnë veten e mediat, që e ushqejnë një gjë të tillë. Të pretendosh se po ecet drejt skenarit grek do të thotë të jesh i verbër e të mos kesh nocionet më minimale ekonomike, por të kesh vetëm një keqdashje të thellë në shpirt e asgjë më tepër. Le t’u referohemi fakteve. Katër vitit e fundit, ne nuk e kemi ulur borxhin, por nuk e kemi lejuar rritjen e tij. 4 vitet e fundit kanë qenë vitet e rritjes stratosferike të borxheve. Vendet e rajonit, të cilat kanë patur borxhe 2 deri në 3 herë më të ulta se sa Shqipëria, kanë pësuar rritje borxhi nga dyfishim deri në trefishin të borxhit gjatë këtyre 4 viteve të krizës. Shqipëria është luhatur ne vlera nga 58 tek 59,7. Sigurisht që mirë do të ishte që të kishim ndërmarrë ulje, pse them të kishim ndërmarrë, së pari ne nuk shpenzojmë një qindarkë nga paratë e borxhit për rroga, pensione, dhe ndihme ekonomike. E tërë kjo faturë është faturë e të ardhurave buxhetore dhe një pjesë e tyre tepron. Borxhin që marrim ne e marrim pë r të ndryshuar Shqipërinë, për të ndërtuar rrugë, shkolla, spitale, për të ndryshuar jetën e qytetarëve shqiptarë. Ne zbatojmë me rigorozitet atë rregull, i cili është quajtur dhe rregulli i artë në ekonomi ose rregulli i Phelp-sit. Nuk ka lidhje me notarin. Sot ky ekonomist gjenial pothuajse është lënë në harresë sepse supermeni i notit ka bërë të vetën këtë emër kudo që ekziston, por Phelp, ky ekonomist gjenial i viteve 60 thotë: Nuk duhet të shpenzosh me shumë se sa krijon dhe nuk duhet marrë borxh , përveçse për investime. Unë kam patur bindjen më të thellë se në qoftë se ky rregull do të ishte aplikuar siç është përcaktuar nga ky ekonomist gjenial, kriza sot nuk do të ekzistonte. Por ky rregull u vendos në pluhurin e arkivave nga shumë e shumë vende, por jo nga qeveria shqiptare që erdhi në pushtet në vitin 2005. Një nga gjërat e para që kemi bërë ne kemi garantuar rrogat pensionet dhe të gjitha shpenzimet nga të ardhurat buxhetore dhe jo nga borxhi. Ndaj dhe natyrisht Shqipëria e ka jetik transformimin e saj sepse ka një gjë këtu. E gjithë bota e opinionit dhe e mendimit jeton në qytet, jeton në kushte komode dhe absolutisht harron se diku prapa Dajtit apo malit me gropa apo dhe në vende të tjera, pasi Shqipëria ëshët vend malor jetojnë njerëz që kanë nevojë jetike për të ndërtuar rrugët, sepse po nuk ndërtove rrugët ata njerëz mbeten si të dënuar atje. Jetojnë familje të cilat duhet të shkollojnë fëmijët e tyre. Pra gjithfarë është ndërtuar në qytete edhe ata janë aksionerë, nuk mund ta harrojmë, kanë paguar taksat, ka prej tyre që janë zona të fuqishme minerare, që kanë qenë kryesore të buxheteve për dekada.
Pra kjo qeveri po bën gjithçka për një transformim tërësor të vendit dhe ne i qëndrojmë borxhit të vendosur në kontroll të plotë të tij dhe në së për 4 vite, fqinjëve tanë u është dy dhe trefishuar borxhi, ndërkohë që komisioni Evropian ashtu siç e keni dëgjuar u shpreh se Shqipëria ka ndërtuar autostrada dhe superstrada dhe rrugë të tjera më shumë se i gjithë rajoni i marrë së bashku. Shqipëria nuk mund të mbante ato rroga që kishim sepse u them unë ju se prapa çdo lloj psherëtime për varfërinë qëndron edhe një dozë e vogël përçmimi dhe mospërfillje ndaj tjetrit. Prandaj qeveria bëri një përpjekje të madhe për të rritur rrogat, për të mos mbetur vendi me rroga më të ulëta, por përsëri qëndruam në grupin e vendeve me qeveri të vogël dhe në këtë rast qeveria e vogël matet me shpenzime buxhetore .
Pyetje: Pyetja ime ka të bëjë me paktin me Greqinë, ose pritja e rifillimit të negociatave me Greqinë për paktin detar. Pse duhet të kishim rifillim të negociatave në fakt që kishim një vendim të Gjykatës Kushtetuese që kanë rrëzuar marrëveshjen e parë. Çfarë përfiton Shqipëria nga ky pakt dhe a ka patur presion nga Greqia në lidhje me çështjen e marrjes së statusit të vendit kandidat në këmbim të paktit detar.
Kryeministri Berisha: I nderuar zotëri, ka një muaj rresht që media merret me një çështje tërësisht të sajuar, por unë e kam kuptuar këtë si një nevojë për të mbijetuar në gusht. Për sa i përket kësaj ju garanto ju se asnjë grup pune nuk është krijuar, asnjë marrëveshje nuk është negociuar, asnjë veprim nuk është bërë. Duke theksuar këtë do të theksoj anën tjetër. Shqipëria do të hapë negociatat për të zgjidhur me vendet fqinje të gjitha problemet që ekzistojnë. Këtu ne nuk kemi asnjë hezitim dhe jemi të hapur por sigurisht në respekt të plotë të ligjeve, Kushtetutës së vendit, vendimeve, përcaktimeve të Gjykatës Kushtetuese, vendime të cilat kanë tagrin, forcën e prerogativave kushtetuese. Por me vendin mik Greqinë, Maqedoninë, dhe çdo lloj vendi do të diskutojmë çdo problem të mbetur. Po ju jap një shembull tjetër. Ekzistojnë marrëveshjet e ujërave me Maqedoninë që janë të viteve 60. Ne do të ulemi me Maqedoninë të diskutojmë marrëveshjet sepse kemi ujërat, kemi Prespën , Ohrin, kemi mënyrat e trajtimit, të shfrytëzimit, bashkëveprimit, etj, etj. Pra marrëveshjet me fqinjët janë një normë konstante. Këto janë të vërteta, si do të vazhdoni është puna juaj, por bashkë me gushtin ikën dhe vapa.
Pyetje: Pyetja ka të bëjë me çështjen e zgjidhjes së kryeprokurorit të ri. Siç flitet dhe në media, a ka patur një marrëveshje ose a ka mes PD dhe aleatëve të saj kryesorë në maxhorancë,LSI, për tia dhënë kryeprokurorin e përgjithshëm kësaj force?
Kryeministri Berisha: Kushtetuta ka përcaktimin e vet të kristaltë. Zoti Rama ishte dakord kur bëmë ligjin e prokurorisë, nuk ka punë qeveria, është atribut kryekëput, e drejte kushtetuese e Presidentit të Republikës. Mund të them jam i bindur se Presidenti do të veprojë në përputhje të plotë me detyrimin e tij kushtetues dhe të drejtën e tij kushtetuese se është kompetencë e tij.
Pyetje:Zoti kryeministër a ka shpresë për një kompromis me opozitën për çështjen e referendumit të imunitetit, pavarësisht vendimit të maxhorancës?
Kryeministri Berisha: Unë shoh që në 10 vite përpjekje opozita e sotme dhe qeveria e djeshme ka patur vetëm një qëndrim ndaj heqjes së imunitetit, jo dhe vetëm jo. E parë në këtë plan të shkon në mendje se më parë do të gjesh ndonjë zbulim eskimez në Sahara, se sa do të bindësh Edi Ramën për heqjen e imunitetit. Por, siç theksova varianti me deputetët, unë ftoj dhe nuk paragjykoj nga deputetët e maxhorancës, thirrjen , ftesën për qytetarët shqiptarë që të votojnë heqjen e imunitetit.
Pyetje: Gjatë viteve të fundit në deklaratat e ministrave tuaj dhe deputetët demokratë në Ora News është deklaruar se nga ana e ish kreut të SHISH ka patur një mungesë në raportimet për 21 janarin, madje është akuzuar ish kreu i SHISH për ndërhyrje në punët e brendshme politikës. A ju ka fshehur ish kreu i SHISH informacione për ngjarjet e 21 janarit dhe a ju ka çuar kjo në shkarkimin dhe zëvendësimin e tij?
Kryeministri Berisha: Zëvendësimi i kreut të SHISH ka patur dy arsye themelore. Së pari ju garantoj se në bindjet e mija më të thella, në këtë vend nuk mund të ketë mandat më shumë se 4 x 2 apo 7 x 1, pra çdo zyrtar i ekzekutivit duhet të jetë me një mandat të përcaktuar. Ky është rregulli i demokracisë. Ligji i vendit e barazon drejtorin e shërbimit informativ me ministrin, madje për mendimin tim ligji e çon pak më tutje pasi jashtë përcaktimit kushtetues, emërimin e zëvendësit të tij ia kalon Presidentit. Unë edhe ne draftin që dërgova në parlament kështu e lashë, nuk kisha ndonjë vërejtje. Normalisht, Presidentit, ato që ka të përcaktuara në Kushtetutë, nuk mund tia modifikosh, krijuan një precedent, krijuan një traditë. Unë jam dhe siç e dini e kam bërë publike këtë çështjen e një mandati të përcaktuar. Kjo do të ishte e mjaftueshme për mua. Ka një çështje të dytë, meqënëse e kam deklaruar dhe e deklaroj prapë. 21 janari ishte një nga ngjarjet më tragjike në historinë e këtij kombi, ishte një nga skenarët më ogurzi, i cili filloi me fjalime puçistë, u revokuan fjalimet puçistë të vitit ’ 24 , me fraza dhe me çdo gjë. U montua një video ku u implikua direkt kryeministri. Dhe pavarësisht se Televizioni që u detyrua të montojë në zyrat e Ramës, tha Jo, zoti Rama vazhdonte te thoshte; Po është zoti Berisha i implikuar. U parapri nga një sërë sloganesh puçistë, kufomash, përmbysjesh, tejkalimesh të Kushtetutës, etj. Për të gjitha këto burime, nga më të shumtat përfshi agjenci të huaja informuan qeverinë se në datë 21 janar do të jetë një përpjekje shumë e rëndë për dhunim dhe përdorim force. Institucioni i vetëm që me ligj varet nga kryeministri i vendit, pasi Shërbimi Informativ varet nga kryeministri, kështu thotë ligji i bërë nga paraardhësit e mi, pra ky shërbim nuk dha qoftë edhe një germë informacioni. Ju garantoj se kjo që ndodhi do të ishte një motiv i plotë për ta shkarkuar shefin e Shërbimit Informativ të vendit, cilido që të ishte ai. E bëri me qëllim apo pa qëllim, kjo është çështje e tij nuk është e imja, por unë kam bërë deklaratën time. Ka disa detyra në ligjin e shërbimit, në detyrimet që ka shërbimi ndaj institucioneve kushtetuese, në raste të cenimit dhe dhunimit të tyre. Por se çfarë e vendosi atë, në heshtje totale të paimagjinueshme, ky është një problem që sqarohet, por ky do të ishte një motiv i dytë absolut për shkarkimin e tij. Meqenëse në bindjen time më të thellë, se kurrë Edi Rama nuk do të guxonte të ndërmerrte atë që ndërmori, megjithë analizën e gjithanshme që unë i bëj atij, pa mbështetjen direkte të Topit të tij dhe ai ishte burimi i atij akti kriminal që ndërmorën ndaj vendit të tyre, unë natyrisht problemin e Shefit të Shërbimit nuk e zgjidhja dot me Topin. Ishte një fat i madh që Shqipëria ishte vend i NATO-s, shqiptarët duhet të ndihen shumë krenarë dhe të lumtur, ky problem po ecën në hullinë ligjore. Ai do të hetohet në mënyrën më absolute dhe ata të cilët organizuan përpjekjen për të përmbysur me dhunë një pushtet të dalë nga vota, çdo gjë ato fjalë që ju kam thënë në datën 21 janar, ora 19, këtu ato fjalë u përsëritën nga miqtë tanë më kryesorë, u përsëritën nga komisioni evropian. Nuk është problemi im fare. Ky është një problem në interes të qytetarëve shqiptarë. Hetimi do të jetë i plotë. Janë 4 qytetarë që kanë humbur jetën. Shpirtrat e tyre kërkojnë drejtësi. Kanë protestuar me qindra herë para dritareve të mija dhe nuk u ka hyrë një gjemb në këmbë. Ajo është një çështje që do të hetohet. Vendi e ka kusht hetimin e tij të mëtejshëm , të paanshëm . Do të ishte iluzive që ata që morën pjesë të pranonin hetimin, por do të ishte shumë e nxituar në qoftë se do të ndërmerreshin veprime të tjera. Po ecim sipas përcaktimeve kushtetuese. Do të them edhe nje gje tjetër meqë jemi këtu. Në asnjë rast dhe në asnjë rrethane zëvendësimi i drejtuesit të këtij institucioni nuk mund as të cenoje dhe të njollosë institucionin. Unë e kam thënë dhe po e përsëris prapë një nga vlerësimet e mija për pozitive për shërbimin informativ është ky: nga viti 2005 e deri më sot, nuk ka asnjë qytetar shqiptar që të ketë bërë qoftë dhe një ankesë se ky shërbim ka cënuar të drejtat e tij. Dhe kjo është një arritje e madhe. Ka një kontribut parësor në disa drejtime. Mund të ketë probleme në drejtime të tjera, por kjo është merita e konsolidimit të punës. Ka një avantazh të madh se bashkëpunon me agjencitë më të shkëlqyera të botës dhe ndihmohet prej tyre.
Të kthehemi pak më tutje. Çfarë deklarova për Gërdecin, thashë nuk ishte në detyrë, por aty u shkarkua shefi i shërbimit të ushtrisë. Nuk ishte përgjegjësi direkte, megjithëse jashtë çdo përgjegjësie nuk ishte sepse kompania nuk ishte ushtarake, ishte civile, por natyrisht përgjegjësia kryesore ishte në shërbimin inteligjent të ushtrisë dhe ia dhamë atë përgjigje. Dua të them një gjë, edhe ai shërbim ka merita absolutisht të mëdha në interesa të vendit. U gabua, por u mor një vendim. Pra kjo është historia e qëndrimit, nuk ka asgjë të fshehtë , nuk ka asgjë, kam qënë gjithnjë për një mandat të caktuar. Nuk u vendos pasi opozita e kundërshtoi ligjin. Më 21 janar po të mos dilte Topi në pozicionin që doli, qëndrimi do të mbahej, sigurisht sepse ajo ngjarje do të zbardhet, cilido qe ka pergjegjesine e tij, ajo do te zbardhet, pasi ky është interesi i vendit, jo interesi im. Unë jam kryeministër, po eci drejt zgjedhjeve. Shqiptarët e thanë me votën e tyre më 8 maj, do ta thonë përsëri, por vendi kërkon disa gjëra, pasi në qoftë se kapërdihen qëndrime të tilla të pahetuara dhe të pazbardhura plotësisht , atëherë ato përsëriten.
(ndërhyrje e gazetarit) A do të ketë ndonjë hetim ndaj ish kreut të SHISH ?
Kryeministri Berisha: Unë jam kryeministri dhe jo prokurori. Ata që do të hetojnë ndershmërisht çështjen dhe nuk mund ta hetojnë kurrë ata që shitën çdo ditë dokumente, shitën veten e tyre, ata që i çojnë çdo ditë dokumentet në media, ata bëjnë antihetim. Por prapë aty janë, ne kemi respektuar ligjet dhe Kushtetutën. A do të hetohet dhe si do të hetohet këto nuk janë çështje të miat sepse unë jam pala e agresuar , nuk i lejoj vetes unë as të bëj plan hetimi dhe as të merrem me hetimin. Ne jemi një vend i lirë dhe unë kam besim tek institucionet, por institucione të cilat nuk janë të lidhura me çështjen.
(ndërhyrje e gazetarit) Mos donit te thonit qe Presidenti Topi refuzoi te shkarkonte Bahri Shaqirin?)
Kryeministri Berisha: Vetëm këtë nuk e thashë, thashë se nuk iu kërkua zotit Topi se zoti Topi ishte absolutisht tërësisht prapa veprimit të Edi Ramës. Zoti Rama nuk kishte kurrë kurajë të ndërmerrte një veprim të tillë në qoftë se nuk kishte garanci të plota nga zoti Topi, i cili dëshmoi se çfarë ishte dhe se ç’fatkeqësi ishte për vendin që ai shndërroi Presidencën, institucionin kryesor, në një patiçke të vogël, siç nuk ka ndodhur kurrë në historinë e një vendi.
