Kryetari i Partisë Socialiste Edi Rama, gjatë një komunikimi me median duke u ndalur në çështjen e heqjes së imuniteteve, theksoi se është e domosdoshme që brenda shtatorit me transparencë të zhvillohen të gjitha diskutimet për ndryshimet kushtetuese të propozuara nga PS, me qëllim që vendit t’i jepet një shans për marrjen e statusit të vendit kandidat në muajin tetor. Iniciativën e deputetëve demokratë për t’iu drejtuar Kuvendit me një kërkesë për referendum për heqjen e imunitetit, Rama e cilësoi si një lojë pa top për të hutuar publikun.
Kryesocialisti Rama foli edhe për çështjen e kufirit detar me Greqinë e cila sipas tij duhet të marrë zgjidhje vetëm në bazë të reciprocitetit mes dy vendeve.
Duke u ndalur tek ngjarja e 21 janarit Rama tha se s’ka përgjigje më të mirë për Saliun se sa ajo që i dha xhaxhai i të ndjerit Aleks Nika: Krimineli kthehet gjithnjë në vendin e krimit dhe ky kthim i Saliut tek 21 janari na kujton se përgjegjësi kryesor për ato vrasje është ende në karrigen e kryeministrit të Shqipërisë. Herët ose vonë, nënvizoi kreu socialist, Sali Berisha kryeministri shqiptar i datës 21 janar 2011, do të duhet të rrëfehet para drejtësisë për gjakderdhjen e shkaktuar me armët e shtetit me pasojë vrasjen e katër qytetarëve të pafajshëm.
