Barbara Prammer, Kryetare e Parlamentit të Austrisë, është pritur sot në takim dhe nga Kryeministri Berisha.
Pasi i uroi përzemërsisht mirëseardhjen, Kryeministri Berisha e vlerësoi këtë vizitë si një kontribut të jashtëzakonshëm në konsolidimin e mëtejshëm të marrëdhënieve të shkëlqyera mes dy vendeve dhe miqësisë tradicionale midis dy popujve dhe kombeve tona. Kryeministri Berisha i shprehu zonjës Prammer mirënjohjen më të thellë për mbështetjen dhe ndihmën e çmuar e bujare që Austria mike i ka dhënë Shqipërisë gjatë gjithë këtyre viteve, në të gjitha përpjekjet e saj për konsolidimin e demokracisë, forcimin e shtetit ligjor, integrimin në NATO, e tashmë në procesin e integrimit në Bashkimin Evropian.
Kryetarja e Parlamentit të Austrisë, zonja. Prammer, e falënderoi Kryeministrin Berisha për pritjen e ngrohtë e miqësore, duke shprehur nga ana e saj kënaqësinë e veçantë për marrëdhëniet e shpëlqyera mes dy vendeve dhe qeverive dhe miqësinë e ngushtë midis dy popujve. Kryetarja e parlamentit austriak i konfirmoi Kryeministrit Berisha me këtë rast se, Austria do të vazhdojë ta mbështesë fuqishëm Shqipërinë në të gjitha përpjekjet e saj për anëtarësim në Bashkimin Evropian.
Zonja Prammer i bëri me dije Kryeministrit Berisha se në Austri po finalizohen procedurat për ardhjen e armëve të Heroit Kombëtar të Shqipërisë, Skënderbeut, në kuadër të 100 vjetorit të pavarësisë. Kryeministri Berisha, në emër të të gjithë qytetarëve shqiptarë, i shprehu zonjës Prammer mirënjohjen më të thellë, duke theksuar se, për shqiptarët Skënderbeu është dhe mbetet figura më e lartë e respektuar e kombit, vepra dhe kujtimi i të cilit mbajti gjallë shpirtin kombëtar, duke i dhënë një shtysë të madhe patriotike të gjitha përpjekjeve të shqiptarëve në shekuj, për pavarësi, liri dhe dinjitet kombëtar.
Më tej, në takim u rikonfirmua vullneti i të dy vendeve për të intensifikuar e zgjeruar bashkëpunimin e suksesshëm të deritanishëm, në të gjitha fushat. Në këtë kontekst, Kryeministri Berisha e falënderoi zonjën Prammer, për një sërë projektesh të suksesshme bashkëpunimi me Austrinë mike, si në fushën e arsimit, kulturës, dixhitalizimit të Regjistrit Civil, etj.
Në veçanti, në takim u vlerësua historia e suksesit të shkollës austriake që funksionon prej vitesh në Shkodër, e cila është një ndër vetëm 7 shkollat që Austria ka promovuar në mbarë botën, si dhe u ritheksua dëshira për ta zgjeruar këtë bashkëpunim edhe në qytete të tjera.
Duke u ndalur tek interesi i jashtëzakonshëm i investitorëve austriakë për të investuar në Shqipëri, Kryeministri Berisha e siguroi Kryeparlamentaren austriake se qeveria shqiptare ka krijuar klimën më të favorshme për biznes e investimet në vend dhe se investitorët austriakë do të gjejnë te qeveria shqiptare partneren e vendosur e të përkushtuar, në mënyrë që investimet e tyre të shndërrohen në histori suksesi për ata dhe për Shqipërinë. Në këtë kontekst, në takim u vlerësua si një projekt realisht i suksesshëm dhe një arritje e jashtëzakonshme inaugurimi që do të bëhet nesër, i hidrocentralit të Ashtës, e cila përbën një shembull brilant të bashkëpunimit të shkëlqyer midis dy vendeve. Në këtë kontekst, zonja Prammer e siguroi Kryeministrin Berisha se do të vijojë të nxisë biznesin austriak për të investuar në Shqipëri.
Duke u ndalur në procesin e integrimit evropian, Kryeministri Berisha e njohu Kryeparlamentaren austriake me të gjitha reformat e gjithanshme, të cilat e kanë shndërruar pamjen vendit, kanë zhvilluar ekonominë e saj dhe kanë përmirësuar cilësinë e jetesës së qytetarëve. Ai e siguroi zonjën Prammer se, për qeverinë shqiptare ky është një proces i bazuar tërësisht në meritë, për të cilin jemi të vendosur të miratojmë çdo reformë e nismë, në mënyrë që Shqipëria të bëhet sa më parë anëtare e BE-së.
Zonja Prammer vlerësoi arritjet e Shqipërisë gjatë kësaj periudhe në të gjitha fushat prioritare, duke theksuar se këto reforma e arritje i shërbejnë në radhë të parë cilësisë së jetës së qytetarit.
Gjatë diskutimit për nismën ligjore të heqjes së imuniteteve, Kryetarja e Parlamentit austriak i bëri me dije Kryeministrit Berisha se, edhe në vendin e saj, në Austri, ku imuniteti i zyrtarëve është në nivelet më minimale, po punohet për ta eliminuar apo reduktuar atë edhe më tej.
