Kryeministri Berisha priti dje në një takim zotin Branko Bistroviç, president i Unionit Adriatik të Kishës Adventiste, i cili i shprehu mirënjohjen për mbështetjen që ka pasur komuniteti i kësaj kishe në ambientin e bashkëjetesës fetare që karakterizon Shqipërinë.
Kryeministri Berisha vlerësoi prezencën e Kishës Adventiste, si pjesë e diversitetit të besimeve fetare në vendin tonë. “Respekti ndaj besimit të të tjerëve - tha ai - është një nga vlerat më themelore të qytetërimit shqiptar. Ai është trashëguar brez pas brezi, në kundërshtim me përpjekjet e pushtuesve për të përdorur diversitetin e besimeve si mjet përçarje, apo të komunizmit për ta fshirë nga ndërgjegjja kombëtare”.
Kryeministri premtoi mbështetjen e qeverisë së tij për iniciativat e Kishës Adventiste në fushën e bashkëpunimit ndër fetar, kulturës dhe solidaritetit social. Në takim morën pjesë edhe z. Leo Espana, President i Kishës Adventiste në Shqipëri dhe z. Julian Kastrati, sekretar Ekzekutiv i Kishës Adventiste në Shqipëri.
