Ministri i Punëve të Jashtme, z. Edmond Panariti, u nis në Berlin për të marrë pjesë në Konferencën e Ministrave të Jashtëm të vendeve të Evropës Juglindore të organizuar nga Instituti ASPEN, e cila zhvillohet në datat 22-24 nëntor. Në këtë konferencë do të marrin pjesë Ministri i Jashtëm i Gjermanisë, z. Guido Westerwelle, Zëvendësndihmës Sekretar Shteti i Departamentit Amerikan të Shtetit, z. Philipp Reeker, si dhe personalitete nga Turqia dhe Rusia.
Gjatë qëndrimit në Berlin, Ministri Panariti do të zhvillojë edhe një sërë takimesh dypalëshe, si ai me Kryetarin e Komisionit Parlamentar për Politikën e Jashtme të Bundestagut, z. Ruprecht Polenz dhe përfaqësues të tjerë të politikës gjermane.
