Kryetari i Bashkisë së Tiranës Lulzim Basha priti në një takim Asistent/Sekretarin e Ministrisë së Jashtme të shtetit të Katarit, z. Ali Bin Fahad.
Kreu i Bashkisë së Tiranës Lulzim Basha e ka njohur zyrtarin e lartë të shtetit të Katarit, me ecurinë e projektit të bulevardit të ri dhe rehabilitimit të lumit të Tiranës. Të hënën, projekti i detajuar, i përfunduar nga studio arkitekturore “Grimshaw” i dorëzohet zyrtarisht Bashkisë së Tiranës, duke i hapur kështu rrugë proceseve që i paraprijnë nisjes në terren të punimeve, për kthimin në realitet të këtij projektit strategjik për Tiranën.
Kryebashkiaku Basha ka shprehur mirënjohjen për gatishmërinë e shprehur nga Emiri i Katarit, Lartësia e Tij, Sheiku Hamad Bin Khalifa Al-Thani, për të mbështetur financiarisht realizimin e këtij projekti.
Z. Basha ka mirëpritur interesin e shprehur nga z. Ali Bin Fahad, që disa kompani shtetërore nga Katari, të vendosin aktivitetin e tyre në Tiranë, pikërisht në bulevardin e ri. Kryebashkiaku theksoi gjithashtu se Bashkia e Tiranës është e hapur dhe do të krijojë të gjithë lehtësitë e nevojshme, për çdo investitor që zgjedh Tiranën për të shtrirë aktivitetin e tij.
