Kryeministri i Republikës së Kosovës, Hashim Thaçi, i shoqëruar nga zëvendëskryeministri Behgjet Pacolli dhe ministra të tjerë të kabinetit qeveritar, ka vizituar qytetin e Mitrovicës, për të parë më afër projektet infrastrukturore që janë duke u zhvilluar në këtë qytet.
Fillimisht, kryeministri Thaçi ka vizituar punimet në Fabrikën e Përpunimit të Ujit në Shipol, një investim mbi 10 milionë euro.
“Kjo fabrikë plotëson nevojat e gjithë qytetarëve të territorit të Mitrovicës, në jug dhe në veri, por edhe për qytetin e Skënderajit, dhe sipas nevojës edhe për qytetarët e Vushtrrisë, derisa të përmbyllet projekti tjetër atje, i Fabrikës së Përpunimit të Ujit në Vushtrri” ka theksuar kryeministri Thaçi.
Më pas, kryeministri Thaçi është ndalur për të parë punimet në Objektin e Palestrës së re Sportive “Minatori” dhe Qendrës së Re Tregtare, projekti i të cilave arrin shifrën e 24 milionë eurove, si dhe fillimin e ndërtimit të objektit për Universitetin Publik të Mitrovicës.
Ëndrra e qytetarëve të Mitrovicës ka filluar të realizohet me ndërtimin e këtij Universiteti, që do të ketë kapacitet për rreth 9 mijë studentë, tha kryeministri Thaçi me këtë rast.
“Do të jetë një universitet bashkëkohor, me të gjitha kuadrat e nevojshme akademike” shtoi ai.
Në Mitrovicë po vazhdojnë punimet edhe në renovimin e Stadiumit Olimpik të Mitrovicës, projekt ky që u vlerësua shumë i domosdoshëm për të ardhmen, kur edhe Kosova do të mund të bëhet pjesë e garave ndërkombëtare.
“Ju e shihni, në gara të ndryshme, në ekipet tjera kombëtare, luajnë shumë shqiptarë të Kosovës, dhe ne jemi optimist se do të bëjmë ekipin njërin ndër më të fuqishmet dhe më cilësoret jo vetëm në rajon, por për t’i konkurruar kombëtareve evropiane dhe më gjerë” potencoi kryeministri Thaçi.
Vizita në Mitrovicë është përmbyllur në lagjen Kroi i Vitakut, ku është vizituar shtëpia e rinovuar dhe galeria brenda shtëpisë së Ali Kadrisë.
“Ne vizituam një galeri, që është galeri e pronarit, por është mesazh i jetës së re, i frymës së re, është mesazh i shpresës, i besimit dhe i kthesave që po ndodhin këtu” ka thënë kryeministri Thaçi.
Kryeministri Thaçi ka premtuar se Qeveria dhe autoritet komunale do të jenë gjithnjë pranë këtyre qytetarëve, me investime dhe aspekte tjera mbështetëse qeveritare.
“Është në interesin e të gjithëve që të gjithë qytetarët e të gjitha nacionaliteteve të kenë të drejtë të kthehen në pronat e tyre, në shtëpitë e tyre, dhe Qeveria e Kosovës do të jetë në shërbim pa dallim të gjithë qytetarëve, shqiptarë, serbë dhe të tjerëve që jetojnë në veri dhe jug” ka potencuar kryeministri.
Nga ana e tij, kryetari i Komunës së Mitrovicës, Avni Kastrati ka falënderuar kryeministrin për vizitën dhe për mbështetjen, duke theksuar se të gjitha premtimet e dhëna tashmë janë bërë të realizueshme.
Ndërsa Ali Kadriu ka kërkuar që amanetin e dëshmorëve ta plotësojmë me punë.
“Më keni bërë nder të madhe. Ne të gjallët kemi obligim moral që amanetin e dëshmorëve, të njerëzve që kanë rënë për këtë tokë, t’i plotësojmë me punë, me vepra” ka thënë Kadriu.
