Ministri i Punëve të Jashtme i Kosovës, Enver Hoxhaj, gjatë qëndrimit në Bruksel ka zhvilluar sot një takim me Komisionarin Evropian për Zgjerim dhe Politika Fqinjësore Evropiane, Štefan Füle.
Gjatë takimit, ministri Hoxhaj e ka falënderuar komisionarin Füle për hapjen e negociatave për Marrëveshjen e Stabilizim Asociimit, sa i takon procesit negociues dhe agjendës kohore të negocimit.
Hoxhaj ka theksuar rëndësinë e madhe që ka për Kosovën ky proces, duke qenë se është marrëdhënie kontrakuale ndërmjet Kosovës dhe Bashkimit Evropian dhe një instrument i rëndësishëm për ndërtimin e Kosovës evropiane si dhe për reformimin e vendit.
“Pa dyshim se ky është hapi i parë i pakthyeshëm i anëtarësimit tonë në BE”, tha ministri Hoxhaj, me këtë rast.
Komisionari Evropian për Zgjerim dhe Politika Fqinjësore Evropiane, Štefan Füle, e ka përgëzuar ministrin Hoxhaj për mbarëvajtjen e zgjedhjeve lokale të 3 nëntorit, si dhe për hapjen e negociatave për Marrëveshjen e Stabilizim Asociimit.
Komisionari Füle po ashtu ka rikonfirmuar vendosmërinë e Komisionit Evropian për të mbështetur Kosovën në rrugën e saj evropiane.
Gjatë takimit, ministri Hoxhaj dhe komisionari Füle kanë biseduar edhe për normalizimin e marrëdhënieve ndërmjet Kosovës dhe Serbisë dhe për implementimin e marrëveshjeve të arritura, duke e konsideruar si faktor kyç në transformimin e vendit edhe në kuptimin e integrimit edhe relacioneve ndërmjet Kosovës dhe Serbisë.
Hoxhaj dhe Füle po ashtu kanë folur për anëtarësimin e Kosovës në organizata të ndryshme rajonale, duke u pajtuar se pa Kosovën bashkëpunimi rajonal nuk është i plotë, duke qenë se ky bashkëpunim është shumë i rëndësishëm për të ardhmen e vendit dhe rajonit.
