Ministria e Financave ka gati draftin për ndryshime në të gjithë sistemin e taksave, ndërsa deklarohet e hapur për konsultime me biznesin. Drafti do të konsultohet me grupet e interesit gjatë javëve në vijim, me qëllim përmirësimin e tij. Nga ana tjetër përfaqësuesit e biznesit shprehen të gatshëm për të dhënë sugjerime konkrete, sidomos mbi mbledhjen e taksave. Kreu i Dhomës së Tregtisë Nikolin Jaka kërkon nga dikasteri i financave të ketë politikat fiskale të qëndrueshme në mënyrë që edhe pritshmëritë e biznesit dhe të sipërmarrësve të jenë të sigurta dhe natyrisht të jenë fizibël në parashikimet e tyre. Qeveria e re, në programin për vitet 2013- 2017, parashikon përgjysmimin e TVSH-së për ushqimet më jetike të shportës së konsumit.
Në këtë linjë edhe komuniteti i biznesit shprehet pozitiv, por kërkon që rritja e të ardhurave buxhetore të mos bazohet kryesisht në rritjen e nivelit të taksave. "Ne mirëpresim çdo sugjerim, veprim apo vendim që ministria e Financave bën për uljen e taksave, apo për përgjysmimin e TVSH-së, apo reduktimin e TVSHsë, për produkte apo shërbime që stimulojnë prodhimin apo nismat e sipërmarrësve shqiptarë. Jam i sigurtë në sugjerimet dhe propozimet që ne kemi bërë për Ministrinë e Financave që paratë për buxhetin e shtetit, për likuidimin e biznesit, paratë për shlyerjen e detyrimeve apo rimbusimin e TVSH-së, apo paratë që qeveria shqiptare i ka sipërmarrjes, apo qytetarëve shqiptarë, janë në Shqipëri, por janë në rrugën e informalitetit"- deklaroi Jaka.
