Ilir Meta në "Opinion". Intervista e plotë

Blendi Fevziu - Mirëmbrëma të nderuar teleshikues!
Ju flas nga studio e emisionit “Opinon”. Siç e keni ndjekur edhe nga spoti publicitar i televizionit gjatë këtyre ditëve, por edhe nga njoftimi që ne kemi bërë në faqen Opinion TV Klan në facebook, i ftuari i sotëm është kreu i Kuvendit të Shqipërisë, kryetari i LSI-së, zoti ilir Meta. Zoti Meta do të fokusohet te disa nga zhvillimet korrente politike. Sidomos në 2-3 ditët e fundit ka pasur disa zhvillime që nuk ishin parashikuar në axhendën fillestare të emisionit, si edhe do të flasë për gjithë bashkëqeverisjen socialiste dhe raportet e fundit me PD-në dhe maxhorancën e djathtë deri në prill 2013.
Zoti Meta, mirëmbrëma!

Ilir Meta – Mirëmbrëma!

Blendi Fevziu – Zoti Meta, do të doja të fokusoheshim te një pyetje në facebook, dhe kishte një numër të madh pyetjesh. Disa prej tyre unë do t’i zhvilloj në fund. Dua ta nis direkt me atë që ka ndodhur sot në seancën parlamentare, e cila u kthye në një seancë me mjaft përplasje dhe mjaft tension midis maxhorancës dhe opozitës, kryesisht Ramës dhe opozitës, por edhe jush, lidhur me dorëheqjen e zonjës Merjeme Delishi, kandidate e PS-së për deputete e Lezhës, e cila duhet të hynte pas largimit të zonjës Mimi Kodheli. Por jo vetëm të saj, por shoqëruar edhe me largimin e zonjës Mirela Neli, për t’i hapur rrugë një kandidati tjetër. Opozita pretendon se të dyja dorëheqjet e zonjave, si edhe dorëheqja e zonjës Silvana Maksuti e LSI-së në Durrës janë bërë nën presion. Madje, është folur për pengmarrje dhe situate të tilla. Megjithatë, për t’ua sjellë pak më në vëmendje të kujtesës, se mund të keni qenë pak i tensionuar gjatë drejtimit të parlamentit, po transmetojmë materialin e përgatitur.
(Ritransmetohet një pjesë nga seance plenare.)

Blendi Fevziu – Zoti Meta, a ka ushtruar një kandidate për deputete, praktikisht njihet si me një lloj imuniteti. A ka pasur presion ndaj kandidateve gra që të largohen dhe a po shkelet ligji në këtë rast?

Ilir Meta – Së pari, më vjen shumë keq që opozita mbetet gjithmonë në kuadrin e një propaganda destruktive, në rastin konkret.

Blendi Fevziu – Ka qenë edhe shtypi që i ka paralajmëruar këto ngjarje, zoti Meta!

Ilir Meta – Sepse opozita, e theksova edhe më parë gjatë seancës, për shkak të ndërhyrjeve destruktive të opozitës nuk u zhvillua ashtu siç do të duhet të ecte mbarëvajtja e Kuvendit sot për shumë çështje të rëndësime të rendit ët ditës, pra e gjithë kjo mbetet në kuadrin e një propagande destruktive, sepse në rast se opozita ka informacione të tilla, ajo mund të ndiqte rrugën e drejtësisë.
Së dyti, sa i takon rastit të PS-së, besoj se përgjigjen më të mirë zoti Berisha e mori nga zonja Mimi Kodheli, e cila ka qenë kryesuese e listës së PS-së në qarkun e Lezhës.

Blendi Fevziu – Si shpjegohet që tërhiqen dy kandidate femra njëra pas tjetrës, zoti Meta?

Ilir Meta – Kjo është një zgjedhje e tyre dhe e PS-së.

Blendi Fevziu- E lirë, apo nën presion?

Ilir Meta – Po më vjen shumë keq që ma bëni mua këtë pyetje. Unë përgjigjen time e dhashë. Edhe përgjigja e zonjës Kodheli është e regjistruar dhe mund ta jepni më vonë.

Blendi Fevziu – A keni ju dijeni për një presion ndaj këtyre kandidateve për deputete?
Ilir Meta – Unë nuk kam asnjë dijeni për presion ndaj asnjë kandidateje apo kandidati për deputet.

Blendi Fevziu – Meqenëse për dy kandidatet e PS-së nuk doni të flisni, përse është tërhequr kandidatja për deputete e LSI-së, Silvana Maksuti?

kryetari meta 24Ilir Meta – Mund t’ju jap një sqarim, i cili ka të bëjë me faktin se LSI-ja në qarkun e Durrësit fitoi një mandate deputeti dhe në krye të listës ishte zoti Lefter Koka, së bashku me zotin Edmond Panariti, i cili gjithashtu është ministër dhe të dy, për arsye të mospajtimit të mandatit të ministrit me atë të deputetit, një normë e vendosur nga ky koalicion, nuk mund të vazhdonin më për të ushtruar këtë funksion dhe ka qenë një vendim i vetë ekipit dhe i vetë skuadrës skandalle sepse kanë qenë 13 kandidatë, të cilët kanë qenë në listën e LSI-së për qarkun e Durrësit. Për shkak edhe të rezultateve të arritura, ku rreth i Krujës në qarkun e Durrësit rezultoi si rrethi më në vështirësi jo vetë në atë qark, por në gjithë Shqipërinë, pra si i vetmi rreth, ku LSI-ja nuk pati rritje, për arsye të vetë punës sonë në të kaluarën, kanë vlerësuar që edhe për këtë arsye, këtë mandate përfaqësimi ta marrë kandidati i tretë që ishte ne listën për deputet të qarkut të Durrësit, i cili është nga Kruja dhe është figurë e njohur në rrethin e Krujës, zoti Bujar Derveni. Kjo është një zgjidhje e tyre dhe unë e respektoj.

Blendi Fevziu – Një zgjidhje e tyre, ku zonjat që nuk kanë plotësuar kuotë 30%, sipas ligjit, largohen brenda një dite për t’u futur tre burra?

Ilir Meta – Së pari, kjo është propagandë. Dhe kjo propagandë nuk i shkon Partisë Demokratike dhe nuk i shkon zotit Berisha, i cili në 8 vjet qeveri pati vetëm një ministre grua.

Blendi Fevziu – Gabim ka bërë, por kjo nuk do të thotë që gabimet duhen përsëritur.

Ilir Meta – Nuk them se gabimet duhen përsëritur. Përkundrazi. Kam thënë gjithmonë se duhet të mësojmë nga gabimet e njëri-tjetrit, por mënyra e reagimit të zotit Berisha sot në Kuvend për këtë çështje ishte tepër destruktive dhe e pasinqertë, sepse kjo maxhorancë ka arritur si asnjë tjetër përfaqësimin e grave edhe në Kuvend edhe në qeverisje. Të mos harrojmë se kemi 6 ministra dhe në krye të shume institucioneve të rëndësishme ka zonja, për të cilat zoti Berisha nuk lë rast pa i denigruar gratë dhe vajzat e reja. Sa i takon LSI-së, mund të them me bindje të plotë se për herë të parë ne kemi këtë përfaqësim të konsiderueshëm dhe në rast se nga zgjedhjet e 23 qershorit ne patëm dy deputete, të cilat fituan në listat e Lëvizjes Socialiste për Integrim, sot, për shkak të ndarjes së mandateve të ministrave me deputetë, ne kemi katër deputete dhe do të përpiqemi për ta rritur më tej përfaqësimin e tyre, por askush nuk mund të gjykojë vendimet individuale dhe njëkohësisht edhe zgjidhjet që bëjnë forcat e caktuara politike.

Blendi Fevziu – Gjykimi vjen, zoti Meta, nëse vendimi i këtyre zonjave është marr nën presion, siç ka deklaruar shtypi gjatë këtyre ditëve dhe rrjetet sociale, që kanë postuar dhe kanë folur madje për pengmarrje dhe, e dyta, kam dëgjuar sot deputeten e Partisë Demokratike, që është kryetare e Aleancës së Grave, zonjën Mesila Doda, e cila është shprehur që në këtë parlament nuk mund të ketë vend edhe për ne, edhe për banditët.
Si Kryetar i Parlamentit të Shqipërisë a keni dijeni dhe a ka njerëz problematikë dhe me precedentë në Parlamentin e Shqipërisë?

Ilir Meta – Këtë duhet ta dijë më mirë zoti Berisha, sepse ai ka qenë edhe Kryeministër gjatë 8 vjetëve dhe ka pasur më shumë informacion, por nuk është detyra ime të bëjë hetime për deputetët. Në rast se prokuroria ka shqetësime për deputetët, unë jam i gatshëm të vë në lëvizje të gjitha procedurat parlamentare. Gjithashtu, nëse zoti Berisha ose çdo deputet tjetër kanë informacione për njëri-tjetrin, t’i çojnë në prokurori. Ky është qëndrimi im.

Blendi Fevziu – A keni dijeni se sa për qind e deputetëve të parlamentit shqiptar kanë diplomë të shkollës së lartë?

Ilir Meta – Nuk kam ndonjë dijeni për këtë çështje. CV-të e të gjithë deputetëve janë publike. Në rast se keni ndonjë pyetje konkrete, mund t’ua drejtoni deputetëve konkretë.

Blendi Fevziu – Kur t’i kem këto informacione, do t’jua drejtoj atyre për të cilët kam dyshime.
Zoti Meta, dje televizioni “News 24” ka publikuar, në fakt është një video e marr nga videot e sigurisë së selisë së Drejtorisë së Përgjithshme të Tatimeve, në të cilën shfaqet deputeti i Lëvizjes Socialiste për Integrim, zoti Spartak Braho, i shoqëruar nga një këshilltar i Kryeministrit, i cili është njëri prej ekspertëve i cili ka punuar për videon tuaj të emisionit “Fiks fare”, që hyn në Drejtorinë e Tatimeve (po shohim në ekran momentin e hyrjes) dhe më pas, insistoj më pas kësaj hyrjeje, sepse pashë intervistën e drejtoreshës së Përgjithshme të Tatimeve, janë fshirë të dhënat, kanë tentuar kopjimin, sipas drejtorit të IT-së, e të gjitha të dhënave të serverit dhe më pas ka figuruar se është fshirë një numër i madh të dhënash. Nuk bëheshin dot aplikimet on-line të deklarimeve tatimore të personave e të subjekteve dhe është kthyer në një çështje të cilën po e heton aktualisht prokuroria.
Pyetja ime e drejtpërdrejtë është: çfarë kërkonte deputeti i Lëvizjes Socialiste për Integrim, i shoqëruar nga dikush tjetër, në zyrat e tatimeve dhe pse duhet të hynte në një vend, po e quaj, me kaq rëndësi të veçantë sa është vendi ku ndodhen deklarimet personale të pothuajse gjithë shqiptarëve?

Ilir Meta – Unë besoj se kemi të bëjmë me një spekulim, por jo vetëm. Duket qartë që kemi të bëjmë edhe me panik.

Blendi Fejziu – Është videoja.

Ilir Meta – Më fal, por çfarë video është ajo?!
Është spekulim, por edhe panik, sepse e para pyetje që duhet të na vijë të gjithëve në mendje është: pse drejtori i IT-së së tatimeve shkon te selia e Partisë Demokratike dhe merret menjëherë në mbrojtje nga lideri i kësaj force politike, zoti Berisha, i cili afishohet hapur dhe publikisht me të, ndërkohë që denoncimin e parë për këtë çështje dhe në prokurori e ka bërë vetë Drejtoria e Përgjithshme e Tatimeve?

Blendi Fejziu – Pasi kishin hyrë persona të paautorizuar dhe ishte bllokuar serveri. Ata kishin kërkuar kopjimin e të gjitha të dhënave.

Ilir Meta – Ju mund të bëni emision dhe të thërrisni zotin Braho, ai çantën me vete e ka, është mjeshtër për punët e videove.

Blendi Fejziu – Vazhdon akoma ta ketë atë çantë?

Ilir Meta – Ka edhe një çantë tjetër.
E kam fjalën, për të qenë më seriozë me qytetarët që na ndjekin se kjo nuk është një çështje e cila lë dhe do të lërë vend për spekulime, pavarësisht nga përpjekjet, të cilat, për mua, vijnë më shumë nga paniku. Pse e them këtë gjë? Sepse çdo ndërhyrje që bëhet, këtë duhet të dijë ish-drejtori i IT-së që del në konferencë shtypi, duhet ta dijë çdo zotëri tjetër, lë gjurmë dhe çdo gjurmë rikuperohet. Kështu që nuk ka asnjë gjë të pamenaxhueshme në këtë çështje. Zoti Braho ka dhënë sqarimin e tij, ndërkohë që nuk ka pasur ndonjë zbulim të madh, sepse zoti Braho më ka vënë edhe mua në dijeni si kryetar Kuvendi për dijenitë që ai ka pasur për rastin konkret, në cilësinë e tij si kryetar i Komisionit të Sigurisë Kombëtare, me anë të një shkrese zyrtare prej shumë kohësh. Një shkresë të tillë ia ka bërë edhe Kryeministrit, zotit Rama, duke kërkuar një vëmendje të veçantë dhe ekspertizë ndërkombëtare për këtë çështje, ku sipas tij, nuk mund të komentoj ato informacione dhe të dhëna që ai ka, rezulton një problem i madh.

Blendi Fevziu – Ka folur për komplot financiar të ish-Kryeministrit Berisha.
Çfarë do të thotë komplot financiar?

Ilir Meta – Pyesni zotin Braho. Nuk jam zëdhënësi i zotit Braho.

Blendi Fevziu – Jeni kryetari i Lëvizjes Socialiste për Integrim dhe Kryetar i Kuvendit dhe nëse do të kishte një komplot financiar të këtyre përmasave, ju duhet të kishit dijeni.

Ilir Meta – Zoti Braho, ka qenë atje si kryetar i Komisionit të Sigurisë Kombëtare.

Blendi Fevziu – Nënkryetari i Komisionit të Sigurisë, zoti Flamur Noka, deklaron se nuk ka një vendim të Komisionit të Sigurisë për të shkuar zoti Braho atje.

Ilir Meta – Nuk quhet ajo që ka thënë Flamuri.

Blendi Fejziu – Materiali nr.15.
(Inserti)
Pra, nuk ka një vendim të Komisionit të Sigurisë Kombëtare, thotë zoti Noka, që është nënkryetar i këtij komisioni, zoti Meta.

Ilir Meta – Nuk vlen si dëshmitar zoti Noka, të lutem!

Blendi Fevziu – Cilin nga kriteret e dëshmitarit nuk plotëson.

Ilir Meta – Duhet të kesh më shumë besim te zoti Braho në cilësinë e tij si kryetar i Komisionit të Sigurisë Kombëtare. Ish-drejtori, si dhe të gjithë ata që mund të kenë punuar dhe mund të kenë vënë dorë atje, përfshirë edhe zotin Braho, meqenëse ju po pyesni, duhet të jenë të bindur e të qartë se çdo ndërhyrje lë gjurmë dhe gjithçka rikuperohet. Prandaj edhe zoti Braho është shumë i qetë, sepse e di shumë mirë këtë gjë.
Të tjerët, të cilët po përpiqen të krijojnë ngjarje sikur çfarë ka ndodhur, thjesht janë në panik. Edhe atyre u them të qetësohen, sepse çdo gjurmë është atje dhe gjithçka është e rikuperueshme.

Blendi Fevziu – Ndërkohë duket se ka një mospërputhje mes deklaratave të zotit Braho, pas daljes së kësaj videoje, dhe deklaratave të drejtoreshës së Përgjithshme të Tatimeve, e cila thoshte sot në gazetën “Shekulli” se zoti Braho ka ardhur, por ka shkuar në një zyrë tjetër, pra se nuk ka pasur lidhje me të, ndërkohë që zoti Braho thotë se ka shkuar për të zbuluar një komplot të madh të zotit Berisha, i cili kishte lidhje me këtë çështje. Edhe vetë zyrtarët e shtetit shqiptar janë të paakorduar.

Ilir Meta – Nuk ka lidhje me këtë çështje se çfarë ka thënë drejtoresha në një gazetë dhe çfarë ka thënë zoti Braho në një televizion. Unë ju thashë një gjë që është esenciale për të gjithë ata që na ndjekin. Çdo ndërhyrje, çdo fshirje, lë gjurmë dhe rikuperohet.

Blendi Fevziu - A lë gjurmë fakti, për shembull, që prokurori i çështjes është tërhequr dhe për hetimin e kësaj ngjarjeje është caktuar Juli Zonja, bashkëshorti i zonjës Ornela Zonja, që ka qenë kandidate për deputete e LSI-së?

Ilir Meta – Nuk e di fare këtë fakt, por mund t’ju them dhe një herë tjetër se çdo ndërhyrje lë gjurmë, çdo fshirje, çdo përpjekje për manipulim dhe gjithçka rikuperohet. Këtë jua jap me garanci 100%.

Blendi Fevziu – Si kryetar i Kuvendit a jeni në dijeni se çfarë ka ndodhur?

Ilir Meta – Zoti Braho prej disa javësh për këtë çështje ka kërkuar zyrtarisht ekspertizë ndërkombëtare. Natyrisht kjo nuk është e drejtë e zotit Braho, se ai nuk e ka këtë, ka të drejtën e përvojës, siç mund ta kërkojë çdo njeri. Kjo është një çështje që i takon prokurorisë, por ai e ka kërkuar ekspertizën për t’i dhënë besueshmërinë më të madhe të gjithë këtij procesi ngaqë është një proces i ndjeshëm.

Blendi Fevziu - Pse është bllokuar serveri? A keni dijeni, zoti Meta?

Ilir Meta – Jo, nuk kam dijeni fare për këtë çështje.

Blendi Fevziu - Pse nuk është lejuar opozita të ngrejë një komision hetimor parlamentar për këtë çështje?

Ilir Meta – Së pari, sepse bie në kundërshtim me parimin e ndarjes së pushteteve.
Dhe së dyti, sepse Gjykata Kushtetuese në të kaluarën ka marrë disa vendime për të sqaruar raste te tilla, ku shprehet në mënyrë të qartë. Kjo gjë u është bërë e qartë edhe përfaqësuesve të opozitës në seancë plenare. Deri sa të fillojë hetimin prokuroria për këtë çështje, nuk mund të hetojë edhe Kuvendi. Pra, është një presion mbi një institucion të pavarur nga Kuvendi.

Blendi Fevziu – Zoti Meta, një nga eventet e tjera të rëndësishme të kësaj jave, po e quaj kështu, ka qenë përkujtimi i 3-vjetorit të 21 janarit, një ngjarje për të cilën kemi dijeni, është diskutuar shumë më pas. Përse ju vetë nuk morët pjesë në përkujtimore?

Ilir Meta - Unë kam qenë në Marsejë, në konferencën e organizuar nga Presidenti i Senatit francez dhe Kryetari i Parlamentit të Francës, që është Asambleja Parlamentare e vendeve të Mesdheut.

Blendi Fevziu – Zoti Meta, çfarë ka qenë për ju 21 janari? Si do ta përkufizoni ju 21 janarin? A keni ndryshuar mendim për të?

Ilir Meta – Unë do të kisha dëshirë që kjo ditë të mos ishte në kalendarin e vendit tonë. Sigurisht është një ditë që na fton të gjithëve për të reflektuar vazhdimisht, për të normalizuar politikën dhe për të mos konfrontuar qytetarët dhe politikanët me njëri-tjetrin.

Blendi Fevziu - Zoti Meta, a keni ndryshuar ju mendim sot për atë që ka ndodhur më 21 janar krahasuar me mendimin që keni pasur 3 vjet më parë?

Ilir Meta – Cilin mendim?

Blendi Fevziu – Materiali nr.5, një material që e ka transmetuar televizioni Klan dje dhe pardje.( material audioviziv)
Ndërkohë po dje Petrit Vasili, një nga krerët e Lëvizjes Socialiste për Integrim, ka marrë pjesë në homazhe. Materiali nr.6, vetëm mbulim ju lutem!
A mund të marrësh pjesë në homazhe për persona që ju i quani halabakë, rrugaçë dhe kriminelë që sulmojnë shtetin?

Ilir Meta –Së pari, më vjen keq se pa dashje ju po përdhosni kujtimin e 4 viktimave të pafajshme.

Blendi Fevziu – Po ju pyes për deklaratat.

Ilir Meta – Më vjen keq, sepse ju po spekuloni fund e krye.

Blendi Fevziu – Ky është material filmik.

Ilir Meta – Ajo që është thënë varet se si interpretohet. Kemi dy çështje të ndryshme, qëndrimin për këta elementë, të cilët u konfrontuan me policinë, qëndrimin për qytetarët, pjesa masive...

Blendi Fevziu – Ata që ambasadori amerikan i quajti “një grup me axhendë të paracaktuar”?

Ilir Meta – ... të cilët ishin pjesëmarrës dhe nuk kryen asnjë akt konfrontimi dhe natyrisht ajo që është më e rëndë, kemi edhe 4 viktimat e kësaj ngjarjeje tepër tragjike, të cilët ishin njerëz, qytetarë krejtësisht të pafajshëm dhe pamjet që kemi parë kanë treguar që janë vrarë në mënyrën më të papranueshme, më absurde dhe më kriminale.

Blendi Fevziu –Nuk kanë qenë sulmues të policisë.

Ilir Meta – Prandaj them se ky është një spekulim. Qëndrimi i LSI-së lidhur me çështjen e hetimit për 21 janarin dhe për vrasjen e 4 qytetarëve të pafajshëm nuk ka ndryshuar. Qëndrimi është deri në fund: drejtësi dhe zbardhje për këtë ngjarje. Përgjegjësit të shkojnë përpara drejtësisë. Pra, nuk duhet të ngatërrojmë një qëndrim për ata elementë që janë konfrontuar me policinë, një grup i kufizuar, me pjesëmarrjen e gjerë të qytetarëve.
Ju keni zgjedhur ato pamje që e bëjnë më interesante këtë emision, është e drejta juaj, por edhe unë kam të drejtë të bëj të qartë diferencimin sipas kategorive.

Blendi Fevziu – Ka pasur një grup, i cili ka sulmuar policinë dhe është përbërë nga kriminelë ose njerëz problematikë?

Ilir Meta – Patjetër që ka pasur një grup që ka sulmuar policinë, që është përplasur me policinë. Kjo është parë në mënyrë të qartë.

Blendi Fevziu – Ju e dënoni sërish këtë si akt, zoti Meta?

Ilir Meta – Absolutisht po. Çdo akt që provokon rendin, provokon punonjësit e policisë, në çdo kohë, unë e dënoj, e quaj të papranueshëm, por vrasja e 4 qytetarëve është e pafalshme, e patolerueshme, sepse bëhet fare e qartë, fare evidente se këta 4 qytetarë nuk kanë qenë duke sulmuar policinë, përkundrazi, kanë qenë protestues.

Blendi Fevziu – A ka pasur një gjykim të drejtë dhe të plotë 21 janari sipas jush, zoti Meta?

Ilir Meta – Unë jam politikan, aktualisht jam edhe kryetar Kuvendi dhe nuk më duhet të shpreh as rezerva, në qoftë se i kam këto rezerva, se kjo është çështje në proces. Ajo që kam kërkuar unë dhe LSI-ja, dhe që Petrit Vasili ka thënë, është se qëndrimi për këtë çështje nuk ndryshon, është drejtësi deri në fund, pa ndërhyrje të politikës për këtë çështje.

Blendi Fevziu – A ka pasur një grusht shteti më 21 janar, zoti Meta?

Ilir Meta – Kjo është një çështje që përsëri i takon drejtësisë për ta sqaruar. Çfarë vlere ka se çfarë do të thosha unë në këtë rast?

Blendi Fevziu – Në gjykimin tuaj a ka pasur një tentativë për të marrë institucionet e shtetit atë ditë?

Ilir Meta – Unë mendoj se përgjigjen time e dhashë dhe sa më shumë krijohet distancë në kohë nga 21 janari i 3 vjetve më parë, aq më shumë duhet të reflektojmë për të bërë një politikë shumë më të përgjegjshme, krejt ndryshe dhe jashtë gjuhës së konfrontimit, sepse konfrontimi, për fat të keq, sjell vetëm pasoja.

Blendi Fevziu – Zoti Meta, 21 janari erdhi si pasojë e një proteste të organizuar nga PS-ja, por të lënë nën drejtimin e popullit, siç tha PS-ja e asaj kohe, që erdhi pas publikimit të një videoje nga emisioni “Fiks fare” të regjistruar në zyrën e ish-ministrit Dritan Priftit, mes jush dhe zotit Prifti. A i qëndroni ende bindjes suaj që ajo video ka qenë montazh?

Ilir Meta – Nuk ka nevojë t’i qëndroj unë, sepse kjo është një çështje tërësisht e verifikuar nga një proces tepër i gjatë gjyqësor. Unë kam qenë tërësisht i bindur për këtë çështje, ashtu sikurse për ta shkarkuar sa më shumë tensionin politik dhe ndjeshmërinë e opinionit publik që u krijua për shkak të manipulimit mediatik, për të pasur të gjithë kohën e duhur për ta sqaruar këtë çështje, e cila natyrisht do të kërkonte kohën e duhur, unë kam dhënë dorëheqjen...

Blendi Fevziu – Po, keni hequr dorë edhe nga imuniteti.

Ilir Meta –Për kuriozitetin tuaj, zoti Berisha nuk ishte dakord që unë të jepja dorëheqjen, sepse ai ishte po kaq i bindur se bëhej fjalë për një manipulim.

Blendi Fevziu – Pse nuk ishte dakord zoti Berisha?

Ilir Meta – Sepse ishte i bindur se kjo video ishte një manipulim, ishte një montim.

Blendi Fevziu – Çfarë keni biseduar me zotin Berisha në kohën kur doli videoja?

Ilir Meta – Kjo nuk është shumë e rëndësishme, por, së pari, po ju them se unë vendosa të jepja dorëheqjen, sepse e kuptova që kjo do të instrumentalizohej për të krijuar një tension të panevojshëm politik.
Së dyti, nuk shkonte që unë të mbrohesha përpara prokurorisë dhe gjykatës duke qenë zëvendëskryeministër. Prandaj dhashë dorëheqjen menjëherë, pra një javë ose më shumë përpara ngjarjes në fjalë. Kam shkuar vetë në prokurori, ku kam kërkuar të hetohet dhe të fillojë çështja pa u bërë procedurat nga parlamenti për imunitetin. Më pas kam ndjekur të gjitha shkallët. Kur i kisha të gjitha mundësitë për ta mbyllur për shkak të shkeljeve të procedurave nga ana e prokurorisë, kam kërkuar dhe insistuar që çështja të shkojë deri në fund, në themel, në mënyrë që të provohej e gjitha historia si një montazh.

Blendi Fevziu – Zoti Meta, a e keni sqaruar këtë moment me drejtuesit e emisionit “Fiks Fare” dhe me zotin Çakulli, që është edhe miku juaj aktualisht? Në rrjetet sociale është shfaqur fotoja juaj me zotin Çakulli, ku ju ose e uroni, ose i dhuroni një çmim investigativ.

Ilir Meta – Në lidhje me këtë raport, ju e dini se raporti im me mediet dhe gazetarët ka qenë gjithmonë shumë miqësor, edhe kur ata për arsye të profesionit dhe për çdo arsye tjetër nuk kanë qenë të tillë, sepse ky është qëndrimi im ndaj medieve dhe gazetarëve. Askush nuk duhet të presë nga unë që për shkak të një emisioni që ka bërë “Fiks Fare” ose Blendi Fevziu të mos u jap dorën, apo më keq t’i marr inat. Absolutisht jo. Është një përgjegjësi profesionale e cilitdo.

Blendi Fevziu – A ka pasur dorë në montimin e kësaj videoje, ju thoni se është e montuar, kreu i PS-së, zoti Edi Rama.

Ilir Meta – Kjo nuk është një çështje që më preokupon dhe më intereson, për mua është e rëndësishme që të gjithë të kuptojmë se sa e rëndësishme është në politikë evitimi i konfrontimeve të panevojshme.

Blendi Fevziu – Zoti Meta, ju i keni refuzuar në njëfarë mënyre që prej vitit 2009 ofertat e PS-së ose struktura të caktuara për t’u shkëputur nga mazhoranca e asaj kohe, me të cilën kishit një marrëveshje 4-vjeçare, që e respektuat, dhe për të krijuar një qeveri me pakicë ose shumicë parlamentare, e cila nuk reflektonte shumicën e dalë nga zgjedhjet e 2009-s. Në fakt, pasi të shohim një material filmik, kam një pyetje për qeverinë e re të krijuar nga zoti Rama.
(Kronikë)
Ishte ofertë për të krijuar një qeveri të krimit të organizuar. Atëherë nuk u krijua, zoti Meta, në vitin 2010, a mos u krijua me qeverinë e re?

Ilir Meta – Më vjen shumë keq, sepse jeni lodhur kaq shumë për të gërmuar në arkivat tuaja...

Blendi Fevziu – Është kollaj fare, gjendet në “youtube”.

Ilir Meta – Nuk ka problem, sepse është pasioni juaj, të cilin unë e respektoj. Ajo për të cilën jam i bindur është se ne kemi krijuar një qeveri që punon për të ardhmen e Shqipërisë dhe një qeveri e cila ka në themel disa parime të qarta dhe të nënshkruara në marrëveshjen për krijimin e koalicionit “Për Shqipërinë europiane”, por mbi të gjitha ka në themel të saj reflektimin e disa politikanëve, sepse nuk dua të përmend vetëm dy politikanë, zotin Rama dhe unë, të cilët kanë përgjegjësi për të parë nga e ardhmja dhe për t’i dhuruar vendit jo tension, por paqe, bashkëpunim dhe mirëkuptim. Natyrisht, ju mund të vazhdoni të jepni edhe inserte të tjera dhe unë nuk mund t’ju them se ai nuk është Ilir Meta, por është Ilir Meta i vitit 2009 apo i vitit 2010. Sot unë jam Ilir Meta i 23 janarit të vitit 2014 dhe kam mësuar shumë edhe nga gabimet e mia, edhe nga gabimet e kolegëve të tjerë, bashkëpunëtorë apo kundërshtarë, dhe besoj se ky është edhe çelësi i suksesit tim në politikë, që të përmirësohem vazhdimisht. Natyrisht, besoj se edhe ata qytetarë, të cilët votuan në mënyrë kaq masive “Aleancën për Shqipërinë Europine”, kanë vlerësuar te ne edhe këtë ndjenjë reflektimi.

Blendi Fevziu – “Të përmirësohem vazhdimisht” –thatë tani. Kjo do të thotë se nuk keni qenë i mirë në atë video ose në ato deklarata.

Ilir Meta – Të përmirësohem vazhdimisht patjetër, nesër më mirë se sot.

Blendi Fevziu – Zoti Meta, si po shkon qeverisja me Ramën, a jeni i kënaqur me të?

Ilir Meta – Mendoj se qeveria po ecëm me mjaft angazhim dhe përkushtim. Është një qeverisje jo e lehtë, por e vështirë për arsye të problemeve të akumuluara në të gjitha drejtimet, problemet ekonomike dhe financiare, që janë të panumërta, natyrisht edhe ato sociale, sepse përderisa janë ato financiare dhe ekonomike ato reflektojnë menjëherë probleme të cilat kanë të bëjnë me sistemin e drejtësisë dhe me funksionimin e tij në mënyrë transparente dhe efikase. Pra, kemi probleme të mëdha që janë akumuluar, por ka shumë përkushtim, energji dhe vendosmëri për t’u ballafaquar me problemet, për t’i pranuar ato ashtu siç janë dhe për t’i vënë në rrugën e zgjidhjes. Kështu që në këtë kompleksitet vlerësoj se është një ecuri mjaft pozitive dhe solide.

Blendi Fevziu – Dua t’ju pyes për disa nga pikat e qeverisjes, të cilat sipas meje janë më problematike ose më të diskutueshme. Me zotin Berisha gjatë koalicionit të viteve 2009-2013 keni pasur 20% të pushtetit, sipas marrëveshjes. Tani ju pyes: sa për qind të pushtetit keni me socialistët, zoti Meta?

Ilir Meta – Së pari, unë nuk e shikoj çështjen e pushtetit si ndarje përqindjesh, por si ndarje dhe marrje përgjegjësish të përbashkëta. Kështu që për sa i takon pyetjes së parë, as unë dhe as LSI-ja nuk i kemi kërkuar asnjëherë ndonjë përqindje. Ka qenë një metodë apo një eksperiencë e zotit Berisha, i cili ka pasur eksperienca të tilla edhe më përpara dhe nuk i kemi thënë as 15%, kaq apo aq.

Blendi Fevziu – Në ndarje pushteti nuk besoj se zoti Berisha ka pasur eksperienca të tilla përpara.

Ilir Meta – Nuk ka rëndësi.

Blendi Fevziu – Si koncept...

Ilir Meta – Më fal, po jap një sqarim. Nuk ka qenë një kërkesë e jona.

Blendi Fevziu – Nuk ka qenë e LSI-së?

Ilir Meta – Jo, kjo nuk ka qenë kërkesë e LSI-së. Nuk kemi vënë kusht me zotin Berisha se do të kemi kaq ministri apo aq, megjithëse po të kërkonim, mund të merrnim sa të kërkonim.

Blendi Fevziu – Ka qenë ofertë e Berishës që ju ta ndani pushtetin me të në këto përqindjet e famshme?

Ilir Meta – Nuk është ndarë ashtu siç është pretenduar. Ka qenë si një lloj treguesi orientues. Ky është më shumë një spekulim. Me zotin Berisha kemi pasur një funksionim shumë të mirë për sa i takon aspektit parimor, pavarësisht se shpesh nuk kemi qenë dakord për çështje të ndryshme, ndonjë prej të cilave është bërë edhe publike, kurse të tjerat nuk janë bërë publike. Mendoj se ka pasur një luajalitet me të. Të paktën mes ne të dyve si kryetarët e dy forcave politike. Asnjëherë nuk kemi pasur ndonjë debat të rëndësishëm për çështje pushteti apo për çështje ndarjesh. Absolutisht!

Blendi Fevziu – A bashkëqeverisni ju me Ramën siç ju konsideron zoti Berisha apo kreu i PD-së, zoti Basha?

Ilir Meta – Unë nuk do të përgjigjesha me “a bashkëdrejtojnë ata opozitën tonë”?, sepse kjo është çështja e tyre. Mendoj se secili prej nesh ushtron përgjegjësitë e tij të plota, zoti Rama si Kryeministër i “Aleancës për Shqipërinë Europiane” dhe unë si Kryetar i Kuvendit, i zgjedhur me propozimin dhe me mbështetjen e kësaj Aleance.

Blendi Fevziu – Zoti Meta, ju keni bashkëpunuar me zotin Berisha, po bashkëpunoni me zotin Rama, ku qëndron ndryshimi midis të dyve?

Ilir Meta – Unë kam bashkëpunuar...

Blendi Fevizu – Mund të jeni i sinqertë këtu.

Ilir Meta – Unë në përgjithësi kam bashkëpunuar shumë mirë me zotin Berisha. Të jeni të sigurt, pavarësisht se çfarë mund t’ju thotë në kamera, por po ta pyesni jashtë kamerave, do t’ju thotë se ka mbetur shumë i kënaqur nga bashkëpunimi me mua. Megjithëse u bë pak zemërthyer më 1 prill. E vërteta është se në fakt marrëveshja nuk u bë më 1 prill, por dy ose tri ditë më përpara.

Blendi Fevziu – Marrëveshja me Ramën?

Ilir Meta – Po, por më 1 Prill u bë takimi.

Blendi Fevziu – Dy ditë para apo gjatë darkës se famshme të “ngjalave”?

Ilir Meta – Jo, u bë dy ose tri ditë para 1 prillit. Unë do ta kisha komunikuar më përpara, por ato dy ditë nuk isha në Shqipëri, sepse mendimi im ka qenë gjithmonë që një politikan mund të bëjë marrëveshje me këdo, por nuk mund të ketë dy marrëveshje në të njëjtën kohë. Unë kam pasur një marrëveshje me zotin Berisha, së cilës i kam qëndruar në mënyrën më korrekte dhe, siç është në natyrën e LSI-së, ne e respektuam këtë marrëveshje deri në fund të mandatit, pastaj bëmë zgjedhjen tonë të pavarur.

Blendi Fevziu – Me cilin është më vështirë të punosh, ose edhe më thjesht, me Berishën apo me Ramën?

Ilir Meta – Unë nuk shikoj vështirësi. Të dy kanë elemente të përbashkëta, por absolutisht që ky koalicion është shumë më i natyrshëm, sepse...

Blendi Fevziu – Çfarë kanë të përbashkët Berisha dhe Rama, sipas jush në raport me LSI-në?

Ilir Meta – Këtu nuk bëhet fjalë në raport me LSI-në.

Blendi Fevziu – Po të përbashkët si drejtues?

Ilir Meta – Fakti që kanë pasur dhe kanë këtë karrierë tregon se nuk janë të rastësishëm. Pra, janë njerëz që kanë përkushtim, energji dhe vizion.
Për sa u takon problemeve të tjera, nuk jam këtu për të bërë gjykatësin e tyre.

Blendi Fevziu – Nuk e kërkoj as unë këtë gjë.

Ilir Meta – Përkundrazi, ajo që mund t’ju them është se ky është një koalicion i natyrshëm. Koalicioni i mëparshëm ishte i sforcuar dhe i imponuar nga zgjedhjet e vitit 2009, një koalicion që ua imponuam më shumë unë dhe Berisha dy partive. Koalicioni me PS-në është shumë i natyrshëm, pavarësisht se kemi pasur edhe një periudhë jo shumë miqësore midis dy forcave politike.

Blendi Fevziu – Megjithatë, ju thoni se është një koalicion i natyrshëm. Pra, koalicioni është i natyrshëm nga ana ideologjike, por marrëdhënia juaj me zotin Rama ka qenë shpesh problematike, të paktën në dy rastet paraardhëse, kur keni bërë marrëveshje, keni dalë ose ju i humbur, ose Rama nuk ka qenë korrekt. Kështu është thënë. Në rastin kur u përfshitë në një luftë të përbashkët kundër Fatos Nanos brenda PS-së, në rastin kur bëtë koalicion në zgjedhjet e vitit 2007...

Ilir Meta – Këto i takojnë së kaluarës.

Blendi Fevziu – Jo! Ku mbështetet këtë herë besimi se kjo marrëdhënie që dy herë ka qenë skarco do të funksionojë herën e tretë?

Ilir Meta – Unë jam shumë optimist. Ju mendonit se nuk do të funksiononte as me doktorin, por ja që funksionoi për katër vjet. Pastaj, kështu menduat edhe kur u shpall koalicioni më 1 prill, sepse ju thashë që ishte bërë dy-tri ditë përpara, se do të dështonte, përkundrazi, ka funksionuar shumë mirë deri tani. Kështu që duhet të kalisni durimin se kam besim se do ta vazhdojë të funksionojë gjatë për një arsye shumë të rëndësishme, sepse vendi ka nevojë për një koalicion të qëndrueshëm, vendi ka nevojë që të gjithë ne të vendosim interesin e vendit dhe të publikut edhe mbi interesin tonë personal, por, kur duhet, edhe të forcave politike. Natyrisht që të gjithë jemi nën një presion të vazhdueshëm nga bashkëpunëtorë, nga anëtarë, nga militantë, por interesi i vendit është ai që duhet të prevalojë në këto momente. Njëkohësisht, kjo është një zgjidhje e detyrueshme, sepse nuk ka asnjë alternativë tjetër.

Bendi Fevziu – Por ju thoni se është një koalicion i qëndrueshëm, që do të thotë se kam përshtypjen se keni ndryshuar mendim edhe për PS-në, zoti Meta, sepse kohë më parë keni pasur një mendim të ndryshëm. Ju lutem, fusni kronikën numër 3.
(Inserti televiziv.)
Spiunët janë aty, apo ikën? E di që do të më thoni se kam kërkuar materiale filmike

Ilir Meta – Jo, jo. Ju doni të thoni se spiunin e vrau Milo.

Blendi Fevziu – Me sa di unë, Milo mbeti pa gjë.

Ilir Meta – Ju lutem, mendoj se këto gjëra nuk kanë lidhje me vlerësimin tim për Partinë Socialiste. Ka qenë një vlerësim me konsiderata të mira, sepse kam qenë pjesë e asaj force politike. Nuk është në natyrën time të fyej ndonjë forcë politike, për shkak të një kontradikte që mund të kem me një drejtues të caktuar.

Blendi Fevziu – Kam edhe një pyetje të vogël. Ju pyeta për dallimet mes Ramës dhe Berishës. Në fakt, ju keni punuar dhe keni qenë kundërshtar edhe me Nanon. Po Nano ku ndryshonte nga dy të parët?

Ilir Meta – Ai kishte vlerat e veta. Me zotin Nano kam punuar dhe bashkëpunuar shumë mirë.

Blendi Fevziu – Ka funksionuar edhe bashkëpunimi me Nanon?

Ilir Meta – Po, ka funksionuar, sepse ne kemi bashkëpunuar për një kohë të gjatë, nga viti ‘92 deri në vitin 2003.

Blendi Fevziu – Zoti Meta, a ka pasur ndonjë marrëveshje të pashkruar, ndoshta edhe të shkruar, nuk jam në dijeni, mes jush dhe zotit Edi Rama se do të kandidonit për Presidentin e Republikës në muajin maj të vitit 2017 dhe a do të shkoni në postin e Presidentit?

Ilir Meta – Nuk ekziston asnjë marrëveshje e tillë. Shpesh është aluduar për shumë marrëveshje. E vetmja marrëveshje është ajo e firmosur në Shkodër në muajin prill para zgjedhjeve, ku do të bashkëpunojmë për interesin e vendit dhe të suksesit të këtij koalicioni.
Unë jam aktualisht në detyrën e Kryetarit të Kuvendit. Jam në fillimet e kësaj detyre dhe të këtij mandati dhe jam plotësisht i përqendruar për ta përmbushur këtë detyrë, që nuk është e thjeshtë, për shkak të specifikave të saj, me më shumë përgjegjësi dhe konstruktivitet, për të sjellë një frymë sa më të gjerë bashkëpunimi në Kuvend, por edhe jashtë tij, në të mirën e një paqeje sociale.

Blendi Fevziu – Zoti Meta, jeni Kryetar i Kuvendit të Shqipërisë, keni qenë kryeministër i Shqipërisë, keni qenë dy herë zëvendëskryeministër i Shqipërisë, keni qenë ministër i Punëve të Jashtme, që është posti i tretë më i rëndësishëm në protokollin e shtetit. A do të aspironi, ose aspironi që të bëheni President i Shqipërisë?

Ilir Meta – Realisht nuk kam pasur kohë të mendoj për këtë çështje. Për mua kjo gjë nuk është aspak e rëndësishme, nëse unë e aspiroj apo do të kem mundësi të shërbej në këtë detyrë, sepse detyrat që kam pasur në të kaluarën kanë qenë shumë të larta dhe të nderuara. Po ashtu edhe detyra që kam sot është e tillë. Nuk e kisha menduar asnjëherë se do të isha në detyrën e Kryetarit të Kuvendit. Mendoj se ka qenë zgjidhje e drejtë duke pasur në konsideratë rrethanat dhe profilin e Lëvizjes Socialiste për Integrim, në mënyrë që ky institucion të paraqitet në një frymë sa më bashkëpunuese dhe konstruktive.

Blendi Fevziu – A i keni kërkuar ju në fillim të verës së vitit 2012 ish-kryeministrit Berisha që të kandidonte ose ai, ose ju për postin e Presidentit të Republikës gjatë atyre zgjedhjeve?

Ilir Meta – Kjo nuk ka ndodhur asnjëherë, që unë t’i kem kërkuar zotit Berisha të kandidojë për postin e Presidentit të Republikës apo t’i kem kërkuar, apo insistuar, që të ketë një kandidat nga Lëvizja Socialiste për Integrim.
Nga ana ime ka pasur vetëm një angazhim dhe preokupim që çështja e Presidentit të zgjidhej me një konsensus sa më të gjerë, që çështja e Presidentit të zgjidhej nga një figurë jo e Partisë Demokratike, jo se unë kisha ndonjë problem me figurat e caktuara të PD-së, përkundrazi, shumë prej tyre i kam pasur kolegë dhe kam bashkëpunuar shumë mirë me ta dhe ruaj respekt, por, sepse vetë situata politike ku ndodhej vendi, ngërçi me tri ligje që kërkonin një konsensus edhe nga ana e opozitës, insistimi ndërkombëtarëve për një frymë konsensusi për çështjen e zgjidhjes së Presidentit, e kërkonin këtë. Unë bëra maksimumin tim për të gjetur një zgjidhje sa më konsensuale.
Nga ana ime nuk ka pasur asnjëherë kërkesë për zotin Berisha dhe për Partinë Demokratike për këtë çështje. Pra, ka qenë vetëm interesi që të gjejmë një zgjidhje të përbashkët, sepse edhe reforma në fushën e drejtësisë kishte nevojë për konsensusin e opozitës, pasi maxhoranca e asaj kohe kishte 74 mandate dhe kërkonte një klimë tjetër politike dhe kishte shumë rëndësi mënyra se si do të zgjidhej Presidenti i Republikës.

Blendi Fevziu – A mendoni dhe a e keni këtë ndjesi që e artikulojnë njerëz të LSI-së, se zoti Berisha dhe PD-ja ka luajtur me ju duke çuar në zgjedhjen e Presidentit Nishani? A e keni këtë dyshim?

Ilir Meta - Nuk dua të merrem me çështje të tilla. As me dyshime. Edhe nëse ka qenë një lojë shumë më e mençur, nuk mendoj se...

Blendi Fevziu – A dyshoni ndonjëherë se ka qenë lojë?

Ilir Meta – Nuk dua të flas fare për këto dyshime, sepse jemi këtu që të flasim për të ardhmen. E rëndësishme është që për të ardhmen të mësojmë nga gabimet e njëri-tjetrit, e para.
E dyta, t’i japim vendit disa reforma që gjenerojnë jo vetëm konsensus në realizimin e tyre, por edhe progres në disa fusha që janë jetike dhe kritike për vendin dhe qytetarët, ku do të theksoja jo vetëm reformën administrative territoriale, por edhe reformat në fushën e drejtësisë, që janë edhe kushti dhe testi kryesor për integrimin. Por ky nuk është meraku im i vetëm dhe kryesori, sepse në radhë të parë, janë shumë të rëndësishme forcimi i rendit publik, përmirësimi i situatës ekonomike, formalizmi i ekonomisë dhe zgjidhja e çështjes së pronës dhe shumë elemente të tjera. Për këtë gjë duhet të punojmë dhe të angazhohemi të gjithë, përfshirë edhe zotin Berisha, i cili ka një rol tepër të veçantë dhe eksperiencë të madhe.

Blendi Fevziu – E ka në parlament, ku ia jepni ju.

Ilir Meta – Për sa i takon zgjedhjes së Presidentit Nishani. Mund t’ju them se, për shkak të rrethanave, edhe unë, edhe grupi i deputetëve kemi gjykuar se ka qenë një zgjidhje e pranueshme. Posa jam takuar me zotin Nishani, si President i sapozgjedhur, i kam thënë se pavarësisht se opozita nuk mori pjesë në këtë proces votimi, për arsye që i kuptojmë dhe i mirëkuptojmë, ai duhet të jetë President i të gjithëve dhe duhet të punojë për të vendosur ura bashkëpunimi me opozitën.

Blendi Fevziu – A e ka justifikuar zoti Nishani votën tuaj? Votën e Ilir Metës.

Ilir Meta – Nuk dua të hyj në gjykime të tilla. E respektoj Presidentin si simbol i unitetit kombëtar, siç ai duhet të jetë. Në këtë drejtim, do të bashkëpunoj me të, për të respektuar edhe frymën e Kushtetutës, por edhe për bashkëpunimin midis institucioneve.

Blendi Fevziu – Zoti Meta, të gjitha çështjet që i ngritët, që i takojnë të sotmes dhe të ardhmes, politikës dhe administrimit të vendit, unë i kam këtu dhe nuk do të çohem pa i diskutuar, por meqë ju e dini pasionin për historinë dhe në përgjithësi për rrjedhën e ngjarjeve, kam edhe dy pyetje që lidhen me të shkuarën, pastaj kthehemi tek e sotmja, për të shkuar te e nesërmja. A keni ndryshuar mendim për Edi Ramën?

Ilir Meta – Ju keni një të mirë se bëni një emision dhe pastaj bëni edhe një libër.

Blendi Fevziu – E kam gati. Do t’jua lë surprizë. Do të jetë i zhurmshëm për politikën shqiptare.

Ilir Meta – Ky është efikasitet i lavdërueshëm.

Blendi Fevziu - A keni ndryshuar qëndrim, mendim jo qëndrim, për Edi Ramën, sepse qëndrimi kuptohet përmes aleancës? A ta vendos pak në insert se çfarë mendimi keni pasur?

Ilir Meta – Kjo është e drejta juaj. Ju më keni ftuar, kështu që unë nuk mund të imponoj rregullat e mia në studion tuaj. Përkundrazi.

Blendi Fevziu – Regjia: materiali numër 4.
Ia kam vendosur zotit Rama dy herë dhe e ka përballuar shumë qetë.
(Futet inserti televiziv.)

Ilir Meta – Tashmë kryetari i sektit të spiunëve të Shqipërisë, kjo fundërrinë morale e shoqërisë shqiptare, ky njeri që mohoi atësinë e të birit në gjyq, ky njeri që akuzoi babanë e tij si babanë e djalit të tij, ky njeri i pander, pa familje, pa asnjë normë shoqërore dhe morale synoi të bënte një puç në Shqipëri përmes një përgjimi kriminal dhe të paligjshëm, dhe jo vetëm kaq, por edhe përmes një montimi kriminal dhe të pashembullt. Të gjithë qytetarët shqiptarë do të shohin se njeriu që kërkon të vijë në pushtet përmes dhunës me 8 maj do të marrë verdiktin nga të gjithë qytetarët e Shqipërisë si një fundërrinë morale, por edhe politike, duke pastruar jo vetëm qytetin e Tiranës, por edhe politikën shqiptare nga një mostër.
(Mbaron inserti televiziv.)

Blendi Fevziu – Më elokuent se kaq, zoti Meta, nuk keni qenë ndonjëherë.

Ilir Meta – Duke mos e mohuar se ai që ishte aty quhet Ilir Meta, duke pasur parasysh edhe kohën e periudhën kur janë bërë këto deklarata – duket qartë edhe nga fjalori, sepse nuk janë termat e mi të zakonshëm, por kanë qenë një çikë edhe nën efektin e shoqërisë me Doktorin...

Blendi Fevziu – Si nën shoqërinë e Doktorit?

Ilir Meta – Kemi qenë edhe si në koalicion: e ka pasur atë efekt. Me pak fjalë them se fakti që ne sot jemi në një koalicion me zotin Rama, tregon se patjetër që ka një reflektim. Reflektimi i parë është, jo thjesht ndaj zotit Rama në atë kohë, me të cilin kemi qenë kundërshtarë, dhe të ashpër, por edhe sot të jem shumë më i sjellshëm, shumë më i përmbajtur ndaj cilitdo. Besoj se po e reflektoj këtë gjë edhe me sjelljen time në krye të Kuvendit të Shqipërisë, edhe si një mënyrë për të mos përsëritur sjellje të tilla, natyrisht të vendosura në kontekstin e një konflikti të caktuar. Thashë që ia njoh vetes këtë meritë: aftësinë e reflektimit.

Blendi Fevziu – Drejtimi i parlamentit, në fakt, është impresionues, zoti Meta, megjithëse ju shkelni ligjin duke e lejuar zotin Berisha të flasë tej masës, tej limiteve dhe tej Rregullores.

Ilir Meta – Nuk është shkelje ligji. Është një shkelje, le të themi, deri-diku e Rregullores. Pavarësisht nga vërejtjet dhe kritikat nga disa kolegë deputetë, të akuzohesh se po shkel Rregulloren për t’i dhënë kohën e kërkuar, edhe pse të tepërt në shumë raste, liderit të opozitës në parlament, më duket se nuk duhet të ndjehem fajtor.

Blendi Fevziu – Ndoshta politikanit më influent të këtyre 23 viteve, se opozita ka një lider që quhet Lulzim Basha.

Ilir Meta – Thashë: në parlament.

Blendi Fevziu – Pyetja e fundit që lidhet me të shkuarën. Zoti Meta, jeni politikani i vetëm që në këto 23 vjet keni bërë beteja shumë të forta me disa nga politikanët më të rëndësishëm të këtij vendi, ku padyshim ju renditeni ndër më kryesorët, dhe po ashtu keni bërë marrëveshje dhe bashkëqeverisje me ta. Jeni përplasur fort me zotin Nano dhe jeni rikthyer të bashkëpunoni në qeverinë e vitit 2002; keni qenë kundërshtar i fortë i zotit Rama dhe jeni kthyer të bashkëqeverisni me të, tani apo në koalicionin e 2007-ës; keni qenë një kundërshtar shumë i fortë i zotit Berisha, për një periudhë më shumë se nëntëmbëdhjetëvjeçare, dhe më pas jeni kthyer të qeverisni me të: e para, a është kjo kthesë psikologjikisht e vështirë dhe, e dyta, a është një mungesë morali politik?

Ilir Meta – Kjo varet nga koncepti që keni për moralin...

Blendi Fevziu – Thashë moralin politik.

Ilir Meta – Dakord, moralin politik. E para, politikani duhet të udhëhiqet nga interesi i vendit dhe ai publik. Në këto kushte një vendim nuk mund të merret në bazë të një raporti politik apo personal që ke pasur në të kaluarën me dikë, sepse çfarë gjykohet dhe respektohet nga njerëzit nuk është ajo qe çfarë tha dje Ilir Meta për Edi Ramën, Sali Berishën apo Fatos Nanon, apo ata për njëri-tjetrin. Për ata është kryesore se çfarë po bën sot Ilir Meta, Edi Rama apo Sali Berisha, që problemet e tyre të zgjidhen, që kjo gjuhë konfrontimi edhe me Ilir Metën e para disa viteve të mos jetë më prezent, sepse gjuha e konfrontimit nuk na ndihmon më të zgjidhim probleme. Ajo ndihmon për të shtuar probleme. Shqipëria ka mjaft probleme që duhen zgjidhur, dhe jo për të shtuar. Angazhimi im dhe përkushtimi im kanë qenë dhe mbeten sot më shumë se asnjëherë tjetër për të ndërtuar konsensus, për të ndërtuar bashkëpunime dhe për të zgjidhur problemet.

Blendi Fevziu – Zoti Meta, këtë idenë e bashkëpunimit, të gjuhës konstruktive, zgjidhjes së problemeve, të shikimit para dhe jo prapa, e keni një tezë politike mësuar nga ndonjë prej konsulentëve tuaj të imazhit publik, apo e keni bindje? Pasi është një gjuhë që po ju rrit në sondazhe. Në sondazhet e fundit që kam parë imazhi juaj vazhdon të mbetet i paprekur, ndërkohë që Kryeministri ka një rënie, ka një problem me politikanët e tjerë, ndërsa ju vetëm rrisni pikët. Këtë e përdorni si strategji, apo vërtet e keni bindje?

Ilir Meta - Unë jam përpjekur vazhdimisht për të dhënë zgjidhje. Nuk dua të kthehem shumë pas në histori, sepse nuk do t’i vlente askujt për momentin. Rasti më i fundit: angazhimi im kryesor ka qenë për zgjidhjen e tri çështjeve që kishin të bënin me statusin.

Blendi Fevziu - Tri ligjet e pavotuara.

Ilir Meta - Po, tri ligjet. Kërkesat e mia kryesore, edhe në raport me zotin Rama, kanë qenë në këtë drejtim. Nuk kanë qenë se çfarë do të isha unë apo se çfarë do të merrte LSI-ja dhe për ta zgjidhur këtë gjë përpara zgjedhjeve, duke pasur shqetësimin dhe frikën se kërkoheshin pretekste dhe justifikime për ta vonuar çështjen e statusit. Edhe ndaj zotit Berisha kam pasur të njëjtën kërkesë vazhdimisht. Nga e kam mësuar unë këtë gjë, që thatë ju? Nuk e kam mësuar as nga këshilltarë apo sondazhistë, por nga përvoja ime. Unë nuk e kam menduar kurrë se mund të bëja një bashkëpunim me Sali Berishën, përkundrazi, por ja që bashkëpunova me Sali Berishën. Nuk ka qenë një bashkëpunim i lehtë, ka pasur vështirësitë e tij. Natyrisht që kam parë edhe shumë gjëra, që nuk do të kisha mundësinë t’i shikoja te Sali Berisha si një njeri që ka disa vlera, ka disa cilësi. Jo rastësisht është një figurë politike mjaft e rëndësishme në këto 23 vjet. Bashkëpunimi që kam tani me zotin Rama, duke iu kthyer edhe të kaluarës dhe inserteve që ju vutë, tregon qartë se çdo tejkalim i vetëpërmbajtjes nuk na ndihmon. Kemi shumë mure në shoqërinë tonë. Akoma më tepër në politikën tonë, madje kemi më tepër sesa në shoqëri. Të ndërtojmë ura dhe të zgjidhim probleme. Vendi ka nevojë për zgjidhje dhe këto zgjidhen përmes bashkëpunimit.

Blendi Fevziu - Zoti Meta, vendi ka nevojë për zgjidhje të një sërë problemesh. Po marr disa nga ato problemet, të cilat i keni premtuar dhe i keni konsideruar si kolonat kryesore të qeverisjes së koalicionit të majtë. Një nga kolonat kryesore është integrimi i vendit. Një problem ose një dështim, është sepse ne nuk e morëm statusin në muajin dhjetor. Pritet të marrim një rivlerësim në muajin qershor. Kemi bërë kundër, përveç Danimarkës dhe Holandës që kanë qenë skeptike, Gjermaninë dhe Britaninë e Madhe, dy vende që kanë qenë mbështetëse, pa llogaritur Francën që ka qenë skeptike. Çfarë ka ndodhur me këto vende? Përse Shqipëria për herë të parë në këto 23 vjet ndodhet përballë hezitimit dhe skepticizmit të tri vendeve që përbëjnë kolonën kryesore të BE-së si: Gjermania, Franca dhe Britania e Madhe?

Ilir Meta - Situata nuk është kaq tragjike në raportin e BE-së me Shqipërinë, pavarësisht se në vlerësimin tim është krejtësisht e padrejtë. Këtë mund ta shpjegoj më pas.
Së dyti, këto vende që përmendët nuk kanë qenë asnjëherë entuziaste për zgjerimin, të paktën vitet e fundit.

Blendi Fevziu – Britania ka qenë në favorin tonë.

Ilir Meta - Ju lutem, ajo është në favorin tonë, por ka një program që kërkon dhe tenton edhe referendum, i cili mund të bëjë atë që Britania të marrë distancën e saj nga BE-ja. Pra, kur ajo vetë ka një problem me BE-në, nuk mund të themi se ka qenë entuziaste për Shqipërinë si një kandidate apo si një anëtare e BE-së apo qoftë edhe për vende të tjera. Nuk shikoj se në raport me këto vende ka ndodhur diçka e jashtëzakonshme. Në fakt, ajo që ka ndodhur është një çështje evidente, përveç vonesave tona të pajustifikuara vit pas viti si vend, edhe konflikti i brendshëm ka pasur një rol negativ. Ka një lodhje nga zgjerimi dhe kjo është shumë evidente.

Blendi Fevziu - Zoti Meta, një lodhje që projektohet vetëm te Shqipëria dhe jo, për shembull, te Serbia dhe Mali i Zi?

Ilir Meta – Rasti i Serbisë është krejt i veçantë. Kjo është një nxitje, një mbështetje për shkak të raportit me Kosovën. Shqipëria konsiderohet një vend më i qëndrueshëm.

Blendi Fevziu - Kryeministri serb Daçiç tha se kam dëgjuar në Europë aq shumë fjalë të mira, sa Europa nuk ka thënë kurrë në këto 60 vjet për Serbinë.

Ilir Meta - Nuk kam ndërmend të merrem me këtë deklaratë, sepse kjo është një çështje e tij. Në Europë edhe unë kam dëgjuar shumë fjalë të mira për qeverinë aktuale, për progresin e saj. E keni edhe në progresraport. E keni edhe në deklaratën e Këshillit, i cili vlerëson progresin dhe kërkon të mbahet kjo gjë. Çështjet e tjera nuk kanë të bëjnë me këtë koalicion. Nuk janë çështje që kanë të bëjnë me drejtuesit e këtij koalicioni. Mund të them se nuk janë çështje që kanë të bëjnë as me drejtuesit e opozitës shqiptare. Le të hyjmë në një rast më konkret: këtu kemi të bëjmë me një mekanizëm se si merren vendimet në Bashkimin Europian.

Blendi Fevziu - Që do të thotë ekstremistët, siç i quan Kryeministri ose shqiptarofobët siç i quan ish-Kryeministri. Jeni dakord?

Ilir Meta - Në rastin konkret kemi një veto të parlamentit holandez, përpara mbledhjes së ministrave të jashtëm.

Blendi Fevziu - Për çfarë arsye?

Ilir Meta - Nën frymëzimin e Partisë së Lirisë, e cila është një parti ekstremiste, por që, për fat të keq, udhëheq të gjithë sondazhet në Holandë, partia e Geert Wilders kërkon edhe daljen e Holandës nga BE-ja, nëse kjo e fundit do të vazhdojë të pranojë vende të tilla si Shqipëria dhe Bosnja, të cilave u jep një ngjyrim fetar, që e bën për shkak të mungesës së informacionit apo për shkak të fitimit të kapitalit politik. Duke pasur parasysh në Holandë edhe pakënaqësitë e qytetarëve për shkak të situatës ekonomike, për shkak të problemeve që vijnë nga zgjerimi, nga migrimi dhe kështu me radhë. Kemi një veto, të Holandës, e cila e bllokoi të gjithë këtë proces. Mendoj se e rëndësishme, është që ne të vazhdojmë rrugën e reformave.

Blendi Fevziu - Po Gjermania?

Ilir Meta - E thashë edhe pak më përpara se asnjë nga vendet nuk kanë qenë entuziaste në kuptimin e nxitjes, sepse Europa ka probleme shumë të mëdha. Ne duhet të jemi të ndërgjegjshëm edhe për këtë gjë.

Blendi Fevziu - Zoti Meta, ne nuk e kemi thënë se është hera e parë në historinë BE-së që një rekomandim i komisionit hidhet poshtë nga vendet anëtare. Nuk ka ndodhur më parë dhe ndodh me Shqipërinë.

Ilir Meta - Kjo duhet të saktësohet. E vërteta është se edhe Serbia, në të kaluarën, edhe Mali i Zi në të kaluarën ka patur shtyrje, për arsye të ndryshme. Një gjë duhet ta themi me bindje të plotë, dhe unë e them me bindje të plotë: që ky qe vendim i padrejtë.

Blendi Fevziu – Për statusin.

Ilir Meta – Për statusin e vendit kandidat. Ashtu sikurse duhet të jemi të ndërgjegjshëm që, në qoftë se flasim për standardet, për kriteret, institucion më të specializuar në Bashkimin Europian se komisioni nuk ka.

Blendi Fevziu – Po.

Ilir Meta – Për sa u takon vendeve, ato kanë të drejtën e tyre sovrane. Mbajnë qëndrime politike. Edhe një vend i vetëm po të mos jetë dakord, bllokohet vendimmarrja në Bashkimin Europian. Prandaj ne nuk duhet të gjykojmë as Holandën, aq më tepër vendet e tjera, për vendimet që ata morën, sepse kanë zgjedhje lokale në mars, kanë zgjedhjet europiane në pranverë e kështu me radhë. Është një e drejtë e tyre dhe nuk do të përpiqemi as të gjejmë armiq këtu. Absolutisht. Por do të vazhdojmë të përqendrohemi, të zbatojmë rekomandimet e progres-raportit të fundit të Komisionit Europian, të ecim në rrugën e reformave. Mbështetja dhe vlerësimi kanë qenë tepër të larta përgjatë gjithë këtyre muajve me qeverinë e re. Opozita ka një rol të rëndësishëm dhe nuk duhet kurrsesi ta shfrytëzojë këtë shtyrje për të goditur qeverinë, sepse në këtë mënyrë nuk besoj se fiton ndonjë kapital politik as brenda vendit e as jashtë vendit.

Blendi Fevziu – Zoti Meta, burimet diplomatike daneze në Bruksel i kanë thënë shtypit se Partia Socialiste ka pasur një pretendim, madje ka protestuar lidhur me gjykimin tuaj për çështjen e kasetës së janarit të vitit 2011 dhe ky pretendim i Partisë Socialiste është parë me shumë seriozitet nga danezët. Por ata janë të befasuar nga koalicioni i mëpasëm dhe nuk dinë nëse Partia Socialiste ka ndryshuar qëndrim. Këtë pyetje kryeministrit Rama ia kam bërë unë në këtë studio, ia ka bërë kolegu im Mustafa Nano. Le ta shohim në materialin numër tetë përgjigjen që ka dhënë te zoti Nano, sepse këtu ka dhënë një përgjigje disi të ndryshme. (këtu fillon materiali filmik).

Blendi Fevziu – Nuk e përjashtoj, thotë zoti Rama. Këtu në studio tha: jo, nuk besoj të ketë qenë një gjë e tillë, dhe nuk ka një dosje. Ka ndikuar apo jo kjo gjë? Ju mund të jeni më realist.

Ilir Meta – Nuk dua të merrem me thashetheme që qarkulloni ju me të drejtë, por mund t’ju them se përpara disa javësh ambasadori danez në Tiranë më dorëzoi ftesën zyrtare të kryetarit të parlamentit të Danimarkës, një personalitet i shquar i politikës daneze, ish-ministër i Jashtëm dhe lider i socialdemokratëve, zoti Lykketoft, për një vizitë zyrtare në Danimarkë, në fund të marsit. Dhe unë do t’ju ftoja edhe juve atje, gjatë kësaj vizite, në rast se keni interes për t’i bërë ndonjë pyetje. Por të jeni absolutisht të sigurt se një vend serioz si Danimarka nuk merret me… (ndërhyrje të Blendi Fevziut)

Blendi Fevziu – S’ka patur pretendime ndaj jush, zoti Meta; ndaj akuzave që bëhen për procesin.

Ilir Meta- Të lutem, të lutem! Nuk ka lidhje fare. Këto janë thashetheme që shpërndan Doktori, në kuadër edhe të diversionit brenda Aleancës për Shqipërinë Europiane. Dhe unë e mirëkuptoj.

Blendi Fevziu – Pra, ju po thoni me siguri se nuk ka pasur një denoncim për gjyqin tuaj nga Partia Socialiste në strukturat europiane?

Ilir Meta – Nuk ka asnjë rëndësi për atë çështje. E rëndësishme është …

Blendi Fevziu – Po ka pasur, apo nuk ka pasur?

Ilir Meta – E rëndësishme është kjo gjë …

Blendi Fevziu – Ka pasur apo nuk ka pasur?

Ilir Meta – Më fal, po çfarë rëndësie ka? Ja ka patur. Çfarë rëndësie ka? Rëndësi ka kjo që do të them unë tani. Edhe unë, edhe zoti Rama, edhe zoti Berisha, problemet që kemi me njëri – tjetrin, jo si qytetarë dhe në planin personal, po si përfaqësues të qytetarëve që votojnë për ne dhe gjithë të tjerët, nuk duhet t’i zbrazim nëpër ambasada.

Blendi Fevziu – Ky është i turpshëm si gjest.

Ilir Meta – Është i turpshëm. Pra, vjen Rama në pushtet, tani çfarë kemi për Metën, dhe të shkojmë te ambasada kot. Sepse mendojmë se ata po thonë: oh, sa mirë, na informoi ky! Mbetet aty dhe nuk është e mirë.

Blendi Fevziu – Aq më tepër kur është shpifje.

Ilir Meta – Nuk ka rëndësi. Ne problemet që kemi duhet t’i zgjidhim, dhe ky është një standard i bërjes politikë dhe i ndërtimit të institucioneve.

Blendi Fevziu – Jam dakord me ju për këtë!

Ilir Meta – Çdo ambasador ku ne shkojmë e i themi se kështu ka bërë ky e kështu ka bërë ai, kur dalim ne çon raport andej, se bëmë punë, kuptohet. Por kur dalim ne, thotë këta …

Blendi Fevziu – I kemi kthyer ambasadorët në guvernatorë tek të cilët qahemi dhe u kërkojmë mend për çdo gjë.

Ilir Meta – Nuk ka rëndësi. Ata janë njerëz të nderuar. Fajin të mos e kërkojmë tek ata. Duhet ta kërkojmë te vetja jonë. Pra, e kisha në këtë drejtim: që ne duhet të heqim dorë nga kjo politikë. Ne duhet të ruajmë imazhin e vendit tonë, madje edhe të njëri – tjetrit. Jo vetëm ne këtu në Shqipëri me njëri – tjetrin, por edhe me politikanët e Ballkanit. Edhe kur shkojmë ne në vendet e Europës apo në vende të tjera të zhvilluara, edhe kur flasim për ata. Mbasi ikim, jemi shqiptarë, por jemi edhe ballkanas. Ka shumë rëndësi ajo që themi, e vizioni që prezantojmë, për të krijuar një mendim dhe një perceptim të mirë edhe për Shqipërinë, por edhe për të gjithë rajonin, sepse nuk na shikojnë kaq të shkëputur edhe nga fqinjët.

Blendi Fevziu – Zoti Meta, keni pasur ju dijeni për një kontakt ose për negociata midis kryeministrit Rama dhe Shteteve të Bashkuara të Amerikës, për transportimin e armëve kimike siriane në Shqipëri dhe shkatërrimin e tyre këtu?

Ilir Meta – Unë kam patur aq informacion sa mendoj se duhet të kisha, dhe nuk është se kam kërkuar ndonjë informacion shtesë.

Blendi Fevziu – E dinit që në fillim se ishte bërë kjo kërkesë?

Ilir Meta – Unë kam patur këtë informacion: që ka patur një kërkesë që Shqipëria të japë një kontribut në kuadrin e një aksioni ndërkombëtar për paqen dhe që kjo gjë do të shqyrtohej në përputhje me mundësitë që kishte Shqipëria, sepse ishte një operacion i panjohur më parë.

Blendi Fevziu – A kishit dijeni se në parim kryeministri u kishte kthyer përgjigje pozitive Shteteve të Bashkuara të Amerikës, siç u shpreh ambasadori amerikan?

Ilir Meta – Ajo që unë kam patur dijeni është se kryeministri ka patur sensin pozitiv që vendi të jepte një kontribut në këtë drejtim brenda mundësive, siç do ta kishte çdo kryeministër shqiptar.

Blendi Fevziu – Materialin numër dy, të lutem! (vijon materiali). Dhe materialin numër 11! Për këtë do të doja t’ ju pyesja. Tjetrin që vjen pas, zoti Meta. Materialin nr. 11.
(Insert:

Ilir Meta – Të jeni të qetë dhe të sigurt se çdo vendim do të ketë në themel zërin tuaj, do të ketë në themel të ardhmen tuaj, e cila nuk do të cenohet. Prandaj, ju përshëndes edhe një herë dhe ju premtoj se ne do të jemi gjithmonë në krahun tuaj, të së ardhmes së vendit dh ju duhet të jeni të sigurt se ky parlament dhe kjo qeveri nuk mund të vihen asnjëherë kundër vullnetit tuaj.)

Blendi Fevziu – Përse shkuat te protestuesit, zoti Meta, përpara seancës që e diskutonte?

Ilir Meta – Të jap përgjigje për të tria insertet bashkë?

Blendi Fevziu – Po.

Ilir Meta – E para, unë kam pasur aq informacion sa duhet të kisha.
E dyta, nuk është se kam kërkuar ndonjë informacion më shumë...

Blendi Fevziu – Vetë amerikanët ju kishin informuar?

Ilir Meta – Ju lutem! Sepse mendoj që ka qenë një përgjegjësi e qeverisë dhe ekspertizës që qeveria kishte dhe ka në dispozicion për të bërë vlerësimet dhe komunikimet e saj. Kam qenë i bindur se në çdo rast zgjidhja do të ishte e menduar mirë.
Lidhur me insertin e fundit, ju e dini që opinioni publik u ushqye me spekulime të ndryshme, ku përveç shqetësimit legjitim të Sazan Gurit dhe shumë ambientalistëve të tjerë, të të rinjve dhe të të rejave, të cilët kanë këndvështrimin e tyre për këto çështje, përveç shqetësimit të gjerë të opinionit publik, për fat të keq, një pjesë e madhe e instrumentalizimit erdhi edhe nga fakti që opozita synoi ta përdorte menjëherë politikisht për të goditur qeverinë dhe Kryeministrin Rama si shkatërrues të vendit që donin të strehonin armët kimike...

Blendi Fevziu – Opozita ka hyrë shumë vonë në këtë proces, zoti Meta, dhe nuk ka qenë shumë e mirëpritur në protesta!

Ilir Meta – Është e vërtetë që nuk ishte e mirëpritur, sepse u duk qartë që kishte tendencën e instrumentalizimit pa të drejtë.

Blendi Fevziu – Në fakt, ka folur publikisht të enjten në parlament kur zoti Berisha deklaroi: “Ne do të kthehemi në një mburojë njerëzore për mosardhjen e armëve kimike”, ndërkohë që të premten u mor vendimi i “Jo-së”. Pra, ishte shumë vonë. Protestat kishin nisur një javë më parë.

Ilir Meta – Kjo çështje nuk ka asnjë rëndësi. Mos harroni që opozita (për këtë ju duhet të bëni një research, ka qenë pjesëmarrëse vazhdimisht. Zoti Berisha doli ditën e enjte në shesh, që u ul para Kryeministrisë, por përfaqësues të tjerë të opozitës kishin dalë edhe ...

Blendi Fevziu – Po kur qe zonja Doda, zoti Olldashi...

Ilir Meta – Po, Kanë qenë edhe ditë më përpara dhe kjo ishte një e drejtë e tyre. Por kjo çështje u instrumentalizua, e theksoj, pa të drejtë, sepse u pretendua që vendimi ishte marrë dhe ishte çdo gjë fakt i mbyllur, ndërkohë që opozita doli blof në këtë histori. Mendoj se qeveria nuk ka marrë një vendim të lehtë, sepse qeveria do të kishte dashur të jepte kontributin maksimal në këtë proces, por ka bërë një vlerësim objektiv të kapaciteteve të vendit dhe të riskut të një operacioni të tillë, si dhe të një sensibiliteti të opinionit publik, që kulmoi edhe falë instrumentalizimit të opozitës, e cila tani shpreh keqardhjen pse nuk u morën armët kimike.

Blendi Fevziu – Sa ka ndikuar në “Jo-në” e Kryeministrit Rama deklarata juaj para protestuesve që asnjë vendim nuk do të merrej pa dëgjuar zërin e tyre?

Ilir Meta – Kjo nuk është e rëndësishme. Unë besoj se zoti Rama ka qenë i qartë qysh në fillim se kjo çështje do të shkonte në parlament, natyrisht do të shkonte edhe te Presidenti, sepse nuk mund të vinin armët kimike në vend pa një ligj në parlament.
Zoti Rama ka qenë shumë i ndjeshëm për të vlerësuar kapacitetet e vendit dhe mundësitë e tij për të pasur sukses në një çështje të tillë. Të mos harrojmë që ne kemi një trashëgimi jo shumë pozitive, siç është rasti i tragjedisë së Gërdecit, dhe një pjesë e madhe e ndjeshmërisë së qytetarëve vinte edhe për shkak të këtij kujtimi të hidhur dhe tragjik. Natyrisht, zoti Rama ka bërë një vlerësim të plotë të situatës dhe ka mbajtur një qëndrim, i cili është bërë publik.

Blendi Fevziu – A e vutë në dijeni zotin Rama se do të takonit protestuesit?

Ilir Meta – Nuk besoj se zoti Rama do të kishte ndonjë kundërshtim për këtë çështje, për t’u vënë në dijeni, sepse në çdo rast çdo vendim do të merrej në mënyrën më transparente...

Blendi Fevziu – Në mënyrë kolegjiale.

Ilir Meta – Kjo nuk do të thotë se vendimi ishte marrë në momentin që unë kam dalë te protestuesit, të cilët kishin rrethuar Kuvendin në mënyrë paqësore dhe demokratike, sepse edhe në rast se do të ishte marrë një vendim tjetër, përsëri ky vendim do të bëhej i ditur dhe do të jepeshin argumentet se përse do të merrej një vendim për t’i marrë armët kimike. Pra, do të jepeshin argumentet dhe nuk do të bëhej jashtë vëmendjes së protestuesve, të shoqërisë civile, aq më tepër jashtë vëmendjes dhe angazhimit të opozitës, pasi çdo gjë do të ndodhte në parlament.

Blendi Fevziu – Zoti Meta, gjatë homazheve të 29 nëntorit, të përvjetorit të Çlirimit, të mbarimit të Luftës së Dytë Botërore në Shqipëri, ju keni bërë homazhe në Varrezat e Dëshmorëve së bashku me Presidentin dhe Kryeministrin në sfondin e fotos së diktatorit Hoxha. Ka pasur komente në shtyp që ka qenë madje LSI-ja inspiruese e pranisë së fotos së Enver Hoxhës atje. Është e vërtetë, apo jo?

Ilir Meta – Shtypi po më inspiron edhe mua me këto vetinspirimet e vazhdueshme. Unë nuk kam pasur dijeni që ka qenë ndonjë foto e tillë, sepse nuk kemi pasur edhe rastin ta shohim, por kam vënë re spekulime të mëdha më pas nga ana e zotit Berisha lidhur me këtë ceremoni. Unë e di që ju gazetarët do të vdisnit nga kënaqësia që ne ta dinim se ishte kjo foto dhe t’i thoshim policisë që t’i merrte njerëzit me forcë dhe dhunë dhe të hiqnin foton. Më pas, përsëri jam i bindur se ju do të thoshit: ja u kthye koha e Enver Hoxhës. Nuk lejojnë njerëzit të dalin të lirë, të shprehin mendimet e tyre, të respektojnë idhujt e tyre e kështu me radhë. Prandaj, për këtë çështje do të shprehesha shumë thjesht, është e drejta e cilitdo që të dalë me një fotografi e me një portret kudo që e gjykon ai të arsyeshme. Kjo nuk duhet bërë shkak, sepse edhe kjo është tregues i intolerancës në shoqërinë tonë. Duam nuk duam ne, Enver Hoxha ka ithtarët e vet, ashtu sikurse mbreti Zog ka ithtarët e tij në Shqipëri, ashtu sikurse edhe figura të tjera kanë ithtarët dhe përkrahësit e tyre.

Blendi Fevziu – Ideologjike.

Ilir Meta - Këtu bëhet fjalë për një ceremoni për të përkujtuar ditën e çlirimit të vendit. Unë nuk mund të them dot se Enver Hoxha nuk ka kontribute për çlirimin e Shqipërisë.

Blendi Fevziu – Këtë doja t’ju them. Keni thënë me rastin e festimeve të 100-vjetorit se duhet parë roli i Enver Hoxhës gjatë luftës. Ndërkohë, jeni partia e parë që keni kërkuar që të krijohet një komision gjithëpërfshirës për festimet 70-vjetorit të Çlirimit, që është sivjet. A mendoni ju si Ilir Meta që ky 70-vjetor duhet të rishohë edhe figurën e Enver Hoxhës?

Ilir Meta – Kjo është detyra më e mirë që mund të bëjnë historianët, jo politikanët.

Blendi Fevziu – Ju, nuk keni ndonjë qëndrim personalisht për këtë çështje?

Ilir Meta – Jo, qëndrimi im është ky që ne t’ia lemë historinë historianëve. Për sa i takon kontributit të Enver Hoxhës, të komunistëve në luftë, ky është një fakt, ne nuk duhet të kemi asnjë lloj hezitimi që kontributi i tyre ka qenë maksimal. Lufta është udhëhequr nga Partia Komuniste e Shqipërisë.

Blendi Fevziu – Kjo përligj edhe krimet e Enver Hoxhës gjatë luftës?

Ilir Meta – Absolutisht jo! Mos harroni që shumica e atyre që u persekutuan ishin ish-partizanë, ish-gjeneralë, ish-kuadro të luftës.

Blendi Fevziu – Dhe u persekutuan po nga Enver Hoxha.

Ilir Meta – Absolutisht, kjo është një çështje për të cilën nuk ka asnjë diskutim për qëndrimin tim apo dhe të Lëvizjes Socialiste për Integrim, por ne historinë nuk duhet ta shikojmë bardh e zi.

Blendi Fevziu – Zoti Meta, kam tre pyetje, përpara se të fus spotet publicitare: gjatë zgjedhjeve të pjesshme në Korçë, emisioni “Fiks Fare” në një kasetë, kësaj here të pamontuar, transmetoi imazhet e disa zyrave të Partisë Socialiste në të cilat paguanin para, dukej në shkëmbim të votës, ndërkohë ekrani po i tregon këto imazhe, a janë blerë votat? A ka pasur një strukturë për blerjen e votave në Korçë apo gjatë zgjedhjeve të 23 qershorit në Shqipëri?

Ilir Meta – Për sa u takon këtyre çështjeve, këto i takojnë prokurorisë, unë nuk mund të hyj dhe të verifikoj as autenticitetin e këtyre filmimeve dhe as të përmbajtjes së tyre. Këto janë çështje që i takojnë prokurorisë. Ajo ka pasur mbështetjen për të zbardhur këtë çështje plotësisht.

Blendi Fevziu – Opozita ka deklaruar që ju keni përdorur shuma të mëdha për të blerë votat dhe me këtë shpjegohet rritja e numrit të votave të Lëvizjes Socialiste për Integrim.

Ilir Meta – E para, opozita nuk u shpreh kështu kur LSI-ja i dyfishoi votat për bashkinë e Tiranës dhe kur zoti Basha u zgjodh kryetar i bashkisë së Tiranës vetëm falë votave të LSI-së, sepse, në rast se do t’i kthejmë votat e LSI-së kundër, del minus 40 mijë vota. Megjithatë, i ka interesuar në këtë rast të shprehet në këtë mënyrë për të justifikuar rezultatin e saj, është një e drejtë e saj. Në qoftë se kjo e bën dhimbjen më të lehtë, unë pajtohem me këtë mënyrë justifikimi dhe arsyetimi.
Së pari, Lëvizja Socialiste për Integrim që në muajt e parë kur lindi kishte 120 mijë vota, edhe pa pasur komisionerë, edhe duke pasur gjithë shtetin kundër, në kushte të tjera.
Së dyti, Partia Demokratike mendoj se duhet ta gjejë përgjegjësinë te vetja, kur bën akuza të tilla, sepse së pari, këto janë blofe propagandistike, dhe së dyti, në rast se paskan ndodhur këto gjëra nga LSI-ja apo nga PS-ja, atëherë ky Flamur Noka, që ma përmende si përfaqësues të besueshëm, çfarë bëri? A ishte ministër i Brendshëm ky? Gjithë kjo Polici e Shtetit, gjithë SHISH-i, gjithë këto institucione që kishin nën kontroll, çfarë bënë këta, gjumë flinin?
Prandaj këto janë gjykime vërtet mjerane dhe që na shtojnë keqardhjen, por që nuk na bëjnë të humbasim respektin dhe vullnetin për të bashkëpunuar.

Blendi Fevziu – Sa është shuma që LSI-ja ka përdorur në këto zgjedhje, zoti Meta?

Ilir Meta – Ato janë të deklaruara në KQZ.

Blendi Fevziu – Mendoni që në zgjedhjet e ardhshme do ta ruani këtë numër deputetësh?

Ilir Meta – Unë besoj se Lëvizja Socialiste për Integrim do të vazhdojë të ketë një rritje të qëndrueshme, por nuk është kjo gjëja më e rëndësishme.

Blendi Fevziu – Mund të keni rritje?

Ilir Meta – Kështu mendoj unë. Por mendoj se më e rëndësishme është që ky koalicion të arrijë sa më shumë nga objektivat e tij që janë në të mirë të të gjithë qytetarëve shqiptarë, qoftë edhe duke pasur edhe ndonjë rënie të numrit të deputetëve të LSI-së. Ju besoj i keni ditur të paktën sondazhet e LSI-së dhe besoj se ju kanë dalë pak si të pagabueshme, shumë kohë përpara 23 qershorit, kur qytetarët shqiptarë të votonin.

Blendi Fevziu – Po, unë kam parë sondazhin tuaj që gabon vetëm me një mandat deputeti, kam parë edhe sondazhin e fundit.

Ilir Meta – Nuk gabuam me një mandat. Mandatin ne na e morën në Lundër, nuk na e morën në Kukës, por nuk ka rëndësi.

Blendi Fevziu – Por kam parë sondazhin e djeshëm, që ju....

Ilir Meta – Ndoshta, nuk e di...

Blendi Fevziu – E di që ju nuk dini asgjë, por unë flas për një sondazh që kam përshtypjen se e dini...

Ilir Meta – Unë mendoj se nuk është i rëndësishëm as numri i deputetëve dhe as numri i votave. E rëndësishme është që vendi këtë situatë delikate, për shkak të problemeve të trashëguara, për shkak të situatës së ekonomisë evropiane, të partnerëve tanë kryesorë tregtarë dhe ekonomikë si Italia, Greqia, e kështu me radhë, ta kalojë sa më butë dhe të kemi mundësi shumë shpejt të kalojmë drejt rritjes së punësimit në vend.

Blendi Fevziu – Zoti Meta, ka pasur organe shtypi që ju kanë shpallur personazh i vitit, ka shumë njerëz dhe politikanë që thonë se vetëm me LSI-në bëhet marrëveshje, ka shumë njerëz që thonë se LSI-ja kujdeset tej mase për njerëzit e saj, pra, i punëson, i fut në vende pune, i mban premtimet. A janë këto forma të një lloj rekrutimi në kuptimin pozitiv të fjalës, por që e prishin konkurrencën politike? Të ndjekim një material filmik mjaft interesant, që tregon se si është kthyer gati në një lloj miti kjo përkujdesje që ju keni për militantët tuaj.
Ju lutem, materiali numër 10!
Edhe nëpër dasma po del që po qani hallet e këtyre njerëzve.
Është një prishje e konkurrencës normale politike kjo? Këngë për Ramën nuk ka, që qan ndonjë hall.

Ilir Meta – Së pari, nuk kam për t’ju akuzuar se jeni autori i tekstit të kësaj kënge. Së dyti, është e drejtë e njerëzve të këndojnë.

Blendi Fevziu – Jo, nuk paragjykoj këngën.

Ilir Meta – Jo, jo, nuk ka asgjë, as për këngën, as për LSI-në. Ne nuk e kemi fshehur asnjëherë që kujdesemi për njerëzit, por në radhë të parë kujdesemi për vendin. Në rast se ne do të kishim parë thjesht interesat e njerëzve të LSI-së, unë si kryetar apo edhe kryesia e LSI-së, ne nuk do të kishim bërë koalicion me PS-në, sepse ishim shumë më komodë në koalicion me PD-në, dhe e kishim shumë të qartë që përfundimi i këtij koalicioni (mua nuk më pëlqen të përmend fjalën prishje, sepse nuk pati një prishje, por pati mbyllje kontrate) natyrisht që do të sillte një fshesë ndaj të gjithë njerëzve të LSI-së në të gjitha nivelet, jo vetëm ato politike, por edhe ato administrative, siç ndodhi kudo, përfshi edhe Bashkinë e Tiranës, ku kontributi i LSI-së ishte i jashtëzakonshëm. Kështu ndodhi edhe me përfaqësuesin që kishte propozuar LSI-ja në KQZ, që më pas solli edhe atë situatë të papranueshme edhe mjaft shqetësuese të funksionimit të KQZ-së dhe të garancisë për zgjedhje. Ne nuk e pamë këtë interes, por ne pamë më larg në interesat e vendit, duke marrë edhe një risk, që ishte kalimi në opozitë dhe natyrisht që kjo nuk është fatkeqësi dhe s’duhet të jetë më e tillë në Shqipëri. Për më tepër që LSI-ja është krijuar si një forcë opozitare.
Unë jam për të respektuar vlerat dhe kontributet e njerëzve në bazë të formimit dhe duke respektuar ligjin, por nuk është e vërtetë se të gjithë janë të kënaqur, sepse shpeshherë të gjithë pretendojnë shumë më tepër, ndërkohë që mundësitë janë të kufizuara. Ne përpiqemi të jemi sa më të drejtë të jetë e mundur. Nuk është se jemi të pagabueshëm, por vendimtare mendoj, për votat që ka marrë LSI-ja, janë mesazhet që ka dhënë LSI-ja: mesazhet e tolerancës dhe bashkëpunimit në politikë, mesazhet e përqendruara kryesisht tek ekonomia dhe problemet sociale, përpjekjet për të ndërtuar sa më shumë konsensus, pa paragjykime dhe përpjekjet për të zgjidhur probleme dhe jo për të krijuar probleme artificiale. Qytetarët janë lodhur shumë nga historitë: “Çfarë je ti e çfarë jam unë: çfarë the ti dhe çfarë thashë unë?” Qytetarët duan zgjidhje konkrete dhe ky është angazhimi kryesor i LSI-së.
(Pjesa e dytë pas spoteve publicitare)

Blendi Fevziu – Rikthehemi sërish në transmetim të drejtpërdrejtë në këtë intervistë me Kryetarin e Kuvendit të Shqipërisë, zotin Ilir Meta, kreun e LSI-së, partisë e cila po mban në këmbë koalicionin e majtë qeverisës të vendit. Kam disa pyetje që lidhen me qeverisjen e vendit dhe do të doja të ishit sa më konciz në përgjigje.
E para: a po e çon taksa progresive, apo taksa e ndershme, siç e konsideron Kryeministri, në një lloj varfërimi vendin? Kam parasysh që më shumë se 56% e njerëzve që paguhen dhe e kanë pagesën deri në 300 mijë lekë, nuk tatoheshin, kurse rritja e akcizave tani dhe inflacioni që nuk indeksohet i ul rrogat e tyre.

Ilir Meta – Mendoj se të gjitha akuzat që bëhen në adresë të qeverisë aktuale janë të padrejta kur vijnë jo nga ju, nga qytetarët, apo nga ekspertët, por kur vijnë sidomos nga ish-Kryeministri, zoti Berisha, dhe përfaqësues të qeverisë së tij.

Blendi Fevziu – Unë kam pyetjen time. 56% të atyre që marrin paga në Shqipëri, zoti Meta, nuk përfitojnë nga ulja e taksave, varfërohen nga rritja e akcizës dhe 2,3% është indeksi i inflacionit.

Ilir Meta – Nuk është kështu. 3% e atyre që janë në punë do të kontribuojnë më shumë sesa në të kaluarën për shkak të tatimit mbi të ardhurat personale, kurse pjesa tjetër është pjesë që përfiton më shumë. Ndërsa për sa i takon gjithë kësaj politike, ne duhet të pranojmë se kjo situatë nuk ka ardhur këto tre muaj. Kjo është situatë e akumuluar dhe e fshehur. Ju mund të më thoshit se ne kemi qenë në qeveri me Partinë Demokratike. Po kam qenë dhe kam pasur qëndrim të ndryshëm edhe publikisht, edhe në raporte jo publike me zotin Berisha për situatën ekonomike të vendit. Nuk kam ndarë optimizmin që ai shprehte në publik, nuk kam qenë dakord me disa politika, të cilat ishin të karakterit elektoral dhe populist dhe njëkohësisht kam qenë prej gati tre vjetësh për realizimin e një programi dhe të një marrëveshjeje me Fondin Monetar Ndërkombëtar për të stabilizuar situatën makroekonomike në vend.

Blendi Fevziu – Ndani të njëjtin optimizëm me zotin Rama për gjendjen aktuale të ekonomisë?

Ilir Meta – Unë ndaj të njëjtin vlerësim se situata ekonomike e vendit kishte nevojë për t’u legalizuar, duke filluar nga borxhi, nga deficiti dhe shumë elemente të tjera, të cilat paraqiteshin ndryshe.

Blendi Fevziu – Borxhi është 10% më i lartë.

Ilir Meta – Nuk është e saktë, sepse kemi të bëjmë me njohjen e borxhit të fshehur, që kishte të bënte me detyrimet e papaguara nga ana e shtetit dhe e qeverisë ndaj biznesit për punët publike të bëra dhe për mosrimbursimin e TVSH-së. Ishte e domosdoshme për të bërë këtë marrëveshje me Fondin Monetar Ndërkombëtar dhe me Bankën Botërore, e cila garanton një program mbështetjeje me kushte të favorshme. Natyrisht me disa kushte për të ecur në drejtim të reformave strukturore dhe njëkohësisht edhe për të rritur të ardhurat vit pas viti përmes reformave, në mënyrë që jo vetëm të zhbllokojmë situatën ekonomike në vend, duke i dhënë që në vitin e parë të kësaj qeverie 350 milionë dollarë biznesit dhe këtu përfiton biznesi i madh, i cili do të detyrohet të paguaj tatimfitimin nga 10% në 15%, por njëkohësisht përmes kësaj marrëveshjeje ne japim një mesazh të rëndësishëm të përmirësimit në një kohë të shpejtë si të uljes së deficitit buxhetor, si të uljes së borxhit kombëtar.

Blendi Fevziu – Këtë do ta shohim, sepse morët borxh 250 milionë, zoti Meta, në tetor dhe nuk shlyet asnjë borxh të biznesit.

Ilir Meta – Pse u morën 250 milionë?

Blendi Fevziu – Për shpenzime, për zyra, për makina, thotë zoti Berisha.

Ilir Meta – Këto janë spekulime. Këto janë përralla.

Blendi Fevziu – Pse dështoi paketa juaj

Ilir Meta – ... më fal, borxhi u morr sepse mbi 95% të shpenzimeve vjetore të qeverisë, të buxhetit të shtetit ishin bërë deri në muajin shtator kur u largua zoti Berisha nga zyra. Pjesa më e madhe e tyre ishin bërë vetëm 6 muaj përpara zgjedhjeve elektorale. Atëherë qeveria të mos marrë borxh që të paguajë faturat e pensioneve çdo muaj, t’i linte pensionistët pa pensione? Të mos marrë borxh që të paguajë pagat e administratës?

Blendi Fevziu – Jo, të mbledhë më shumë të ardhura nga tatimet dhe doganat.

Ilir Meta - Po është duke mbledhur, por një gropë kaq e madhe nuk mund të mbushet as për një muaj dhe as për një vit, prandaj kemi një marrëveshje disavjeçare me FMN-në dhe me Bankën Botërore, ku jo vetëm qeveria është detyruar të marrë borxh për të përballuar këto pagesa të detyrueshme, për shkak se qeveria e mëparshme, për hir të fushatës e zbrazi krejtësisht buxhetin e shtetit. Njëkohësisht për të zhbllokuar situatën ekonomike dhe për t’i hequr litarin nga fyti biznesit, qeveria ishte e detyruar dhe për të bërë këtë marrëveshje, e cila natyrisht e rrit borxhin, por në interes dhe të shpëtimit të biznesit edhe të fillimit të gjallërimit ekonomik në vend të përmirësimit të treguesve financiarë, por dhe të situatës me bankat ku dihet që një pjesë e madhe e nivelit të kredive të këqija janë për shkak se biznesi kishte marrë borxh nëpër banka për të bërë rrugë, për të bërë ujësjellës, për të bërë vepra publike, me garancinë se kishte kontrata me qeverinë që do të paguajë. Dhe gjithçka është në funksion të zhvillimit ekonomisë së vendit.

Blendi Fevziu – Përse dështoi paketa juaj fiskale zoti Meta?

Ilir Meta – Nuk ka asnjë dështim të paketës fiskale.

Blendi Fevziu – Ju kishit propozuar një sistem tjetër taksimi në zgjedhje.

Ilir Meta – Nuk është pikërisht kështu. Ne kemi thënë gjithmonë se çështja e taksave dhe këtë e keni në çdo bisedë nuk është çështja kryesore, nuk duhet kthyer në një çështje ideologjike. Pra, ose taksë e sheshtë ose taksë progresive.

Blendi Fevziu – Është çështje e administrimit dhe jo ideologjike.

Ilir Meta – Është çështje e administrimi, në funksion të zhvillimit të ekonomisë. Janë bërë lehtësi të mëdha, taksa e biznesit të vogël është hequr fare, pra për biznese deri në 2 milionë lekë. Taksa e biznesit nga 2 milionë tatim-fitimi ë nga 10% është bërë 7,5%. Natyrisht që kemi një problem te biznesi i madh ku tatim-fitimet nga 10% bëhen 15%. Por, ky kontribut shtesë, pra kjo rritje prej 5% e biznesit të madh që është parashikuar të jetë deri në 70 milionë dollarë, kemi parasysh që ky është një kontribut, që ky biznes do të mblidhet patjetër, që ky biznes të marrë që në vitin e parë të gjitha borxhet që shtetet dhe qeveria i ka pasur ndër vite prej 350 milionë dollarë. Pra të gjithë veprat publike të papaguara dhe TVSH-në e parimbursuar deri tani për vite të tëra nga qeveria. Pra, është një kontribut dhe një sakrificë që ia vlen duke pasur parasysh një fakt tjetër, sepse është e vërtetë që ne kemi pasur tatim-fitimin 10% për 6 vjet ose për 7 vjet. Por nuk është se ky ka qenë problemi as avantazhi më i madh as problemi më kryesor i biznesit, sepse duket qartë nga të gjithë indikatorët e institucioneve ndërkombëtare, të cilët përcaktojnë klimën e biznesit në vend, që nga Doing business etj., se vitet e fundit ka ardhur duke u përkeqësuar rankimi i Shqipërisë për sa i takon klimës së biznesit, edhe pse taksa e tatimit mbi fitimin ka qenë në nivelin 10%, sepse e gjithë klima ka qenë duke u rënduar në tërësi për shumë arsye. Natyrisht, shumë i rëndësishëm është administrimi fiskal dhe sjellja me biznesin që nga tatimet, doganat dhe administrata...

Blendi Fevziu –Kryeministri ka thënë që vishuni bukur kur shkoni te biznesi!

Ilir Meta – Unë besoj se biznesi i madh do të japë një kontribut më të madh dhe do të marrë në një kohë rekord atë që shteti ia ka mohuar padrejtësisht për vite të tëra, që do t’i japë mundësinë të gjallërohet, të investojë dhe të zgjerojë aktivitetet e tij. Njëkohësisht do të ketë një sjellje të re ndaj biznesit. Kjo do ta bëjë koston reale dhe shumë më të favorshme sesa deri dje.

Blendi Fevziu – Kam pasur një diskutim me Kryeministrin për këtë çështje, prandaj nuk do të doja të ndalesha shumë, por po ju pyes, a keni dështuar si mazhorancë, zoti Meta, në betejën për rendin publik? Po shpërthejnë tritolet e makinave sikur të jenë fishekzjarrë, po hidhen njerëz në ajër, nuk guxon të hapësh televizorin, sepse ka çdo ditë krime nga më monstruozët, ka grabitje pafund banesash, biznesesh etj. A ka qenë kjo që ne kemi sot situata e rendit që ju do të kërkonit nga qeveria juaj, ose a e imagjinonit nga qeverisja juaj katër muaj më parë, zot Meta, apo gjashtë muaj më parë kur fituat zgjedhjet?

Ilir Meta – Qeveria është në fillimet e saj edhe në këtë drejtim. Unë mendoj se qeveria, Ministria e Brendshme dhe Policia e Shtetit kanë treguar një vullnet dhe një energji për të rritur prezencën e shtetit dhe të policisë për të goditur krimin dhe kriminalitetin. Natyrisht që situata është komplekse, sepse është edhe për shkak të situatës ekonomike dhe sociale dhe kjo situatë nuk është krijuar në 2-3 muaj, do të ishim naivë po ta besonim këtë. Situata e rendit absolutisht, sidomos në vitin e fundit të PD-së, ka qenë mjaft e rënduar dhe e degraduar dhe sigurisht që do të duhet një kohë për të pasur një efektivitet maksimal të Policisë së Shtetit. Unë kam një mendim dhe vlerësim të ndryshëm, ashtu sikurse është e rëndësishme që edhe opozita të kuptojë se çështja e rendit publik është në interes të të gjithë qytetarëve, jo vetëm të atyre që kanë votuar për këtë mazhorancë, por është po kaq në interes të të gjithë qytetarëve shqiptarë dhe të atyre që kanë votuar për PD-në. Prandaj dëshiroj që ata të ngrihen mbi interesat e luftës politike, të mos e instrumentalizojnë këtë çështje vend e pa vend dhe të jenë në krah të policisë vazhdimisht.

Blendi Fevziu – Zoti Meta, në një intervistë me Bugajskin keni deklaruar se jeni në favor të sekuestrimit të pasurive të paligjshme të politikanëve. A keni dijeni për pasuri të paligjshme politikanësh?

Ilir Meta –Nuk është detyra ime që të kem dijeni, por nëse do të kisha dijeni, të jeni të sigurt se do ta kisha bërë detyrën time. Absolutisht që kjo është një nga goditjet kryesore që synohet për t’i dhënë korrupsionit në vend jo vetëm për politikanët, por për të gjithë zyrtarët publikë.

Blendi Fevziu – Deri tani nuk ka ndodhur për asnjë politikan, në mos gaboj?!

Ilir Meta – Deri tani nuk ka ndodhur për asnjë politikan dhe zyrtar të lartë, por me përmirësimet që shpresojmë të bëhen në legjislacion, kjo do të ketë një peshë të rëndësishme në luftën kundër korrupsionit, abuzimit dhe shkeljes së ligjit.

Blendi Fevziu – Maxhoranca e sotme ka çuar disa dosje dhe ka përgatitur disa të tjera për ish-ministra në prokurori, duke i denoncuar për abuzime, shkelje etj. A keni frikë se mund të dërgohen dosje të ish-ministrave të LSI-së gjatë qeverisë “Berisha”?

Ilir Meta – Për sa i takon raportit tim me këtë çështje, absolutisht nuk kam asnjë lloj frike dhe shqetësimi, sepse porosia ime e parë për të gjithë ministrat dhe drejtuesit është respektimi i ligjit.
Për sa i takon raportit të ministrave apo të ish-ministrave, kur dikush akuzohet dhe përflitet, është më mirë që çështja t’i shkojë drejtësisë dhe, kur ai është i pastër me ligjin, përsëri më mirë të sqarohet sesa të mbetet gjithmonë një çështje e debatueshme.

Blendi Fevziu – Zoti Meta, akti normativ, i cili kërkonte shtyrjen e ligjit “Për administratën publike”, u hodh poshtë nga Gjykata Kushtetuese. A do të kthehen sërish në punë personat e shkarkuar nga puna, sidomos pas 1 janarit, pas vendimit të Gjykatës Kushtetuese?

Ilir Meta – Së pari, vendimi i Gjykatës Kushtetuese, pavarësisht nga vlerësimi i ndryshëm që mund të ndajmë për këtë vendim, do të respektohet. Së dyti, natyrisht që gjithçka do të bëhet në përputhje me ligjin.

Blendi Fevziu – Zoti Meta, në një intervistë dhënë për revistën “Java” jeni shprehur se Kushtetuta nuk është një tabu, pra një gjë e shenjtë ku nuk hyhet as natën, që do të thotë se mund të ndryshohet. Ju keni bërë grevë urie kundër ndryshimit të Kushtetutës, përse keni ndryshuar tani mendim?

Ilir Meta – Unë kam bërë grevë urie kundër ndryshimeve për mënyrën se si ato u bënë, që ishin krejtësisht të nxituara dhe të pajustifikuara. Koha e konfirmoi këtë gjë.
Së dyti, ndryshimet që u bënë prishën disa ekuilibra në raportet midis pushteteve dhe institucioneve në vend. Sigurisht që nuk është një gjë e mirë që në Kushtetutë të ndërhyhet vazhdimisht, prandaj është një dokument themeltar që t’i rezistojë sa më shumë kohës. Nuk është kjo më kryesorja, por janë disa reforma të rëndësishme që ne duhet të bëjmë. Një nga këto reforma është edhe ajo në fushën e drejtësisë, që është mjaft komplekse.

Blendi Fevziu – Çfarë kuptoni ju personalisht me reformë në drejtësi?

Ilir Meta – Në thelb me reformë në drejtësi ne kuptojmë, ose më saktë unë kuptoj rritjen jo vetëm të pavarësisë, por edhe të transparencës, të llogaridhënies dhe të efikasitetit të këtij sistemi, që do të thotë se...

Blendi Fevziu – Duke goditur KLD-në do të bëhet kjo?

Ilir Meta – Jo, kjo çështje nuk synon të godasë asnjë institucion, por synon të vërë në punë çdo institucion. Ju e përmendët KLD-në, se unë nuk kisha ndërmend të përmendja asnjë institucion. Në rast se ka një politikan në Shqipëri që mendon se KLD-ja ka funksionuar në mënyrë perfekte, le të dalë në televizion dhe të na e thotë.
Ne kemi disa arsye dhe fakte për të pasur një shqetësim jo për individë të caktuar, por për efikasitetin e këtij institucioni vendimtar për drejtësinë. Unë do t’ju përmend dy raste, meqë ju përmendët KLD-në. Në bazë të ligjit, KLD-ja ka për detyrë të bëjë vlerësimin e performancës së gjyqtarëve. Sot jemi në vitin 2014 dhe ka përfunduar vlerësimi i gjyqtarëve për vitet 2005-2006. Pra, për gjithë këtë periudhë vlerësimi i tyre nuk është bërë. Ndërkohë, promovimet dhe emërimet që bën KLD-ja sot në vitin 2014 apo ka bërë në vitin 2013, janë në bazë të një vlerësimi që i takon një kohe tjetër. A është normale? A është në përputhje me ligjin? A tregon efikasitet të KLD-së ky sistem vlerësimi?
Një fakt tjetër është se ende kemi shumë kryetarë gjykatash, të cilët janë të komanduar, ku edhe me ligj, edhe me vendim të KLD-së, ata mund të komandohen për një periudhë 3-mujore. Ndërkohë, në mos gaboj, duhet të jenë 17, kanë qenë më shumë se 20, por edhe me insistimin e ministrit të Drejtësisë janë emëruar katër të tillë në një nga mbledhjet e fundit. A është kjo situatë normale, që një gjyqtar i komanduar të qëndrojë për vite të tëra kur kjo është edhe në kundërshtim me ligjin?
Kemi një rast tjetër, për shembull: një gjyqtar Apeli, për t’u bërë kryetar i Apelit, sipas ligjit, duhet të ketë të paktën dy vlerësime pozitive. Kjo gjë ka ndodhur edhe duke pasur vetëm një vlerësim. Unë nuk jam këtu për të bërë akuza...

Blendi Fevziu – As unë nuk ju kundërshtoj dot për raste konkrete, sepse nuk jam në dijeni të tyre.

Ilir Meta – Kjo është një temë e gjerë. Nuk jam këtu për të bërë akuza konkrete për institucione konkrete. Jam kundër ndërhyrjes së politikës për interesat e saj në drejtësi, sepse kjo gjë ka ndodhur me shumicë në Shqipëri, prandaj kemi këtë situatë. Personalisht, jam për të hapur sistemin e drejtësisë jo ndaj politikës, por, në radhë të parë, ndaj qytetarëve dhe shoqërisë.

Blendi Fevziu – Si mund hapet ndaj shoqërisë?

Ilir Meta – Përmes këtyre reformave, ku duhet të përfshihen të gjithë aktorët, reforma që do të bëhen nga vetë përfaqësuesit e këtij sistemi, por edhe me ndihmesë jashtë tij, me asistencën e EURALIUS-it, të Komisionit të Venecias, të OBDAT-it. Pra, të të gjithë partnerëve tanë ndërkombëtarë, që do të kenë parasysh të gjitha çështjet më të mprehta të theksuara edhe në raport-progresin e fundit për Shqipërinë, për drejtësinë në tërësi dhe për institucione të veçanta dhe ne t’i japim fund një herë e mirë përpjekjes për ta politizuar drejtësinë, si për të kapur territore në drejtësi për qëllime politike, si edhe që për interesa politike të mbrojmë këtë situatë ku ndodhet një pjesë e mirë e drejtësisë. Kjo jep koston që nga rendi publik, te çështja e pronave, te problemet ekonomike dhe tek të gjitha problemet e tjera që ka shoqëria jonë.
Pra, nuk jam për të bërë një reformë të nxituar. Absolutisht.

Blendi Fevziu – Keni kërkuar....

Ilir Meta – Por ne nuk mund dhe nuk duhet t’i shmangemi dhe t’i fshihemi kësaj sfide.

Blendi Fevziu – Mirë është që kjo çështje të ballafaqohet me opozitën, sepse unë nuk di...

Ilir Meta – Patjetër! Por kush mendon që sistemi i drejtësisë në Shqipëri funksionon në mënyrë efikase dhe të shkëlqyer, le të dalë dhe ta thotë këtu në studio. Unë nuk e them dot këtë gjë, ashtu sikurse nuk mund të them se të gjithë gjyqtarët janë njësoj, të gjithë prokurorët janë njësoj, të gjithë anëtarët e KLD-së janë njësoj. Absolutisht, por ne duhet të vëmë dorë si shoqëri, pra jo thjesht si maxhorancë, jo thjesht si maxhorancë dhe opozitë bashkë, por si shoqëri, në mënyrën më transparente.

Blendi Fevziu – Zoti Meta, kërkoni konsensus për reformën në drejtësi, kërkoni konsensus për reformën administrative, për të cilën të gjitha palët janë dakord në parim që duhet kryer, por ndërkohë shkelni të gjitha konsensuset në raste të tjera, siç është ligji “Për Gjykatën Administrative”, ndërhyrja në ILDKP, ndërhyrja në AMA dhe ky ka qenë pretendimi i opozitës.

Ilir Meta – Së pari, këto janë paragjykime.
Së dyti, lidhur me reformën administrativo-territoriale, qëndrimi i opozitës është absurd. Ne kemi treguar durim maksimal dhe do të vazhdojmë ta tregojmë durimin tonë...

Blendi Fevziu – Pse nuk kërkoni konsensus edhe për gjërat e tjera? Pse prishni konsensusin në gjërat e tjera?

Ilir Meta – Nuk ka asnjë prishje konsensusi. Konsensus për Partinë Demokratike, për fat të keq, do të thotë që gjithçka të bëhet sipas këmbënguljes së saj, absolutisht. Ndërkohë, në rastin konkret, te reforma administrativo-territoriale i është krijuar e gjithë hapësira opozitës. Është krijuar një komision bipartizan, 8 anëtarë nga maxhoranca, 8 anëtarë nga opozita; dy bashkëkryesues, nga Partia Socialiste dhe nga Partia Demokratike. Është një komision i ndërtuar mbi bazën e konsensusit për gjithçka. Shqipëria ka 385 bashki dhe komuna, ndërkohë që Kosova ka 37...

Blendi Fevziu – Të gjithë janë dakord për këtë.

Ilir Meta – Ndërkohë që ...

Blendi Fevziu – Flitet për konsensusin, jo për ligjin në vetvete, jo për reformën në vetvete.

Ilir Meta – Atëherë, opozita duhet të vijë aty...

Blendi Fevziu – Sepse kërkoni bashkëpunim për një gjë dhe prishni bashkëpunimin në pesë gjëra të tjera, zoti Meta!

Ilir Meta – Nuk ka asnjë prishje bashkëpunimi. Ju e keni fjalën për ligjin “Për statusin e nëpunësit civil”?

Blendi Fevziu – Ligji për statusin e nëpunësit civil...

Ilir Meta – Atëherë kam një pyetje për ju: përse Partia Demokratike nuk i bëri aktet nënligjore për zbatimin e?...

Blendi Fevziu – Sepse bëhen pas hyrjes së tij në fuqi.

Ilir Meta – Absolutisht jo. Nuk është fare e vërtetë.

Blendi Fevziu – Kështu është shprehur këtu zoti Halimi.

Ilir Meta – Po, mirë, zoti Halimi ashtu do të thotë. Pse si mendoni ju se do të thotë ndryshe?

Blendi Fevziu – Sa po më thonë: dy dekrete për anëtarë të Gjykatës së Lartë kanë dy muaj që qëndrojnë në parlament dhe nuk votohen.

Ilir Meta – Kjo nuk ka lidhje fare me këtë gjë. Kjo ka lidhje me një kërkesë që ka bërë Komisioni i Ligjeve për t’u njohur. Ka kërkuar disa sqarime nga institucioni i Presidentit lidhur me procedurën. Pra, nuk ka asgjë këtu, përkundrazi, siç ka kërkuar Presidenti me të drejtë dokumentacion nga Kuvendi për zgjedhjen e një anëtari të KLD-së nga Kuvendi.

Blendi Fevziu – Zoti Meta, dje Kryeministri Rama, dhe po e quaj kryetari i partisë më të madhe, ka darkuar me kryetarin e Partisë “Fryma e Re Demokratike”, zotin Bamir Topi, ish-president i vendit. A do të ishte zoti Topi i mirëpritur në qeveri? Pra, a do të kishte një ftesë nga ana juaj, se pastaj e gjykon ai nëse?...

Ilir Meta – Ftesën e parë për në qeveri e bën Kryeministri, e bën zoti Rama. Për mua nuk do të kishte asnjë problem.

Blendi Fevziu – Në parim nuk do të kishte problem. Si e gjykoni mbetjen jashtë listës së qeverisë të emrave të njohur si zoti Blushi ose zoti Majko, i cili ka qenë dy herë kryeministër i vendit në një moment të vështirë, siç ishte fitues i luftës së Kosovës?

Ilir Meta – Kjo është një çështje që i takon Partisë Socialiste. Nuk është një çështje që më takon mua apo Lëvizjes Socialiste për Integrim. Unë ruaj konsideratën dhe respektin tim më të madh për të dy këta emra dhe figura të spikatura të Partisë Socialiste, por këto janë ndarjet e detyrave...

Blendi Fevziu - A vazhdoni të keni kontakte me zotin Basha? A mbetet ende miku juaj?
Ilir Meta - Së pari, të jeni të sigurt, se as zoti Basha dhe askush tjetër, për shkak të pozicionit politik nuk mund të jetë armiku im.
E dyta, në një pritje kemi edhe ndonjë rast t’i japim dorën njëri-tjetrin. Unë e respektoj edhe si kryetar i Partisë Demokratike përveçse si kryetar i baskisë, që edhe kam votuar për të.

Blendi Fevziu - A mund të ndodhë një deja vu, që një ditë zotin Basha ta shohim të vijë në Gjirin e Lalzit për ngjala?

Ilir Meta - Si për ngjala?

Blendi Fevziu - Do të thotë për të ndërtuar një marrëveshje tjetër me ju, që lë pas shpine aleancën me Ramën në funksion të një koalicioni tjetër?

Ilir Meta - Së pari, unë kur ftoj dikë në shtëpi e pyes edhe për menynë që preferon. Menynë nuk e zgjedh unë por miku, për ta respektuar dhe për ta nderuar.

Blendi Fevziu – Ju jeni me dietë. Ka shumë veta që thonë se keni rënë shumë në peshë. Me menynë e mikut kam frikë se nuk bie dot në peshë.

Ilir Meta - Ndonjëherë edhe do ta prishim. Nuk është se nuk e prishim dietën në raste të caktuara.

Blendi Fevziu – Realisht keni rënë me dietë, apo me stërvitje?

Ilir Meta – Përpiqemi me të gjitha mundësitë, qoftë edhe duke mos përdorur ashensorin në Kuvend dhe duke ngjitur shkallët disa herë në ditë, por absolutisht unë mbetem i hapur për të respektuar zotin Basha, zotin Berisha dhe të gjithë drejtuesit e Partisë Demokratike, jo vetëm për shkak të katër vjetëve që patëm mundësinë të bashkëpunonin gjatë qeverisë së mëparshme, por në veçanti në emër të së ardhmes ky vend, ka nevojë për bashkëpunim. Unë do të kisha shumë dëshirë të dëgjoja ndonjë lajm që zoti Rama dhe zoti Basha ishin për darkë apo për drekë diku.

Blendi Fevziu - Në asnjë vend të botës nuk është kaq e zakonshme që kreu i maxhorancës dhe i opozitës të ulen dhe të darkojnë bashkë.

Ilir Meta - Nuk ka asgjë të pazakonshme, pse ne të mos...

Blendi Fevziu - Falë Zotit, që nuk ulen, sepse në këtë vend çdo gjë do të kthehej në pazar.

Ilir Meta - Ky është paragjykimi juaj. Nuk ka përse çdo takim dhe çdo bashkëpunim ta vlerësojmë si pazar. Ne duhet të nxisim frymën e konsensusit dhe të bashkëpunimit. Ky është një vend i përbashkët i të gjithëve. Duhet të kujdesemi për vendin dhe të mos ta dëmtojnë atë pa dashje, duke menduar si të dëmtojmë njëri-tjetrin.

Blendi Fevziu - Kam dy pyetje të fundit.
Kam disa pyetje që kanë ardhur nga facebook-u. Pastaj do të vazhdojmë në pjesën e tretë me një përmbledhje të aktiviteteve tuaja, siç ndodhi me zotin Rama dhe zotin Basha në dy javët paraardhëse.
Zoti Meta, dikur në një intervistë më keni thënë se në vitin 1990 donit të largoheshit nga Shqipëria si refugjat. A jeni penduar që nuk keni ikur nga Shqipëria?

Ilir Meta - Nuk jam penduar. Një shoku im shumë i ngushtë hyri në ambasadë. Unë nuk hyra për disa arsye, sepse edhe doja të mbaroja studimet.
E dyta, kisha shqetësimin e problemeve për familjen. Në fund të fundit, tani jam i bindur se edhe sikur të isha larguar në emigracion, do të isha kthyer.

Blendi Fevziu - Zoti Meta, si mendoni: ky vend do të ishte më i mirë nëse ju do të kishit ikur refugjat? Që do të thotë se çfarë raporti mendoni se keni vendosur me historinë postkomuniste të Shqipërisë?

Ilir Meta - Nuk kam luftuar dhe nuk luftoj asnjëherë për historinë, por jam i bindur se ne këtë frymë bashkëpunimi që unë dhe forca politike që drejtoj, përpiqemi të kultivojmë politikën shqiptare, Shqipëria i ka mundësitë të bëhet një vend shumë më i mirë dhe shumë më shpejt sesa e mendojmë ne sot, të lodhur pas kësaj historie 23-vjeçare.

Blendi Fevziu - Po ju drejtoj disa nga pyetjet që me kanë ardhur në facebook. Ju lutem, filloni me pyetjet, vetëm për sa më të shkurtra: ju kërkoj një konsensus. Devi Skëndaj: “Pse në shumë raste deputetët e LSI-së kundërshtojnë Edi Ramën, se duhet të jetë më i qetë? Sot dëgjova Petrit Vasilin, që tha në NEW 24 se Kryeministri nuk duhet të jetë i ashpër. Pse në koalicionin me PD-në nuk ka pasur guxim të shprehej kështu? Megjithëse pati plot momente kur mund të kritikohej qeveria: për shembull, për 21 janarin”.

Ilir Meta – Nëse kjo është e vërtetë, i shkon merita edhe zotit Rama.

Blendi Fevziu – Një tjetër shkruan: “A është e vërtetë apo thashethem që bashkëshortja e tij, zonja Monika Kryemadhi, do të konkurrojë për Bashkinë e Tiranës, përballë kryetarit aktual?”.

Ilir Meta – Jo çdo titull që del në gazetën e famshme “Koha jonë” duhet marrë si e vërtetë.

Blendi Fevziu – Zoti Lesi... E keni quajtur si...

Ilir Meta – Thashë: jo çdo titull.

Blendi Fevziu – Ah, çdo titull!... Kur ishit Kryeministër, ku e keni çuar floririn, thotë dikush. England Ceka.

Ilir Meta – Besoj se Doktori duhet ta dijë më mirë.

Blendi Fevziu – Besar Bozgo thotë: “A mendoni se mund të bëheni sërish Kryeministër?”.

Ilir Meta – Nuk e kam vrarë mendjen shumë për këtë çështje.

Blendi Fevziu – Pyetja tjetër. “Tani që Edi Rama vendosi pllakat e bronzit në kujtim të viktimave të 21 janarit, nga cila rrugë i bie për të shkuar në Kryeministri?”.

Ilir Meta – Kjo është një pyetje për zotin Rama.

Blendi Fevziu – Pyetja tjetër. Urim Osmani: “A e mban të njëjtin bllok në xhep me Ramën, si e mbanit me Berishën?”.

Ilir Meta – Unë mendoj se kjo pyetje është interesante. Bllok në xhep mbajnë të gjithë njerëzit që janë seriozë dhe kanë një axhendë për të ndjekur.

Blendi Fevziu – Eri Milano thotë: “Zoti Meta, çfarë mendon për taksën progresive? Nuk mendon se është e padrejtë për disa njerëz që i fitojnë me dije ato para dhe jo me vjedhje?”. Bën fjalë për ata 11 mijë vetë që taksohen 23%.

Ilir Meta – Nuk ka një debat për LSI-në për taksë progresive apo të sheshtë, por ka një debat për politika të taksave që sjellin rritje ekonomike të vendit.

Blendi Fevziu – “Zoti Meta, në atë përqindjen tuaj të pushtetit në administratë, do të punësoni vetëm militantë të LSI-së? Po njerëzit e thjeshtë a do ta kenë këtë të drejtë?”

Ilir Meta – Absolutisht që do të kenë të drejtë. Programi ynë për punësimin nuk do të thotë se do të punësojmë militantë të LSI-së, por do të thotë të shtojmë vende të reja pune për të gjithë shqiptarët.

Blendi Fevziu – Igli Koçi thotë: a mund ta pyesësh zotin Meta se me çfarë të ardhurash arriti të ndërtojë vilën në Gjirin e Lalzit dhe apartamentin luksoz në Bllok, duke qenë se të vetmet të ardhura që ka janë rroga? Dikur, thotë, këtë pyetje ia kam bërë edhe zotit Tahiri.
Ilir Meta – Kjo është një pyetje për të cilën mund t’i referohen ILKP-së, që publikon çdo vit të ardhurat dhe pronat e mia.

Blendi Fevziu – Pyetja tjetër: a e shikon zoti Meta veten në një kontradiktë të fortë, duke gjykuar deklarimet e tij të vazhdueshme konstruktive, tonin e qetë e babaxhan, nga njëra anë, por nga ana tjetër realitetin e dhimbshëm të spastrimeve që gati të gjithë drejtuesit e institucioneve, përfaqësues të LSI-së, po i bëjnë administratës që drejtojnë?

Ilir Meta – Nuk e kam të qartë këtë pyetje, apo saktësinë e saj në terren, por një nga porositë që unë kam dhënë për drejtuesit e LSI-ë edhe në mbledhjen e fundit është për të respektuar ligjin dhe për të qenë shumë të kujdesshëm me këtë çështje.

Blendi Fevziu – Po e mbyll me këtë pyetje: “A keni ndërmend të qëndroni ndonjëherë në opozitë? Është edhe një barcaletë e famshme që...”

Ilir Meta – E di. Duhet të jenë shumë të rinj ata që pyesin. Kam qenë vazhdimisht në kërkim të opozitës. Dalja në opozitë ka qenë një zgjedhja ime, që nga momenti kur dhashë dorëheqjen nga zëvendëskryeministër dhe ministër i Jashtëm me PS-në. Kam qëndruar për një kohë të gjatë në opozitë dhe sa herë do të duhet që të jem në opozitë, do të jem aty ku duhet.

Blendi Fevziu – Zoti Meta, faleminderit!