Tashmë është përuruar markata e tregtimit të mishit në Pazarin e Ri, Njësia Bashkiake Nr.2, në Tiranë.
Në ceremoninë e mbajtur me këtë rast, ku ishte i pranishëm ministri i Bujqësisë, Zhvillimit Rural dhe Administrimit të Ujërave Edmond Panariti, Prefekti i Qarkut Tiranë Sadi Vorpsi u shpreh se, “jemi këtu për të inauguruar një model të tregtimit të mishit, që duhet të jetë shembull për të gjitha njësitë bashkiake të kryeqytetit”.
Pas thirrjes sonë për sensibilizim dhe pas masave drastike të Task-Forcës së ngritur për therjen dhe shitjen e kontrolluar të mishit dhe të produkteve të tjera ushqimore, ndihem i lumtur që sot e shoh të konkretizuar një treg të tillë, që siguron standarde evropiane aty ku Shqipëria synon të aderojë, tha ai.
“Përgëzoj sipërmarrësit, si dhe kryetarin e Njësisë Nr.2 zotin Elez Gjoza, për kontributin dhe pararojën dhe shpresoj që iniciativa të tilla të mos mbeten sporadike, por të shpërndahen në mënyrë kapilare në të gjitha njësitë, tha Prefekti Vorpsi.
