Nën kujdesin e Kuvendit të Shqipërisë, zhvillohet në Tiranë në datat 11-12 mars 2014, takimi i 42-të i Komisionit për Çështjet Ekonomike, Tregtare, Teknologjike dhe Mjedisore i Asamblesë Parlamentare të Bashkëpunimit Ekonomik të Detit të Zi (PABSEC).
Punimet e Komisionit për Çështjet Ekonomike, Tregtare, Teknologjike dhe Mjedisore do të fillojnë ditën e martë, më 11 mars 2014, ora 10:00 në mjediset e Hotel Sheraton.
Fjala e hapjes së aktivitetit do të mbahet nga z. Musa Guliyev, Kryetar i Komisionit, ndërsa në emër të Kuvendit të Shqipërisë, takimi do të përshëndetet nga z. Namik Dokle, Kryetar i Delegacionit Shqiptar në PABSEC.
Në axhendën e ditës së parë të punimeve parashikohet që Komisioni për Çështjet Ekonomike, Tregtare, Teknologjike dhe Mjedisore të diskutojë dhe të miratojë raportin “Futja e teknologjive të reja në ndërtimet moderne dhe arkitekturën e shteteve anëtare të BSEC, si dhe të miratojë rekomandimin 137/2014 “Teknologjitë e reja në ndërtimet modern dhe arkitekturën e shteteve të BSEC”.
Në ditën e dytë të punimeve, më 12 mars, 2014, ora 10:00, parashikohet të përcaktohet vendi ku do të mbahet mbledhja e ardhshme e Komisionit për Çështjet Ekonomike, Tregtare, Teknologjike dhe Mjedisore i Asamblesë Parlamentare të Bashkëpunimit Ekonomik të Detit të Zi, si dhe diskutimi i çështjeve të tjera.
