Bruksel / Deputetja e PD në takimin vjetor të Bordit të Përgjithshëm të Forumit të Grave Popullore Europiane.
“Të drejtat e grave në Shqipëri janë të rrezikuara. Qeveria në Tiranë në shkelje flagrante me ligjin e nëpunësit civil, ka përzënë nga puna për shkaqe politike mbi 7000 profesionistë, gjysma e tyre janë gra dhe vajza, mes tyre nëna kryefamiljare , gra rome dhe familjarë të ish të përndjekurve politikë gjatë regjimit Hoxha. Gjykata Kushtetuese rrëzoi skenarin e Kryeministrit Rama për spastrimin e administratës nga profesionistët dhe zëvendësimin me militantë dhe familjarë të oborrit kryeministror, por revanshi i qeverisë nuk ka të ndalur”
Kështu deklaroi në Bruksel , Kryetarja e Lidhjes Demokratike të Gruas së Shqipërisë, deputetja Albana Vokshi gjatë takimit vjetor të Bordit të Përgjithshëm të Forumit të Grave Popullore Europiane.
Deputetja e Partisë Demokratike, Albana Vokshi informoi edhe për presionet e qeverisë ndaj 6 kandidateve gra, të cilat nën frikën e kërcënimeve hoqën dorë nga mandati i deputetit.
Ndërkohë që gjatë fjalës së saj u ndal edhe në sulmet që Qeveria Rama ka nisur ndaj institucioneve kushtetuese, Institucionit të Presidentit,ILDKP,AMA .
Europarlamentaret shprehën shqetësim për situatën në Shqipëri në prag të diskutimit të statusit për vendin kandidat. Presidentja e Forumit të Grave Popullore Europiane Doris Pack, duke mbështetur politikën konstruktive të ndjekur nga kryetari i Partisë Demokratike, Lulzim Basha kritikoi ashpër zhvillimet në regres të plotë në Shqipëri dhe theksoi se vendi ka nevojë urgjentë të ecë para në rrugën e integrimit.
