Ditën e sot rreth orës 10:00 ka nisur seanca plenare në Kuvend, ku pritet të miratohen ligje të rëndësishme për buxhetin dhe për drejtësinë.
Fillimisht është parashikuar të diskutohet projektligji “Për Kontrollin e Lartë të Shtetit”, ndërsa më pas do nisin diskutimet për miratimin e projekt-buxhetit 2015, duke vijuar me tatimet, taksat, akcizën dhe tarifave doganore.
Lidhur me projektbuxhetin e vitit 2015, Deputetët e Grupit Parlamentar të Partisë Demokratike prezantuan 31 amendamente.
Këto amendamente kërkojnë uljen e taksave për shqiptarët, mosrritjen e çmimit të energjisë, uljen e çmimit të karburanteve dhe mosrritjen e taksës së qarkullimit, kompensimin e ish të përndjekurve politikë e pronarëve, uljen e shpenzimeve qeveritare si dhe rritjen e pagave, pensioneve dhe investimeve publike.
Deputetja Tabaku prezantoi amendamentin për heqjen e pjeshme të TVSH-së së energjisë siç premtoi maxhoranca aktuale në fushatë. “Sipas kërkesës së qeverisë, thuhet se ky çmim do të shkojë në vlerën e 12.3 lekë pa TVSH shoqëruar kjo me heqjen e fashës prej 300 kv, përkthehet në shtrenjtimin me 59.7% të çmimit në krahasim me atë që paguajnë sot qytetarët. Ato familje që konsumojnë 400 kv do të paguajnë 1500 lekë më shumë/muaj ndërkohë që ato që harxhojnë 800 kv apo familjet që shpenzojnë 1000 kv (që janë shumë të pakët) çmimi do të rritet me 4.6%. kush shpenzon më shumë do të paguajë më pak”, tha Tabaku. Ndërkohë deputeti Edmond Spaho u shpreh se rritja e taksës së karburanteve me 12 lekë do të ndikojë negativisht në ekonomisë shqiptare.
Ish-ministri i Financave, Ridvan Bode u ndal në politikën fiskale duke thënë se shqiptarët do të paguajnë më shumë, ndërsa shpenzimet e kota të qeverisë për administratën do të rriten me 150 milionë dollarë. “Z.Rama shtoi taksën e sheshtë me marifet duke e rritur atë me 50% më shumë. Kjo na bën që të kemi taksat më të larta në rajon. Kredi nuk po jepen dhe nuk ka shpresë për rritje ekonomike. Ky buxhet do të rrisë varfërinë sepse do të rrisë barrën e taksave me 160 milionë dollar, dhe nga këto, 150 milionë dollarë do të paguhen nga 95% e shqiptarëve. Nga ana tjetër, rriten me 150 milionë dollarë më shumë shpenzimet për administratën duke ulur ndjeshëm investimet publike”, tha Bode.
Ish kryeministri Sali Berisha akuzoi kryeministrin se po mashtron hapur shqiptarët duke thënë shifra imagjinare të pabesueshme. “Kryeministri Rama ka bllokuar ekonominë. Sot papunësia sot sipas insitucione ndërkombëtare është gati 40%. Me cinizëm del e thotë se ka punësura për një tremujor 70 mijë perosna, më shumë se në SHBA, ndërkohë që 13 mijë të punësuar i nxjerr në ndërtim të cilin ai e ka ndaluar me urdhër. Po bllokon biznese, një analfabet total, ndërkohë që ka mashtruar duke thënë se po rimburson TVSH-në. Nga 17 miliardë që është pretendimi i biznesit, kanë dhënë vetëm 8 miliardë. Kanë kontraktuar një borxh të paktën 30% më të lartë se sa borxhi që ne lamë ose rreth 250 milionë euro”, tha Berisha.
Deputeti Strazimiri kërkoi një fond real në buxhet për të kompensuar pronarët. “Amendamenti i kërkuar prej nesh kërkon kompensimin e pronarëve të grabitur nga regjimi i etërve të kësaj qeverie”.
Deputeti Sherefedin Shehu prezantoi amendamentin për rritjen e pagave dhe investimet në bujqësi. “Ky buxhet do të falimentojë fermerët shqiptarë. Rivendoset TVSh-ja për inputet bujqësore, braktisen fermerët duke mbështetur tregtarët si dhe ulen 10 herë përfituesit e subvencioneve nga rreth 15 mijë në 1600. Ky buxhet do të rrisë varfërinë më shumë, ndërkohë që ndihma ekonomike ulet 1,1 miliardë lekë. Pagat dhe pensionet ulen: inflacioni 2%, çmimet e mallrave bazë 6%-8%. Ndërkohë që paga reale do të jetë 15% me e ulet se ne 2013 dhe fondi 1.2 miliardë lekë i indeksimit të pensioneve duhet te jete 3-4 herë më i lartë”, tha Shehu.
Deputeti Florion Mima prezantoi amendamentin për mosrritjen e tatimit për të ardhura personale. Sipas tij, shkalla tatimore e rritur do të godasë ndjeshëm qytetarët shqiptarë por edhe për faktin se do të deformojë skemën tatimore duke rritur korrupsionin. “ Sistemi po kthehet në vrima duke ftuar njerëzit për evazion fiskal. Eshtë qesharak shpjegimi që po rritet me 50 % tatimi mbi fitimin nga depozitat që njerëzit të mos i depozitojnë dhe ti nxjerrin për ti investuar. Z.Rama thotë që ka 81 mijë vende pune por po të shikosh të gjitha statistikat, nuk kanë mbledhur asnjë qindarkë më shumë nga kontributet. Atëherë ku janë këto vende pune? Po e mbyll me një shprehje të Margaret Theçerit që thoshtë: Socialistët kanë shumë dëshirë të shpenzojnë veçanërisht paratë e të tjerëve”, tha Mima.
Deputeti Ristani prezantoi amendamentin për frenimin e shtetit policor. Sipas tij, shtesa në buxhet për 1200 policë nuk është e nevojshme pasi qeveria po kërkon të rrisë shtetin policor nepërmjet një policie partiake. Ai kërkoi që këto fonde të shkojnë për arsimin ose shëndetësinë.
Amendamentet e Partisë Demokratike synojnë:
1.Të ndalojnë rritjen e taksave mbi shqiptarët, pasi cdo rritje thjesht do të rëndojë akoma edhe më shumë situaten e vështirë ekonomike
2.Rritjen e fuqisë blerëse të familjeve shqiptare, sidomos atyre në nevojë, nëpërmjet heqjes së TVSH për energjinë dhe mallrat jetike të shportës (oriz, sheqer, bukë, etj). Ky ka qënë edhe premtim elektoral i qeverisë. Kjo masë është e nevojshme pasi papunësia po rritet dita-ditës
3.Rivendosjen e taksës së sheshtë 10 përqind për të ardhurat (përfshirë edhe pagat që ndryshuan vitin e kaluar) dhe jo rritjen e tyre në 15%
4.Ndihmë ndaj sektorit të agrobiznesit me heqjen e akcizës së naftës për bujqësinë dhe taksës së qarkullimit për produktet bujqësore.
5.Uljen e tatim fitimit nga 15% në 10%, sic ka qënë më përpara, kërkesë kjo e vetë biznesit.
6.Bërjen realitet të premtimeve elektorale: legalizim falas, shëndetësi falas, rroga e 13 për nëpunësit, dëmshpërblim për të përndjekurit politik, etj.
7.Uljen e borxhit, borxh i cili tashmë është në nivele shumë të larta dhe problematike.
8.Arsimi dhe shëndetësia të marrin atë pjesë të buxhetit që u takon, me qëllimin që këta sektore të financohen secili me 5% të PBB-së, cka do të thotë më shumë shërbim cilësor për qytetarët.
9.Investimet publike të jenë të paktën 5% e PBB-së, ku dihet që kemi një bllokim të investimeve të reja. Investimet krijojnë vende pune për qytetarët.
10.Zbatimin e vendimeve të gjykatave dhe ato Strasburgut, për të dëmshpërblyer financiarisht qytetarët.
