Në Korçë u çel sot Qendra Komunitare Ndërkulturore, një hapësire e re e cila i krijon komunitetit rom mundësi që të kryejë një sërë aktivitetesh të tilla si mbledhje, trajnime, apo edhe aktivitete sportive. Kjo qendër është pjesë e planveprimit të programit për përfshirjen sociale të komunitetit rom. Ky program financohet nga BE dhe implementohet nga UNDP në partneritet me Ministrinë e Mirëqenies Sociale dhe Rinisë. Tre qytetet ku zbatohet ky program janë Korça, Berati dhe Vlora.
Në përurimin e saj ishte Kryeministri Edi Rama i shoqëruar nga Ministri i Mirëqenies Sociale Erjon Veliaj, ndërsa merrte pjesë edhe Koordinatorja e Përhershme e Kombeve të Bashkuara në Tiranë, Zineb Touimi - Benjelloun, drejtues të pushtetit vendor, etj.
Ministri Veliaj vlerësoi Bashkinë e Korçës si bashkëfinancuese të këtij projekti dhe shpjegoi se si është konceptuar dhe sa do të jenë fondet, nga viti 2015 deri në vitin 2020, që do të përfitojë komuniteti rom dhe ai egjiptian në 6 fushat e cilësuara kryesore. “Do t’ju tregoj se si kemi konceptuar dhe sa do të ishin fondet nga viti 2015 deri në vitin 2020, sipas përqindjes që do të merrte komuniteti rom dhe egjiptian në secilën prej atyre që ne i konsiderojmë 6 fushat kryesore; Në fushën e arsimit janë rreth 15 milionë euro. Në qoftë se çdo vit përqindja e buxhetit që do të shpenzohej për komunitetin rom dhe egjiptian do të shumëzohej për 6 vitet e planit të veprimit, shuma në total që qeveria shqiptare do të shpenzojë janë 15 milionë euro; Do të shpenzojë 6.5 milionë euro për punësimin, një fraksion çdo vit nga fondi i punësimit; 2.4 milionë euro në shëndetësi; 7 milionë euro në strehim dhe banesa sociale; 2.3 milionë euro në ndihmë ekonomike dhe 2 milionë euro në shërbime të tjera, si regjistrimin, integrimin apo asistencën ligjore”- tha Veliaj.
Ndërsa Koordinatorja Zineb Touimi-Benjelloun vlerësoi se ky program reflekton vlerat që Shqipëria bashkëndan me Europën. “Jam shumë e lumtur që jam këtu dhe ndihem e nderuar që jam e ftuar në konsultimet vendore për planveprimin e integrimit të komunitetit rom. Qendra e komunitetit dhe ky planveprimi janë produkt i programit të përfshirjes sociale të komunitetit rom, financuar nga BE-ja dhe i implementuar nga UNDP, në partnership me Ministrinë e Mirëqenies Sociale dhe Rinisë dhe me autoritete vendore në Korçë, Berat dhe Vlorë. Ky program reflekton vlerat që Shqipëria bashkëndan me Europën dhe siguron që asnjë anëtar i shoqërisë të mos mbetet prapa në lidhje me mundësitë për rritje dhe zhvillim. Ka mundësi të shumëfishta mbështetjeje dhe asistence për komunitetet rom“ – shpreh Zineb Touimi-Benjelloun.
Duke e cilësuar këtë si një shembull tepër pozitiv të dhënë nga Bashkia e Korçës, Kryeministri theksoi se vullneti i Qeverisë është për ta trajtuar në çdo hap me shumë dinjitet dhe me seriozitet problematikën e këtij komuniteti. “Fakti që shembulli i parë i integrimit në listën e përfaqësuesve të komunitetit të Këshillit Bashkiak të një anëtari nga këto komunitete nuk është as rastësi, as gjest spontan dhe i izoluar, por është pjesë e kësaj vetëdijeje dhe e këtij shembulli tërësor, që nga Korça i jepet gjithë Shqipërisë. Kjo është dhe arsyeja se pse ne erdhëm këtu të gjithë së bashku, jo thjesht për çeljen e një hapësirë që në metra katrorë është modeste, por për të shfrytëzuar këtë moment, për të inkurajuar gjithë protagonistët të këtyre komuniteteve, që jo vetëm një përpjekje e tillë nuk është e kotë, por përkundrazi ajo krijon kushtet për dialog dhe për zgjidhjen e një sërë problemesh”, - u shpreh Kryeministri.
Gjithashtu, Kryeministri Rama siguroi se do të nxisë që kjo praktikë të shtrihet në të gjithë bashkitë e tjera të vendit. “Nëse kemi qenë këtu në Korçë në avangardë në përzgjedhjen e një përfaqësuesi të këtij komuniteti në listën e këshilltarëve të ardhshëm të bashkisë, ju siguroj që këtë shembull të Korçës do ta shtrijmë dhe në bashkitë e tjera, duke kërkuar që me përgjegjësi dhe ndershmëri të përzgjedhim përfaqësues të këtyre komuniteteve për të pasur një zë përfaqësues në këto këshilla që në zgjedhjet e ardhshme marrin një peshë të re shumë më të madhe, sepse ju e dini që tani nuk kemi afro 400 bashki dhe komuna, por vetëm 61 bashki në gjithë Shqipërinë” – theksoi Kryeministri.
Përfaqësues të këtyre komuniteteve të pranishëm në takim vlerësuan ngritjen e kësaj qendre dhe i cilësuan të dobishme politikat e hartuara nga Ministria e Mirëqenies Sociale dhe Rinisë për strehimin, arsimimin, punësimin e të rinjve, kujdesin shëndetësor etj.
***
Në Komisariatin e Policisë në Korçë u çel sot Zyra e Shërbimit Unik, ku përmblidhen të gjitha shërbimet që Policia e Shtetit ofron për qytetarët.
Në përurim ishin Kryeministri Edi Rama i shoqëruar nga Ministri i Punëve të Brendshme Saimir Tahiri, Drejtori i Përgjithshëm i Policisë, Artan Didi dhe drejtues të pushtetit vendor.
Shefi i Komisariatit të Korçës, e njohu Kryeministrin me mënyrën e funksionimit të zyrës dhe shërbimet që marrin qytetarët në të. Edhe në këtë zyrë shërbimet ofrohen të ndara në shërbime administrative dhe procedurale penale, ku shërbimi administrativ qytetarëve u ofrohet në 8 orë, ndërsa ai penal 24 orë.
Ministri Tahiri u shpreh se përgjatë vitit 2014 është dyfishuar aksesi i qytetarëve te Policia e Shtetit, çka sipas tij tregon besim të qytetarëve tek policia dhe lehtësi për të aksesuar shërbimin e policisë. “Vetëm gjatë vitit 2014 aksesi i qytetarëve te Policia e Shtetit është dyfishuar. Në qoftë se në vitin 2013 ishin rreth 2 mijë qytetarë që njoftonin policinë për problemet e tyre, gjatë vitit 2014 janë mbi 5 mijë. Gjë që tregon besim të qytetarëve te Policia e Shtetit, por edhe lehtësi për të aksesuar shërbimin e policisë” – u shpreh Tahiri.
***
Bashkia e Korçës, me mbështetje edhe të qeverisë qendrore, ka nisur rehabilitimin e disa mjediseve të përbashkëta në blloqe të ndryshme banimi, në lagjet periferike të qytetit.
Kryeministri Rama i shoqëruar nga Kryetari i Bashkisë së Korçës dhe Zëvendëskryeministri Niko Peleshi inspektoi punimet në realizimin e disa prej këtyre projekteve.
Ata inspektuan punimet për ndërtimin e terreneve sportive në mjediset e Shkollës Bujqësore dhe të Agrobiznesit. Ky terren është në periferi të qytetit të Korçës, çka do të thotë që jo vetëm qendra e Korçës është duke ju nënshtruar rikualifikimit urban por ky proces transformimi po shtrihet edhe drejt periferisë së këtij qyteti. Mjediset e jashtme sportive do të shfrytëzohen gjatë ditës nga nxënësit e shkollës, ndërsa në orët e pasdites dhe në mbrëmje mund të shfrytëzohen edhe nga komuniteti i kësaj lagjeje, pasi e gjithë hapësira është me ndriçim. Projekti është në zbatim dhe deri tani është ngritur fusha e basketbollit, dy fusha volejbolli, një fushë minifutbolli, ndërsa do të krijohet edhe një kënd fizkulture dhe një pistë vrapimi rreth terrenit dhe me gjelbërimin. “Është një pamje krejtësisht e transformuar, - tha kryetari i bashkisë, - ndërsa para ndërhyrjes ka qenë një sipërfaqe e degraduar krejtësisht”.
Në vijim Kryeministri u ndal për inspektimin e të tjera terreneve sportive në Shkollën “Demokracia”, ku aktualisht ishte duke përfunduar fusha e minifutbollit. Por tereni sportiv do të pasurohet edhe me ambiente të tjera të cilat do të jenë për nxënësit por gjatë pasdites dhe qytetarët e blloqeve të banimit aty afër.
***
Blloku i banimit nr.14 ishte inspektimi i radhës i Kryeministrit, ku Kryetari i Bashkisë e njohu me fazat në cilat ndodhet projekti dhe se si parashikohet transformimi i këtyre hapësirave.
Sipas tij, rikonstruksioni në këtë bllok banimi ka qenë integral. Është realizuar ndërhyrja në rrjetin e kanalizimeve, janë asfaltuar rrugët e tij, ndërsa po punohet për sistemimin e hapësirave të gjelbra. Kryetari i Bashkisë tha se po vijon puna me sistemin e lulishtes, ngritjen e një këndi lojërash për fëmijë si dhe krijimin e mjediseve çlodhëse për të gjitha moshat.
